ആനവണ്ടി മുന്നിലുണ്ടെങ്കിൽ ഒരു ധൈര്യം; രണ്ടരലക്ഷം പേരുടെ സൗഹൃദക്കൂട്ടായ്മ

തിരുവനന്തപുരം: കേരളത്തിലെ നിരത്തുകളിൽ പലപ്പോഴും പഴി കേൾക്കേണ്ടിവരുന്നുണ്ടെങ്കിലും സംസ്ഥാനത്തിന് പുറത്തുപോയാൽ ആനവണ്ടിക്ക് മറ്റൊരു പരിവേഷമാണ്. അടിയന്തര ഘട്ടങ്ങളിൽ പോലും കേരളത്തിന് പുറത്തേക്ക് സേവനത്തിനെത്തിയ കെഎസ്ആർടിസി ബസുകൾ മലയാളികൾക്ക് നൽകുന്നത് ഒരു പ്രത്യേക ആത്മവിശ്വാസമാണ്. അതുകൊണ്ടുതന്നെ ആനവണ്ടിയോടുള്ള ഇഷ്ടം ഇന്ന് വലിയൊരു സൗഹൃദക്കൂട്ടായ്മയായി വളർന്നിരിക്കുന്നു.

ആനവണ്ടി പ്രണയത്തിന് തുടക്കം ഓർക്കൂട്ടിൽ

ഫേസ്ബുക്ക് ജനപ്രിയമാകുന്നതിന് മുമ്പ്, 2009ൽ ഓർക്കൂട്ടിലൂടെയാണ് ആനവണ്ടി ആരാധകരുടെ കൂട്ടായ്മ രൂപപ്പെടുന്നത്. ‘ആനവണ്ടി ഫാൻസ്’ എന്ന പേരിൽ തുടങ്ങിയ സൗഹൃദം പിന്നീട് ‘ഐ ലവ് മൈ കെഎസ്ആർടിസി’ എന്ന പേരിലേക്ക് മാറി.

കെഎസ്ആർടിസി ബസുകൾ സൗജന്യമായി വൃത്തിയാക്കുന്നതു മുതൽ യാത്രകൾ സംഘടിപ്പിക്കുന്നതുവരെ കൂട്ടായ്മയുടെ പ്രവർത്തനം വ്യാപിച്ചു. ബസുകൾക്ക് ആവശ്യമായ ബോർഡുകൾ നൽകുക, ബസ് നമ്പറും റൂട്ടും ഗ്രൂപ്പുകളിലൂടെ അറിയിക്കുക തുടങ്ങിയ സേവനങ്ങളും ഇവർ ഏറ്റെടുത്തു.

2011 ഡിസംബർ മുതലാണ് കൂട്ടായ്മ സമൂഹമാധ്യമത്തിലെ സൗഹൃദത്തിൽനിന്ന് പുറത്തേക്കിറങ്ങി നേരിട്ടുള്ള പ്രവർത്തനങ്ങളിലേക്ക് കടന്നത്.

ആദ്യ യാത്ര ഗവിയിലേക്ക്

കൂട്ടായ്മയിലെ അംഗങ്ങൾക്ക് പരസ്പരം നേരിൽ കാണാനും ആനവണ്ടിയോടുള്ള സ്നേഹം പങ്കിടാനും വേണ്ടിയാണ് ആദ്യ യാത്ര സംഘടിപ്പിച്ചത്. മലയാളികളുടെ പ്രിയപ്പെട്ട വിനോദസഞ്ചാര കേന്ദ്രമായ ഗവിയിലേക്കായിരുന്നു ആദ്യ ട്രിപ്പ്.

പത്തനംതിട്ടയിൽനിന്ന് രാവിലെ 6.30ന് പുറപ്പെട്ട് ഗവി വഴി കുമളിയിലേക്ക് പോകുന്ന കെഎസ്ആർടിസിയുടെ കുട്ടി ബസിലായിരുന്നു യാത്ര. യാത്രയുടെ ചിത്രങ്ങളും വിശേഷങ്ങളും സമൂഹമാധ്യമങ്ങളിൽ പങ്കുവച്ചതോടെ കൂടുതൽ പേരും കൂട്ടായ്മയിലേക്ക് എത്തി.

മാസങ്ങൾക്കകം അടുത്ത യാത്രയും ആസൂത്രണം ചെയ്തു. കേരളത്തിലെ വിവിധ ഡിപ്പോകളിൽനിന്ന് ബസുകൾ എത്തി സ്പെഷ്യൽ സർവീസ് നടത്തുന്ന പമ്പയിലേക്കായിരുന്നു അടുത്ത കൂട്ടായ്മ യാത്ര.

പമ്പയിലെത്തണം; അതാണ് ആനവണ്ടി പ്രണയം

തിരുവനന്തപുരം മുതൽ കാസർകോട് വരെയുള്ള ജില്ലകളിലും കേരളത്തിന് പുറത്തും ജോലി ചെയ്യുകയും പഠിക്കുകയും ചെയ്യുന്ന നിരവധി യുവാക്കളാണ് പിന്നീട് കൂട്ടായ്മയുടെ ഭാഗമായത്.

