എല്ലാവിധ സാമ്പത്തിക പ്രവചനങ്ങളെയും നിഷ്പ്രഭമാക്കിക്കൊണ്ട് കഴിഞ്ഞ സാമ്പത്തിക വർഷത്തിൽ ഇന്ത്യ മികച്ച ജിഡിപി മുന്നേറ്റം കൈവരിച്ചിരിക്കുകയാണ്. 2022-23 അടിസ്ഥാന വർഷമാക്കിയ ശേഷമുള്ള ആദ്യ ജിഡിപി കണക്കുകളാണ് ഇപ്പോൾ കേന്ദ്ര സ്റ്റാറ്റിസ്റ്റിക്സ് മന്ത്രാലയം ഔദ്യോഗികമായി പുറത്തുവിട്ടിരിക്കുന്നത്.
ഇതുപ്രകാരം 2025-26 സാമ്പത്തിക വർഷത്തിൽ രാജ്യത്തെ മൊത്ത ആഭ്യന്തര ഉൽപാദന വളർച്ച 7.7 ശതമാനമായി രേഖപ്പെടുത്തി. മുൻവർഷമായ 2024-25ൽ ഇത് 7.1 ശതമാനവും തൊട്ടുമുൻപത്തെ വർഷം 7.2 ശതമാനവുമായിരുന്നു. കേന്ദ്ര സർക്കാരും റിസർവ് ബാങ്കും പ്രതീക്ഷിച്ചിരുന്ന 7.6 ശതമാനം എന്ന അനുമാനത്തെപ്പോലും മറികടക്കാൻ ഇത്തവണ രാജ്യത്തിന് കഴിഞ്ഞിട്ടുണ്ട്.
ഇന്ത്യയുടെ ആകെ ജിഡിപി മൂല്യത്തിൽ ഉണ്ടായ വലിയ വർദ്ധനവാണ് ഈ വളർച്ചാ നിരക്കിൽ പ്രതിഫലിക്കുന്നത്. മുൻവർഷത്തെ 299.89 ലക്ഷം കോടി രൂപയിൽ നിന്ന് കഴിഞ്ഞ സാമ്പത്തിക വർഷം രാജ്യത്തിന്റെ ജിഡിപി മൂല്യം 323.12 ലക്ഷം കോടി രൂപയായാണ് മെച്ചപ്പെട്ടത്.
ഒരു നിശ്ചിത കാലയളവിൽ രാജ്യത്തുണ്ടാകുന്ന ഉൽപന്നങ്ങളുടെയും സേവനങ്ങളുടെയും ആകെ മൂല്യത്തെയാണ് ജിഡിപി എന്ന് കണക്കാക്കുന്നത്. എന്നാൽ ഈ വലിയ മുന്നേറ്റത്തിനിടയിലും രാജ്യത്തെ ചില നിർണായക മേഖലകൾ കടുത്ത തളർച്ച നേരിടുന്നുണ്ടെന്ന യാഥാർത്ഥ്യവും മന്ത്രാലയത്തിന്റെ റിപ്പോർട്ട് വ്യക്തമാക്കുന്നുണ്ട്.
പ്രത്യേകിച്ച് കാർഷിക മേഖലയുടെ വളർച്ച മുൻവർഷത്തെ 4.2 ശതമാനത്തിൽ നിന്ന് 3 ശതമാനത്തിലേക്ക് താഴേക്കുപോയി. ഖനന മേഖലയുടെ വളർച്ചയും 11.7 ശതമാനത്തിൽ നിന്നും 5.2 ശതമാനമായി കുറഞ്ഞിട്ടുണ്ട്. എന്നാൽ മാനുഫാക്ചറിങ് മേഖല 9.3 ശതമാനത്തിൽ നിന്നും 10.7 ശതമാനത്തിലേക്ക് നിലമെച്ചപ്പെടുത്തിയത് രാജ്യത്തിന് വലിയ ആശ്വാസമായി മാറി.
