മലപ്പുറം ജില്ലയിലെ കൊണ്ടോട്ടിയിൽ നൂറുകണക്കിന് വാഹനങ്ങൾ ചീറിപ്പായുന്ന പ്രധാന റോഡിന് നടുവിൽ ഒരു പിഞ്ചുകുഞ്ഞ് ഇഴഞ്ഞെത്തിയ സംഭവം നാട്ടുകാരെയും യാത്രക്കാരെയും ഒരേപോലെ ഞെട്ടിച്ചു.
ശ്വാസമടക്കിപ്പിടിച്ചുമാത്രം കാണാൻ കഴിയുന്ന ഈ അപകടസാഹചര്യത്തിൽ നിന്ന് അതിവേഗത്തിലുള്ള ഇടപെടലിലൂടെ കുഞ്ഞിന്റെ ജീവൻ രക്ഷിച്ചത് ഒരു സ്വകാര്യ ബസിലെ ജീവനക്കാരാണ്. രാവിലെ എട്ടരയോടെ കൊണ്ടോട്ടി വലിയപറമ്പിൽ നിന്നും ഫറോക്കിലേക്ക് സർവീസ് നടത്തുകയായിരുന്ന ബസിലെ ഡ്രൈവറും കണ്ടക്ടറും കാണിച്ച അസാധാരണമായ ജാഗ്രതയാണ് ഒരു വലിയ ദുരന്തം ഒഴിവാക്കിയത്.
ബസ് കിണറുപടി എന്ന സ്ഥലത്ത് എത്തിയപ്പോഴാണ് ചാറ്റൽ മഴയത്ത് റോഡിന് നടുവിൽ ഒരു വയസ്സ് തികയാത്ത പെൺകുഞ്ഞ് ചിരിച്ചുകൊണ്ട് ഇരിക്കുന്നത് ജീവനക്കാരുടെ ശ്രദ്ധയിൽപ്പെട്ടത്.
ആ സമയത്ത് എതിരെ ഒരു സ്കൂട്ടർ വരുന്നുണ്ടായിരുന്നെങ്കിലും ബസ് ഡ്രൈവർ രാമചന്ദ്രൻ ഒട്ടും സമയം കളയാതെ വണ്ടി പെട്ടെന്ന് ബ്രേക്കിട്ട് നിർത്തുകയും മറ്റ് വാഹനങ്ങൾ വരുന്നത് തടയുകയും ചെയ്തു. തൊട്ടുപിന്നാലെ ബസിലെ കണ്ടക്ടറായ എം.എ. മുഹമ്മദ് നവാസ് പുറത്തേക്കോടി വന്ന് കുഞ്ഞിനെ നെഞ്ചോട് ചേർത്ത് വാരിയെടുക്കുകയായിരുന്നു.
റോഡിനോട് ചേർന്നുള്ള ഒരു വീട്ടിലെ കുഞ്ഞായിരുന്നു ഇത്. രാവിലെ വീട്ടുകാരുടെ കണ്ണ് തെറ്റിയ സമയത്ത് കുഞ്ഞ് മുട്ടിലിഴഞ്ഞ് ഗേറ്റിന് പുറത്തേക്ക് വരികയായിരുന്നു എന്നാണ് പിന്നീട് മനസിലാക്കാൻ സാധിച്ചത്.
More Read
തുടർന്ന് ബസ് ജീവനക്കാർ ചേർന്ന് കുഞ്ഞിനെ സുരക്ഷിതമായി വീട്ടുകാരെ ഏൽപ്പിച്ചു. വളരെ തിരക്കേറിയ ഒരു റോഡിൽ വൻ അപകടം വഴുതിമാറിയതിന്റെ ആശ്വാസത്തിലാണ് ഇപ്പോൾ കുഞ്ഞിന്റെ കുടുംബവും നാട്ടുകാരും. ബസ് ജീവനക്കാരുടെ ഈ കൃത്യസമയത്തുള്ള ഇടപെടലിനെ സമൂഹമാധ്യമങ്ങളിലടക്കം നിരവധി ആളുകൾ അഭിനന്ദിച്ചുകൊണ്ടിരിക്കുകയാണ്.
English Summary
In Kondotty, Malappuram, a private bus driver and conductor saved an infant who crawled onto a busy road from her house. Promptly stopping the bus and blocking traffic, conductor M.A. Muhammad Navas rescued the baby and safely returned her to her family, preventing a major tragedy.
More Read