‘ഒരു മലയാളി മലയാളിയാകണമെങ്കിൽ ഒരിക്കലെങ്കിലും കെഎസ്ആർടിസി ബസിൽ യാത്ര ചെയ്യണം’ എന്ന സിനിമാ സംഭാഷണത്തിന്റെ അതേ ആവേശത്തിലാണ് കൂട്ടായ്മയിലെ അംഗങ്ങൾ ആനവണ്ടിയെ കാണുന്നത്. സീസൺ സമയത്ത് ഒരിക്കലെങ്കിലും പമ്പ ബസ് സ്റ്റാൻഡിലെത്തണമെന്നത് ഇവരുടെ സ്വന്തം ആഗ്രഹവുമാണ്.

യാത്ര മാത്രമല്ല; പൊതുഗതാഗതത്തിനായും ശബ്ദം

റോഡ് വഴിയുള്ള പൊതുഗതാഗതം കേരളത്തിൽ കൂടുതൽ ശക്തിപ്പെടുത്തണമെന്ന ആവശ്യം ഉയർന്നതോടെ സൊസൈറ്റി ഫോർ പ്രൊമോഷൻ ഓഫ് റോഡ് ട്രാൻസ്പോർട്ട് (സ്‌പോർട്ട്) എന്ന സംഘടനയും രൂപീകരിച്ചു.

പുതിയ റൂട്ടുകൾ, പുതിയ ബസ് സർവീസുകൾ തുടങ്ങിയ ജനങ്ങളുടെ ആവശ്യങ്ങൾ കെഎസ്ആർടിസിക്ക് നിവേദനങ്ങളായി സമർപ്പിക്കുന്നതും സംഘടനയുടെ പ്രവർത്തനത്തിന്റെ ഭാഗമായി.

ബസ് നമ്പറും സമയവും വരെ വിരൽത്തുമ്പിൽ

പിന്നീടുള്ള വർഷങ്ങളിൽ മലബാറിലെ വിവിധ ഡിപ്പോകളിലേക്കും കണ്ണൂരിലെ ബാവലിയിലേക്കുമെല്ലാം കൂട്ടായ്മ യാത്രകൾ സംഘടിപ്പിച്ചു.

ഗവി ബസ് മാത്രമല്ല, മണ്ണാർക്കാട്–സൈലന്റ് വാലി–മേട്ടുപ്പാളയം സർവീസ്, ആനക്കട്ടി ബസ് സർവീസ് തുടങ്ങി കേരളത്തിലെ വിവിധ റൂട്ടുകളെക്കുറിച്ചുള്ള വിവരങ്ങൾ അംഗങ്ങൾക്ക് ലഭ്യമാണ്.

ഏത് റൂട്ടിലെ ബസ്, ബസ് നമ്പർ, ഓരോ പോയിന്റിലും എത്തുന്ന സമയം തുടങ്ങിയ വിവരങ്ങൾ ആവശ്യപ്പെടുന്നവർക്ക് നിമിഷങ്ങൾക്കകം നൽകാൻ കഴിയുന്ന തരത്തിലാണ് കൂട്ടായ്മയുടെ പ്രവർത്തനം.

രണ്ടരലക്ഷത്തോളം അംഗങ്ങൾ

ഓർക്കൂട്ടിൽ ചെറിയൊരു സൗഹൃദ കൂട്ടായ്മയായി ആരംഭിച്ച ‘ഐ ലവ് മൈ കെഎസ്ആർടിസി’ ഇന്ന് വലിയൊരു സമൂഹമാധ്യമ കൂട്ടായ്മയായി മാറിയിരിക്കുന്നു.

നിലവിൽ ഫേസ്ബുക്ക് ഗ്രൂപ്പിൽ രണ്ടരലക്ഷത്തോളം അംഗങ്ങളുണ്ട്. ഒരു പൊതുഗതാഗത സംവിധാനത്തോടുള്ള ഇഷ്ടം എങ്ങനെ സൗഹൃദമായും സേവനമായും പിന്നീട് ഒരു വലിയ കൂട്ടായ്മയായും മാറാമെന്നതിന് ആനവണ്ടി ആരാധകരുടെ ഈ യാത്ര ഒരു വേറിട്ട ഉദാഹരണമാണ്.

English Summary

The love for Kerala’s iconic KSRTC “Aanavandi” buses has grown into a large community of enthusiasts. The group began on Orkut in 2009 as “Aanavandi Fans” and later became “I Love My KSRTC.” Members have organized trips, cleaned KSRTC buses, provided route boards and shared bus numbers and timings. The community later expanded its activities to promote better road transport and submit route and service suggestions to KSRTC. The Facebook group currently has around 250,000 members.