More Read
നിർമാണ മേഖല 7.4 ശതമാനവും ധനകാര്യം, റിയൽ എസ്റ്റേറ്റ്, ഐടി ഉൾപ്പെടുന്ന മേഖലകൾ 10.4 ശതമാനവും വളർച്ച രേഖപ്പെടുത്തിയപ്പോൾ പൊതുഭരണം, പ്രതിരോധം എന്നിവ 5 ശതമാനത്തിൽ മാറ്റമില്ലാതെ തുടർന്നു. വ്യാപാര-ഹോട്ടൽ-ഗതാഗത മേഖലകളാകട്ടെ 11 ശതമാനത്തിന്റെ മികച്ച കുതിപ്പാണ് നടത്തിയത്.
സാമ്പത്തിക വർഷത്തിന്റെ അവസാന പാദമായ ജനുവരി-മാർച്ച് കാലയളവിൽ ഇന്ത്യ 7.8 ശതമാനം വളർച്ചയാണ് രേഖപ്പെടുത്തിയത്. ഇത് മുൻവർഷത്തെ ഇതേ പാദത്തിലെ 7 ശതമാനവുമായി താരതമ്യം ചെയ്യുമ്പോൾ വലിയ മെച്ചമാണെങ്കിലും കഴിഞ്ഞ മൂന്ന് പാദങ്ങളിലെ ഏറ്റവും താഴ്ന്ന നിരക്കാണ്. പശ്ചിമേഷ്യൻ യുദ്ധം മൂലമുണ്ടായ ആഗോള പ്രതിസന്ധികൾ കഴിഞ്ഞ പാദത്തെ ബാധിച്ചിട്ടുണ്ട്.
വരും പാദങ്ങളിലും ഈ പ്രതിസന്ധിയും എൽ-നിനോ പ്രതിഭാസം മൂലമുള്ള കാർഷിക തളർച്ചയും ജിഡിപിയെ ബാധിച്ചേക്കുമെന്ന് റിസർവ് ബാങ്ക് മുന്നറിയിപ്പ് നൽകുന്നു. ഇതിന്റെ പശ്ചാത്തലത്തിൽ നടപ്പുവർഷത്തെ (2026-27) ആകെ വളർച്ചാ അനുമാനം ആർബിഐ 6.6 ശതമാനമായി വെട്ടിക്കുറച്ചിട്ടുമുണ്ട്.
More Read
എങ്കിലും ലോകത്തിലെ ഏറ്റവും വേഗത്തിൽ വളരുന്ന വലിയ സമ്പദ്വ്യവസ്ഥ എന്ന പദവി ഇന്ത്യ ഇത്തവണയും വിജയകരമായി നിലനിർത്തി. പ്രമുഖ സാമ്പത്തിക നിരീക്ഷകരും എസ്ബിഐ അടക്കമുള്ള ധനകാര്യ സ്ഥാപനങ്ങളും പ്രവചിച്ചതിനേക്കാൾ വളരെ മുകളിലാണ് ഇന്ത്യയുടെ ജനുവരി-മാർച്ച് പാദത്തിലെ 7.8 ശതമാനം വളർച്ച.
ഇതേ കാലയളവിൽ ലോകത്തെ മറ്റ് പ്രധാന ശക്തികളായ യുഎസ് 1.6 ശതമാനവും ചൈന 5 ശതമാനവും ജപ്പാൻ 2.1 ശതമാനവും മാത്രം വളർച്ച രേഖപ്പെടുത്തിയപ്പോൾ ഫ്രാൻസ് മൈനസ് 0.1 ശതമാനത്തിലേക്ക് കൂപ്പുകുത്തി. അയൽരാജ്യങ്ങളെയടക്കം പിന്നിലാക്കിയുള്ള ഇന്ത്യയുടെ ഈ മുന്നേറ്റം ആഗോളതലത്തിൽ രാജ്യത്തിന്റെ സാമ്പത്തിക അടിത്തറ കൂടുതൽ ഭദ്രമാക്കുന്നു.
English Summary
India’s GDP grew by 7.7% in FY 2025-26, beating the RBI’s estimate of 7.6%. Despite slowdowns in agriculture and mining, manufacturing and trade fueled growth. India remains the world’s fastest-growing major economy, outperforming the US (1.6%) and China (5%) in the January-March quarter with 7.8% growth.
