തിരുവനന്തപുരം: സംസ്ഥാനത്ത് കാലവർഷം ശക്തമാകുന്നതിന് മുൻപേ പകർച്ചപ്പനികൾ വ്യാപകമാകുന്നു. ഈ മാസം 26 ദിവസത്തിനിടെ 1,48,089 പേരാണ് വിവിധ പനികൾ ബാധിച്ച് ചികിത്സ തേടിയത്. എലിപ്പനി, ഡെങ്കിപ്പനി, മലേറിയ എന്നിവയ്ക്കൊപ്പം അമീബിക് മസ്തിഷ്കജ്വരവും ഗുരുതര വെല്ലുവിളിയായി മാറിയിരിക്കുകയാണ്.
ഈ മാസം മാത്രം പനിബാധിതരിൽ 10 മരണങ്ങളാണ് റിപ്പോർട്ട് ചെയ്തത്. ഇതിൽ എട്ടുപേർ എലിപ്പനി ബാധിച്ചും രണ്ടുപേർ ഡെങ്കിപ്പനി ബാധിച്ചുമാണ് മരിച്ചത്. ജലാശയങ്ങളിലൂടെ പടരുന്ന അമീബിക് മസ്തിഷ്കജ്വരം 27 പേർക്കാണ് സ്ഥിരീകരിച്ചത്. ഇവരിൽ 13 പേർ മരണമടഞ്ഞതായും ആരോഗ്യവകുപ്പ് അറിയിച്ചു.
ഡെങ്കിപ്പനി ലക്ഷണങ്ങളോടെ ചികിത്സ തേടിയ 3005 പേരിൽ 703 പേർക്ക് രോഗം സ്ഥിരീകരിച്ചിട്ടുണ്ട്. ബാക്കി സാമ്പിളുകളുടെ പരിശോധനാഫലം ലഭിക്കാനുണ്ട്. എലിപ്പനി ലക്ഷണങ്ങളോടെ എത്തിയ 224 പേരിൽ 122 പേർക്ക് രോഗം സ്ഥിരീകരിച്ചു.
ആഫ്രിക്കൻ രാജ്യങ്ങളിൽ റിപ്പോർട്ട് ചെയ്യുന്ന എബോള വൈറസ് വ്യാപന പശ്ചാത്തലത്തിലും സംസ്ഥാനം അതീവ ജാഗ്രതയിലാണ്. പനിബാധിതരുടെ വിദേശയാത്രാ ചരിത്രം ഉൾപ്പെടെ വിശദമായി പരിശോധിക്കുന്നുണ്ട്. സാധാരണ പകർച്ചപ്പനിയുടെ ലക്ഷണങ്ങളുമായി സാമ്യമുള്ളതിനാലാണ് എബോള ഭീഷണിയിലും ആരോഗ്യവകുപ്പ് ജാഗ്രത പാലിക്കുന്നത്.
വയറിളക്കരോഗങ്ങളും സംസ്ഥാനത്ത് രൂക്ഷമാകുകയാണ്. ഈ മാസം മാത്രം 42,868 പേരാണ് ചികിത്സ തേടിയത്. ഇന്നലെ മാത്രം 2416 പേർ ആശുപത്രികളിലെത്തി. മലിനജലത്തിലൂടെ പടരുന്ന ഷിഗെല്ല ബാക്ടീരിയ 31 പേർക്കാണ് സ്ഥിരീകരിച്ചത്.
More Read
കടുത്ത ചൂടും ഇടവിട്ട മഴയും രോഗവ്യാപനത്തിന് കാരണമാകുന്നതിനാൽ തിളപ്പിച്ച വെള്ളം മാത്രം കുടിക്കണം, വ്യക്തി ശുചിത്വവും പരിസര ശുചിത്വവും കർശനമായി പാലിക്കണം തുടങ്ങിയ നിർദ്ദേശങ്ങൾ ആരോഗ്യവകുപ്പ് നൽകി. മഴക്കാല രോഗങ്ങൾ നേരിടാൻ ആവശ്യമായ മരുന്നുകളും ഉപകരണങ്ങളും കുറഞ്ഞത് രണ്ടാഴ്ചത്തേക്കെങ്കിലും സംഭരിക്കാൻ നിർദ്ദേശം നൽകിയതായി ആരോഗ്യമന്ത്രി K. Muralidharan അറിയിച്ചു.
English Summary
Kerala is witnessing a sharp rise in infectious diseases even before the monsoon intensifies, with over 1.48 lakh people seeking treatment in just 26 days. Leptospirosis, dengue, malaria, and amoebic meningoencephalitis are spreading rapidly, while health authorities are also on alert over possible Ebola-related risks. The Health Department has intensified preventive measures and directed hospitals to stock essential medicines and equipment.
