ക്രിസ്റ്റൻ ജോസ്: കാനഡ പൊലീസിൽ എരുമേലി സ്വദേശിക്ക് അഭിമാന നേട്ടം

കോട്ടയം: കഠിനാധ്വാനവും നിശ്ചയദാർഢ്യവും കൈമുതലാക്കിയാൽ ലക്ഷ്യങ്ങൾ കീഴടക്കാമെന്ന് തെളിയിച്ച് മലയാളി യുവാവിന്റെ നേട്ടം. കോട്ടയം എരുമേലി സ്വദേശി ക്രിസ്റ്റൻ ജോസ് കാനഡയിലെ ടൊറന്റോ പൊലീസ് സർവീസിൽ ഉദ്യോഗസ്ഥനായി ചുമതലയേറ്റു. ഓഗസ്റ്റ് 20ന് നടന്ന സത്യപ്രതിജ്ഞയും ‘ബാഡ്ജ് ഡേ’ ചടങ്ങുകളും ക്രിസ്റ്റന്റെ പുതിയ ഔദ്യോഗിക ജീവിതത്തിന് തുടക്കമായി.

ക്രിസ്റ്റൻ ജോസ് ടൊറന്റോ പൊലീസിൽ

കാഞ്ഞിരപ്പള്ളി സെന്റ് ആന്റണീസ് പബ്ലിക് സ്കൂളിലായിരുന്നു ക്രിസ്റ്റന്റെ സ്കൂൾ വിദ്യാഭ്യാസം. തുടർന്ന് അമൽ ജ്യോതി കോളേജ് ഓഫ് എൻജിനിയറിങ്ങിൽ നിന്ന് മെക്കാനിക്കൽ എൻജിനിയറിങ് പൂർത്തിയാക്കി.

പഠനത്തിൽ മികവ് പുലർത്തിയ ക്രിസ്റ്റൻ കുങ്ഫുവിൽ ബ്ലാക്ക് ബെൽറ്റും നേടിയിട്ടുണ്ട്. കായികരംഗത്തും കഴിവ് തെളിയിച്ച ശേഷമാണ് ഉപരിപഠനത്തിനായി 2018ൽ കാനഡയിലേക്ക് പോയത്.

ബാങ്ക് ജോലി ഉപേക്ഷിച്ച് പൊലീസ് സേനയിലേക്ക്

ടൊറന്റോയിലെ ലാംബ്ടൺ കോളേജിൽ നിന്ന് ‘ക്വാളിറ്റി എൻജിനിയറിങ് മാനേജ്മെന്റ്’ കോഴ്സ് പൂർത്തിയാക്കിയ ശേഷം പ്രമുഖ ബാങ്കായ ടി.ഡി. ബാങ്കിന്റെ ടൊറന്റോ ആസ്ഥാനത്ത് ഓപ്പറേഷൻസ് കോർഡിനേറ്ററായി ക്രിസ്റ്റൻ ജോലി ചെയ്തു.

എന്നാൽ, സമൂഹത്തിന് നേരിട്ട് സേവനം നൽകാനും സുരക്ഷ ഉറപ്പാക്കാനും ആഗ്രഹിച്ചതോടെ കോർപ്പറേറ്റ് ജോലി ഉപേക്ഷിച്ച് പൊലീസ് സേനയിൽ ചേരാൻ തീരുമാനിക്കുകയായിരുന്നു.

ആദ്യ ശ്രമത്തിൽ തന്നെ തിരഞ്ഞെടുപ്പ്

2025ൽ ആരംഭിച്ച കഠിനമായ തിരഞ്ഞെടുപ്പ് നടപടികൾ ക്രിസ്റ്റൻ ജോസ് ആദ്യ ശ്രമത്തിൽ തന്നെ വിജയകരമായി പൂർത്തിയാക്കി.

ശാരീരികക്ഷമതാ പരീക്ഷ, നിയമപരവും അക്കാദമികവുമായ പരീക്ഷകൾ, സൈക്കോളജിക്കൽ സ്ക്രീനിങ്, പാനൽ ഇന്റർവ്യൂ എന്നിവ വിജയകരമായി മറികടന്നതോടെയാണ് 2026 ജനുവരിയിൽ നിയമന ഉത്തരവ് ലഭിച്ചത്.

പരിശീലനത്തിലും മികച്ച പ്രകടനം

ടൊറന്റോ പൊലീസ് അക്കാദമിയിലും ഒന്റാറിയോ പൊലീസ് കോളേജിലുമായിരുന്നു പരിശീലനം. പ്രവിശ്യയിലെ വിവിധ പൊലീസ് സർവീസുകളിൽനിന്നുള്ള റിക്രൂട്ടുകൾ പങ്കെടുത്ത പരിശീലനത്തിൽ ക്രിസ്റ്റൻ മികച്ച പ്രകടനം കാഴ്ചവച്ചു.

‘ടോപ്പ് 25’ റാങ്കിൽ ഇടം നേടിയ ക്രിസ്റ്റൻ ജൂൺ 19ന് ഗ്രാജുവേഷൻ പൂർത്തിയാക്കി. തുടർന്ന് ടൊറന്റോ പൊലീസ് കോളേജിലെ അഡ്വാൻസ്ഡ് മെട്രോപൊളിറ്റൻ ടാക്റ്റിക്കൽ ലീഗൽ ട്രെയിനിങ്ങും വിജയകരമായി പൂർത്തിയാക്കി.

സമൂഹസേവനത്തിനായി പുതിയ വഴിയിലേക്ക്

കോർപ്പറേറ്റ് ജോലി മടുപ്പിച്ചപ്പോഴാണ് സമൂഹത്തിന് ഉപകാരപ്രദമായ എന്തെങ്കിലും ചെയ്യണമെന്ന ചിന്ത മനസ്സിലുണ്ടായതെന്ന് ക്രിസ്റ്റൻ പറഞ്ഞു.

കാനഡയിലെ ഏറ്റവും വലിയ മുനിസിപ്പൽ പൊലീസ് സേനയും വടക്കേ അമേരിക്കയിലെ പ്രധാന നിയമപാലന ഏജൻസികളിലൊന്നുമാണ് ടൊറന്റോ പൊലീസ് സർവീസ്. ഏകദേശം 30 ലക്ഷം ജനസംഖ്യയുള്ള നഗരത്തിന്റെ സുരക്ഷാ സംവിധാനത്തിന്റെ ഭാഗമാകാൻ ആദ്യ ശ്രമത്തിൽ തന്നെ ക്രിസ്റ്റന് കഴിഞ്ഞത് മലയാളി സമൂഹത്തിനും അഭിമാനമായി.

സി.എ. ജോസഫ്–മോളി ജോസഫ് ദമ്പതികളുടെ മകനാണ് ക്രിസ്റ്റൻ ജോസ്. ഭാര്യ അഷ്മി ക്രിസ്റ്റൻ.