തൃശൂർ: ലക്ഷക്കണക്കിന് രൂപയുടെ ഇന്ധനക്കുടിശിക അടയ്ക്കാത്തതിനെ തുടർന്ന് പൊലീസ് വാഹനങ്ങൾക്ക് ഡീസൽ നൽകാൻ പെട്രോൾ പമ്പ് ഉടമകൾ മടി കാണിക്കുന്നതായി റിപ്പോർട്ട്. ഇതോടെ നഗരത്തിലെ രണ്ട് പ്രധാന പൊലീസ് സ്റ്റേഷനുകളിലെയും കമ്മിഷണർ ഓഫീസ്, സ്പെഷ്യൽ ബ്രാഞ്ച്, ക്രൈംബ്രാഞ്ച്, നർകോട്ടിക്സ് വിഭാഗങ്ങൾ ഉൾപ്പെടെ വിവിധ വിംഗുകളിലെ ഏകദേശം 30 വാഹനങ്ങളുടെ ഓട്ടം പരിമിതപ്പെടുത്തിയിരിക്കുകയാണ്.
ഓരോ സ്റ്റേഷൻ പരിധിയിലും ഒന്നോ രണ്ടോ പമ്പുകളുമായാണ് പൊലീസ് ഇന്ധന വിതരണത്തിനായി ധാരണയിലെത്തിയിട്ടുള്ളത്. എന്നാൽ പല പമ്പുകളിലും മൂന്ന് മുതൽ നാല് ലക്ഷം രൂപവരെ കുടിശികയായതായി ഉടമകൾ പറയുന്നു. ഇതോടെ ലോ ആൻഡ് ഓർഡർ ചുമതലകൾ, പ്രതികളെ കോടതിയിൽ ഹാജരാക്കൽ, അടിയന്തര ഇടപെടലുകൾ, വി.ഐ.പി ഡ്യൂട്ടികൾ എന്നിവയെല്ലാം പ്രതിസന്ധിയിലായിരിക്കുകയാണ്.
100 ഡയൽ സേവനത്തിൽ ലഭിക്കുന്ന അടിയന്തര വിളികൾക്ക് സമയബന്ധിതമായി പ്രതികരിക്കാനും ബുദ്ധിമുട്ട് നേരിടുന്നതായി പൊലീസ് ഉദ്യോഗസ്ഥർ പറയുന്നു. വി.ഐ.പി ഡ്യൂട്ടി ഉണ്ടാകുന്ന ദിവസങ്ങളിൽ മറ്റ് ആവശ്യങ്ങൾ ഒഴിവാക്കി ലഭ്യമായ ഇന്ധനം അതിനായി മാത്രം മാറ്റിവയ്ക്കേണ്ട അവസ്ഥയാണെന്നും ഉദ്യോഗസ്ഥർ വ്യക്തമാക്കുന്നു.
നഗരത്തിലെ ഈസ്റ്റ്, വെസ്റ്റ് സ്റ്റേഷനുകളിൽ മൂന്നുവീതം ജീപ്പുകളാണുള്ളത്. ഇതിൽ ഒരു വാഹനം സ്റ്റേഷൻ ഹൗസ് ഓഫീസറുടെ ആവശ്യങ്ങൾക്കായാണ് ഉപയോഗിക്കുന്നത്. ബാക്കിയുള്ള രണ്ട് വാഹനങ്ങളാണ് പട്രോളിംഗ് ഉൾപ്പെടെയുള്ള പ്രധാന ചുമതലകൾ നിർവഹിക്കുന്നത്. ഓരോ ജീപ്പിനും പ്രതിദിനം ഏകദേശം നൂറ് കിലോമീറ്റർ വരെ സഞ്ചരിക്കേണ്ടി വരുന്നതിനാൽ എട്ട് മുതൽ പത്ത് ലിറ്റർ വരെ ഡീസൽ ആവശ്യമായി വരുന്നു.
ദൂരപരിധി കൂടുതലുള്ള മലയോര-ഗ്രാമപ്രദേശങ്ങളിലെ സ്റ്റേഷനുകളിലാണ് സ്ഥിതി കൂടുതൽ ഗുരുതരമെന്നാണ് റിപ്പോർട്ട്. ചിലയിടങ്ങളിൽ ദിവസേന 20 ലിറ്റർ വരെ ഡീസൽ ആവശ്യമായി വരുന്നു. ഇന്ധനം നിറച്ചതിന് ശേഷം ബിൽ പൊലീസ് ആസ്ഥാനത്തെ മോട്ടോർ വെഹിക്കിൾ വിഭാഗത്തിലേക്ക് അയച്ച ശേഷമാണ് പണം അനുവദിക്കാറുള്ളത്. എന്നാൽ ഒരു വർഷത്തിലേറെയായി കുടിശിക തീർപ്പാകാത്ത സാഹചര്യമാണ് നിലനിൽക്കുന്നത്.
More Read
വാറണ്ട് പ്രതികളെ പിടികൂടൽ പോലുള്ള രഹസ്യ ദൗത്യങ്ങൾക്ക് പൊലീസ് ഉദ്യോഗസ്ഥർ സ്വന്തം വാഹനങ്ങളാണ് ഉപയോഗിക്കുന്നതെന്നും, സ്വന്തം പണത്തിൽ ഇന്ധനം നിറച്ചാലും പിന്നീട് തിരികെ ലഭിക്കാത്ത അവസ്ഥയാണെന്നും ഉദ്യോഗസ്ഥർ പരാതിപ്പെടുന്നു.
പൊലീസിന്റെ ബൈക്കുകൾക്ക് മാസങ്ങളായി പെട്രോൾ ലഭിക്കാത്തതിനെ തുടർന്ന് ബീറ്റ് ഡ്യൂട്ടികളും പ്രായോഗികമായി നിലച്ചിരിക്കുകയാണ്. ഇടവഴികളിലൂടെയും നാട്ടിൻപുറങ്ങളിലൂടെയും രാത്രി പട്രോളിംഗിന് ഉപയോഗിച്ചിരുന്ന ബൈക്കുകൾ ജില്ലയിലെ 24 സ്റ്റേഷനുകളിലും ഇപ്പോൾ ഉപയോഗശൂന്യമായി കിടക്കുകയാണെന്നാണ് വിവരം.
English Summary
Police operations in Thrissur are facing a serious crisis after fuel stations reportedly refused to provide diesel due to pending dues running into lakhs of rupees. Around 30 police vehicles, including patrol jeeps and special branch units, have had their movement restricted. Emergency response, patrol duties, and even beat policing have been severely affected as fuel shortages continue.
