തിരുവനന്തപുരം ∙ സ്വകാര്യ ബസ് മേഖലയെ സംരക്ഷിക്കുന്നതിനും സ്ത്രീകൾക്കുള്ള സൗജന്യ യാത്രാ പദ്ധതി സംസ്ഥാനമൊട്ടാകെ വ്യാപിപ്പിക്കുന്നതിനുമായി സ്വകാര്യ ബസുകളെ കെഎസ്ആർടിസിയുടെ മാതൃകയിൽ പ്രവർത്തിപ്പിക്കുന്ന പദ്ധതി സർക്കാർ പരിഗണിക്കുന്നതായി റിപ്പോർട്ട്. ഇതുസംബന്ധിച്ച പ്രാഥമിക ചർച്ചകൾ ആരംഭിച്ചതായാണ് വിവരം.
ഉത്തർപ്രദേശ്, കർണാടക, തെലങ്കാന സംസ്ഥാനങ്ങളിൽ നടപ്പാക്കിയ മാതൃകയിലാണ് പദ്ധതി ആലോചിക്കുന്നത്. അവിടങ്ങളിൽ സംസ്ഥാന ട്രാൻസ്പോർട്ട് കോർപ്പറേഷനുകളുടെ മേൽനോട്ടത്തിലാണ് സ്വകാര്യ ബസുകൾ ഉൾപ്പെടെയുള്ള സർവീസുകൾ പ്രവർത്തിക്കുന്നത്.
പദ്ധതി പ്രകാരം, സ്വകാര്യ ബസുകൾക്ക് കെഎസ്ആർടിസി നിശ്ചിത വാടക നൽകും. ഡ്രൈവർമാരുടെ ശമ്പളം ബസുടമകൾ വഹിക്കുമ്പോൾ കണ്ടക്ടർമാരെ കെഎസ്ആർടിസി നിയോഗിക്കും. ബസുകളുടെ അറ്റകുറ്റപ്പണികളും ഇന്ധനച്ചെലവും കെഎസ്ആർടിസി ഏറ്റെടുക്കുമെന്നാണ് സൂചന.
പദ്ധതി നടപ്പായാൽ ഗ്രാമീണ മേഖലകളിൽ ഉൾപ്പെടെ കൂടുതൽ സർവീസുകൾ നടത്താനാകുമെന്നും അനിയന്ത്രിത നിരക്ക് വർധന ഒഴിവാക്കാനാകുമെന്നും വിലയിരുത്തപ്പെടുന്നു. ദിവസവരുമാനത്തെക്കാൾ കൂടുതൽ തുക വാടകയായി ലഭിക്കുന്നതിലൂടെ സ്വകാര്യ ബസുടമകൾ നേരിടുന്ന സാമ്പത്തിക പ്രതിസന്ധിക്കും പരിഹാരമാകുമെന്നാണ് പ്രതീക്ഷ.
സ്ത്രീകൾക്കുള്ള ‘പ്രിയദർശിനി’ സൗജന്യ യാത്രാ പദ്ധതിയെ തുടർന്ന് വരുമാനം കുറഞ്ഞുവെന്നാണ് സ്വകാര്യ ബസുടമകളുടെ പരാതി. ഈ സാഹചര്യത്തിലാണ് പുതിയ മാതൃക പരിഗണനയിലായത്.
More Read
പദ്ധതിയുടെ സാധ്യതാപരമായ നേട്ടങ്ങൾ
- പുതിയ ബസുകൾ വാങ്ങേണ്ട ബാധ്യത സർക്കാരിന് കുറയും.
- യാത്രാനിരക്കുകളും കൺസെഷൻ നിരക്കുകളും ഏകീകരിച്ച് നിശ്ചയിക്കാനാകും.
- പൊതുഗതാഗത ശൃംഖല കൂടുതൽ വിപുലമാകും.
- കെഎസ്ആർടിസിയിൽ കൂടുതൽ കണ്ടക്ടർ തസ്തികകൾ സൃഷ്ടിക്കപ്പെടും.
English Summary:
The Kerala government is reportedly considering a model under which private buses would operate under KSRTC supervision. The move aims to protect the private bus sector and expand the free travel scheme for women across the state. Under the proposal, KSRTC would pay fixed rentals to private bus owners, while also bearing fuel and maintenance costs. Initial discussions on the plan have begun.
