വാഷിങ്ടൻ: യുഎസിലെ കോർണൽ സർവകലാശാലയിലെ മുൻ വിദ്യാർഥിനിയെ ലഹരിമരുന്ന് നൽകി കൂട്ടബലാത്സംഗം ചെയ്തെന്ന പരാതിയിൽ പുനരന്വേഷണം തുടങ്ങി. അതിക്രമം തടയുന്നതിലും സംരക്ഷണം നൽകുന്നതിലും സർവകലാശാല പരാജയപ്പെട്ടെന്നാരോപിച്ച് വിദ്യാർഥിനി നൽകിയ കേസിന് പിന്നാലെയാണ് നടപടി.
2024ൽ കോർണൽ സർവകലാശാലയിലെ ചൈ ഫൈ ഫ്രറ്റേണിറ്റി ഹൗസിലാണ് സംഭവം നടന്നതെന്നാണ് പരാതിയിലെ ആരോപണം. അന്ന് 20 വയസ്സുണ്ടായിരുന്ന യുവതി ഫ്രറ്റേണിറ്റി ഹൗസിലെ സുഹൃത്തിനെ സന്ദർശിക്കാനെത്തിയതായിരുന്നു.
കോർണൽ സർവകലാശാലയിൽ സംഭവിച്ചത്
ഫ്രറ്റേണിറ്റി ഹൗസിലെത്തിയ യുവതിക്ക് രണ്ട് അംഗങ്ങൾ നിർബന്ധിച്ച് കെറ്റാമൈൻ നൽകിയെന്നാണ് കോടതിയിൽ സമർപ്പിച്ച പരാതിയിൽ പറയുന്നത്. തുടർന്ന് അബോധാവസ്ഥയിലായ യുവതിയെ ഏഴ് പേർ ചേർന്ന് ലൈംഗികമായി പീഡിപ്പിച്ചെന്നും ഹർജിയിൽ ആരോപിക്കുന്നു.
വിൻസ്റ്റൺ ലീ, സ്കോട്ട് ക്രെറ്റ്ഷമർ, സ്കോട്ട് നോറിസ്, മാത്യു ഇംഗൽസ്, ജോനാഥൻ ന്യൂവൽ, ഗില്ലിയോ ലോപ്പസ്, ഡീഗോ സരബിയ എന്നിവർക്കെതിരെയാണ് പരാതിയിൽ ആരോപണമുള്ളത്.
സ്നാപ്ചാറ്റ് സന്ദേശങ്ങളും കോടതിയിൽ
യുവതി അബോധാവസ്ഥയിൽ കിടക്കുന്നതിനിടെ പ്രതികളിൽ ഒരാൾ ‘ചൈ ഫൈ ആക്റ്റീവ്സ്’ എന്ന സ്നാപ്ചാറ്റ് ഗ്രൂപ്പിൽ സന്ദേശമയച്ച് മറ്റുള്ളവരെ സ്ഥലത്തേക്ക് ക്ഷണിച്ചെന്നാണ് പരാതി.
More Read
ഇതിനിടെ കൂടുതൽ പേർ അവിടെയെത്തുകയും മണിക്കൂറുകളോളം ലൈംഗിക അതിക്രമം തുടരുകയും ചെയ്തെന്നാണ് ഹർജിയിലെ ആരോപണം. സ്നാപ്ചാറ്റ് സംഭാഷണങ്ങളുടെ സ്ക്രീൻഷോട്ടുകളും പരാതിക്കൊപ്പം സമർപ്പിച്ചിട്ടുണ്ട്.
സർവകലാശാലാ അന്വേഷണത്തിനെതിരെ ആരോപണം
സംഭവത്തിന് മൂന്നാഴ്ചയ്ക്കുശേഷം യുവതി സർവകലാശാലയിൽ പരാതി നൽകി. തുടർന്ന് കോർണൽ സർവകലാശാല ആഭ്യന്തര അന്വേഷണം നടത്തിയെങ്കിലും ഏഴ് ആരോപണവിധേയരിൽ രണ്ടുപേരെ മാത്രമാണ് പുറത്താക്കിയതെന്നാണ് പരാതി.
