സംസ്ഥാനത്തെ മഴക്കെടുതിയും പ്രളയവും നേരിടുന്ന ജനങ്ങൾക്ക് ആശ്വാസമായി സമഗ്ര ദുരിതാശ്വാസ പാക്കേജിന് മന്ത്രിസഭാ യോഗം അംഗീകാരം നൽകി. പ്രളയത്തിൽ മരിച്ചവരുടെ കുടുംബങ്ങൾക്ക് എട്ട് ലക്ഷം രൂപ ധനസഹായം നൽകുമെന്ന് മുഖ്യമന്ത്രി വി.ഡി. സതീശൻ വാർത്താസമ്മേളനത്തിൽ അറിയിച്ചു. കൃഷിനാശം, വീടുകളുടെ നാശനഷ്ടം, വ്യാപാരസ്ഥാപനങ്ങളുടെ നഷ്ടം എന്നിവയ്ക്കും പ്രത്യേക ധനസഹായം നൽകുമെന്നും അദ്ദേഹം വ്യക്തമാക്കി.
മഴക്കെടുതിയുടെ വ്യാപ്തി
കാലവർഷക്കെടുതിയിൽ ഇതുവരെ സംസ്ഥാനത്ത് 26 മരണങ്ങളാണ് റിപ്പോർട്ട് ചെയ്തിരിക്കുന്നത്. 462 ദുരിതാശ്വാസ ക്യാമ്പുകളിലായി 27,048 പേരെ മാറ്റിപ്പാർപ്പിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം ജില്ലകളിലാണ് ഏറ്റവും കൂടുതൽ പേർ ക്യാമ്പുകളിൽ കഴിയുന്നത്. 11 പേർക്ക് പരിക്കേറ്റതായും നാല് പേരെ കാണാതായതായും മുഖ്യമന്ത്രി അറിയിച്ചു.
കൃഷിമേഖലയിലും വലിയ നഷ്ടമാണ് രേഖപ്പെടുത്തിയത്. 1,882 ഹെക്ടർ സ്ഥലത്തെ കൃഷി നശിച്ചപ്പോൾ 23,537 കർഷകരെ ഇത് ബാധിച്ചു. പ്രാഥമിക കണക്കുകൾ പ്രകാരം 67.44 കോടി രൂപയുടെ കൃഷിനാശമുണ്ടായതായും സർക്കാർ വ്യക്തമാക്കി.
വീടുകൾക്കും കുടുംബങ്ങൾക്കും കൂടുതൽ സഹായം
മഴവെള്ളം കയറിയ വീടുകളുടെയും കടകളുടെയും ഉടമകൾക്ക് 10,000 രൂപ വീതം ധനസഹായം നൽകും. മഴക്കെടുതിയിൽ മരിച്ചവരുടെ കുടുംബങ്ങൾക്ക് മരണാനന്തര ചടങ്ങുകൾ നടത്തുന്നതിനായി 10,000 രൂപ പ്രത്യേകമായി അനുവദിക്കും.
More Read
പൂർണമായും തകർന്ന വീടുകൾക്ക് ലഭിക്കുന്ന നഷ്ടപരിഹാരം നാല് ലക്ഷം രൂപയിൽ നിന്ന് ആറ് ലക്ഷം രൂപയായി വർധിപ്പിച്ചു. വീടും സ്ഥലവും പൂർണമായി നഷ്ടപ്പെട്ടവർക്ക് നൽകുന്ന സഹായം 10 ലക്ഷത്തിൽ നിന്ന് 12 ലക്ഷം രൂപയായി ഉയർത്താനും മന്ത്രിസഭ തീരുമാനിച്ചു.
വെള്ളക്കെട്ട് ബാധിതർക്കും കർഷകർക്കും ആശ്വാസം
വീട്ടിൽ വെള്ളം കയറി താമസിക്കാൻ കഴിയാത്ത കുടുംബങ്ങൾക്ക് താൽക്കാലികമായി വാടകവീട് എടുത്ത് താമസിക്കാം. അതിന്റെ വാടക സർക്കാർ വഹിക്കും. വെള്ളക്കെട്ട് ബാധിച്ച വീടുകളിലെ ഓരോ റേഷൻ കാർഡിലെയും രണ്ട് അംഗങ്ങൾക്ക് ദിവസേന 300 രൂപ വീതം നൽകും.
വിളനാശം സംഭവിച്ച കർഷകർക്ക് നൽകുന്ന നഷ്ടപരിഹാരം 25 ശതമാനം വർധിപ്പിക്കാനും സർക്കാർ തീരുമാനിച്ചു. ഈ അധിക തുക സംസ്ഥാനം നേരിട്ട് വഹിക്കുമെന്നും അറിയിച്ചു.
വ്യാപാരികൾക്കും എം.എസ്.എം.ഇകൾക്കും പ്രത്യേക പദ്ധതി
മഴയിൽ വെള്ളം കയറി നശിച്ച വ്യാപാരസ്ഥാപനങ്ങളുടെ ഉടമകൾക്ക് 10,000 രൂപ വീതം ധനസഹായം നൽകും. മുൻകാല ദുരിതാശ്വാസ പദ്ധതികളിൽ ഇല്ലാതിരുന്ന പുതിയ ആനുകൂല്യമാണിത്.
ചെറുകിട-ഇടത്തരം വ്യവസായ സ്ഥാപനങ്ങളുടെ പുനരുജ്ജീവനത്തിനായി ‘ഉജ്ജീവന സോഫ്റ്റ് ലോൺ’ പദ്ധതി നടപ്പാക്കും. 12 ലക്ഷം രൂപ വരെ വായ്പ ലഭ്യമാക്കുന്ന പദ്ധതിയിൽ മൂന്ന് ലക്ഷം രൂപയോ ആകെ വായ്പയുടെ 25 ശതമാനമോ മാർജിൻ മണിയായി സർക്കാർ ബാങ്കുകൾക്ക് നൽകും.
തീരസംരക്ഷണത്തിനും ഭവന പദ്ധതിക്കും പ്രാധാന്യം
തീരദേശ മേഖലകളിൽ കടൽഭിത്തി നിർമിക്കാനും ജിയോബാഗുകൾ സ്ഥാപിക്കാനും സർക്കാർ തീരുമാനിച്ചു. മത്സ്യത്തൊഴിലാളികൾക്കായുള്ള ഭവന പദ്ധതിയായ ‘പുനർഗേഹം’ പുതുക്കി നടപ്പാക്കുകയും പദ്ധതിയുടെ ധനസഹായം വർധിപ്പിക്കുകയും ചെയ്യുമെന്ന് മന്ത്രിസഭ അറിയിച്ചു.
