കൊച്ചി: സി.എം.ആർ.എല്ലുമായി ബന്ധപ്പെട്ട മാസപ്പടി കേസിൽ അന്വേഷണം കൂടുതൽ വ്യാപിപ്പിക്കാൻ എൻഫോഴ്സ്മെന്റ് ഡയറക്ടറേറ്റ് (ഇഡി) നീക്കം. മുൻമുഖ്യമന്ത്രി പിണറായി വിജയന്റെ മകൾ വീണ വിജയനെ വിശദമായി ചോദ്യം ചെയ്യുന്നതിനും പണം കൈപ്പറ്റിയതായി സംശയിക്കുന്ന മറ്റ് വ്യക്തികളിലേക്കും അന്വേഷണം വ്യാപിപ്പിക്കുന്നതിനുമാണ് തീരുമാനം.
കൊച്ചിയിലെ ഇഡി സോണൽ ഓഫീസിൽ ചേർന്ന ഉന്നതതല യോഗത്തിലാണ് തുടർനടപടികൾ ചർച്ച ചെയ്തത്. അന്വേഷണം തടയണമെന്ന് ആവശ്യപ്പെട്ട് സി.എം.ആർ.എൽ സമർപ്പിച്ച അപ്പീലിൽ ഹൈക്കോടതിയുടെ നിലപാട് അറിഞ്ഞ ശേഷമാകും തുടർനടപടികളിലേക്ക് കടക്കുക. ഹർജി ഉടൻ കോടതി പരിഗണിക്കും.
സി.എം.ആർ.എൽ ഉടമകളെയും മുതിർന്ന ഉദ്യോഗസ്ഥരെയും വീണ്ടും ചോദ്യം ചെയ്ത ശേഷമാകും വീണ വിജയന് നോട്ടീസ് നൽകി ഇഡി ഓഫീസിലേക്ക് വിളിപ്പിക്കുക. വീണയുടെ സ്വകാര്യ ബാങ്ക് അക്കൗണ്ടിനും എക്സാലോജിക് കമ്പനിയുടെ അക്കൗണ്ടുകൾക്കും മേൽ പരിശോധന ശക്തമാക്കിയതായാണ് വിവരം. മുൻകാല സാമ്പത്തിക ഇടപാടുകളും വിദേശ ബാങ്ക് അക്കൗണ്ടുകളുമായി ബന്ധപ്പെട്ട വിവരങ്ങളും അന്വേഷണ പരിധിയിലുണ്ട്.
സി.എം.ആർ.എൽ നടത്തിയതായി കണ്ടെത്തിയ സംശയാസ്പദ സാമ്പത്തിക ഇടപാടുകളുമായി ബന്ധപ്പെട്ട് രാഷ്ട്രീയ നേതാക്കളടക്കമുള്ളവരുടെ പങ്കും പരിശോധിക്കുന്നതായി റിപ്പോർട്ടുകളുണ്ട്. കൂടുതൽ പേരെ അന്വേഷണ പരിധിയിലേക്ക് ഉൾപ്പെടുത്താനാണ് ഇഡിയുടെ നീക്കം.
അതേസമയം, മുഖ്യമന്ത്രിയുടെ വസതിയിൽ റെയ്ഡിന് ശേഷം മടങ്ങുകയായിരുന്ന ഇഡി ഉദ്യോഗസ്ഥരെ ആക്രമിച്ച കേസിൽ 20 സി.പി.എം-ഡി.വൈ.എഫ്.ഐ പ്രവർത്തകരെ പൊലീസ് അറസ്റ്റ് ചെയ്തു. ചിലർ കീഴടങ്ങിയതിനെ തുടർന്നാണ് അറസ്റ്റ് രേഖപ്പെടുത്തിയത്.
More Read
ഇഡി ഉദ്യോഗസ്ഥരെ ആക്രമിക്കാനും വാഹനങ്ങൾ തകർക്കാനും ശ്രമിച്ചെന്നാണ് കേസ്. പ്രതികളെ കോടതിയിൽ ഹാജരാക്കിയ ശേഷം റിമാൻഡ് ചെയ്തു. കേസിൽ മുന്നൂറോളം പേരെ പ്രതിചേർത്തിട്ടുണ്ടെന്നും അന്വേഷണം തുടരുകയാണെന്നും പൊലീസ് അറിയിച്ചു.
English Summary:
The Enforcement Directorate (ED) is planning to expand its investigation into the CMRL-linked “Masappadi” case and may summon Veena Vijayan for detailed questioning after further examination of company officials. Financial transactions, including past bank records, are under scrutiny. Meanwhile, 20 CPM and DYFI workers have been arrested in connection with the alleged attack on ED officials following searches linked to the case. Police say the investigation is continuing with hundreds of accused named in the case.