മറ്റുള്ളവർക്ക് സസ്പെൻഷൻ ഉൾപ്പെടെയുള്ള ശിക്ഷകൾ മാത്രമാണ് നൽകിയതെന്നും ഹർജിയിൽ പറയുന്നു. സംഭവത്തിൽ ഇതുവരെ ആരെയും അറസ്റ്റ് ചെയ്തിട്ടില്ലെന്ന് യുവതിയുടെ അഭിഭാഷകൻ തോമസ് ഗിയൂഫ്ര പറഞ്ഞു.
പഠനം ഉപേക്ഷിക്കേണ്ടിവന്നെന്ന് പരാതി
ലൈംഗികാതിക്രമം തടയുന്നതിൽ പരാജയപ്പെട്ടെന്നും ആരോപണവിധേയരെ സംരക്ഷിച്ചെന്നും ചൂണ്ടിക്കാട്ടിയാണ് യുവതി കോർണൽ സർവകലാശാലക്കെതിരെ നഷ്ടപരിഹാരം ആവശ്യപ്പെട്ട് കേസ് നൽകിയിരിക്കുന്നത്.
സംഭവത്തെ തുടർന്നുണ്ടായ ഗുരുതരമായ മാനസിക ആഘാതം കാരണം പഠനം ഉപേക്ഷിക്കേണ്ടിവന്നെന്നും യുവതി പരാതിയിൽ പറയുന്നു.
സർവകലാശാലയുടെ പ്രതികരണം
സർവകലാശാലയുടെ സിവിൽ റൈറ്റ്സ് വിഭാഗം കൃത്യമായ അന്വേഷണം നടത്തിയതായി അധികൃതർ അറിയിച്ചു. കൂടാതെ, ചൈ ഫൈ ഫ്രറ്റേണിറ്റിയുടെ ക്യാംപസ് ചാപ്റ്ററിന് വിലക്ക് ഏർപ്പെടുത്തിയതായും സർവകലാശാല വ്യക്തമാക്കി.
വിദ്യാർഥികളുടെ സ്വകാര്യത സംരക്ഷിക്കുന്ന നിയമങ്ങൾ നിലനിൽക്കുന്നതിനാൽ അച്ചടക്ക നടപടികളുടെ കൂടുതൽ വിവരങ്ങൾ പുറത്തുവിടാനാകില്ലെന്നും അധികൃതർ പറഞ്ഞു. കേസിൽ കോടതിയിൽ നിയമപരമായ മറുപടി നൽകുമെന്നും സർവകലാശാല അറിയിച്ചു.
ചൈ ഫൈ ദേശീയ ആസ്ഥാനവും പ്രതികരിച്ചു
സംഭവത്തിൽ ചൈ ഫൈ ദേശീയ ആസ്ഥാനം കടുത്ത ആശങ്ക രേഖപ്പെടുത്തി. ലൈംഗികാതിക്രമവുമായി ബന്ധപ്പെട്ട പരാതികളെ ഗൗരവത്തോടെയാണ് കാണുന്നതെന്നും നിയമനടപടികളുമായി സഹകരിക്കുമെന്നും ദേശീയ നേതൃത്വം വ്യക്തമാക്കി.
English summary:A reinvestigation has begun into allegations that a former Cornell University student was drugged with ketamine and sexually assaulted by multiple members of the Chi Phi fraternity in 2024. The woman, who was 20 at the time, has filed a lawsuit against Cornell University and seven alleged perpetrators, accusing the university of failing to protect her and adequately address the incident. The lawsuit reportedly includes screenshots of Snapchat conversations. Cornell said its civil rights office conducted an investigation and that the fraternity’s campus chapter has been banned. The university said privacy laws prevent it from disclosing further disciplinary details and that it will respond in court. Chi Phi’s national headquarters said it takes sexual assault allegations seriously and will cooperate with legal proceedings.
