ഗ്യാസ് ക്ഷാമം കുറഞ്ഞു, പക്ഷേ വില കുറഞ്ഞില്ല;  ഹോട്ടൽ ഭക്ഷണവില പൊള്ളുന്നു

കോഴിക്കോട്: ഗ്യാസ് ക്ഷാമത്തിന്റെ പേരിൽ ഉയർത്തിയ ഹോട്ടൽ ഭക്ഷണവില ക്ഷാമം കുറഞ്ഞിട്ടും താഴാത്തത് ഉപഭോക്താക്കളെ വലയ്ക്കുന്നു. വാണിജ്യ പാചകവാതക സിലിണ്ടറുകൾ ലഭിച്ചുതുടങ്ങിയിട്ടും ചായയ്ക്കും പലഹാരങ്ങൾക്കും ഊണിനും പഴയതിലും ഉയർന്ന നിരക്കാണ് പല ഹോട്ടലുകളിലും ഈടാക്കുന്നത്.

ഹോട്ടൽ ഭക്ഷണവില നിരീക്ഷിക്കുമെന്ന ഉറപ്പും പാഴായി

ഹോട്ടലുകളിൽ അമിതവില ഈടാക്കുന്ന സ്ഥാപനങ്ങളെ നിരീക്ഷിക്കുമെന്ന് കോർപ്പറേഷൻ കൗൺസിൽ യോഗത്തിൽ മേയർ വ്യക്തമാക്കിയിരുന്നു. എന്നാൽ കാര്യമായ പരിശോധനകളോ നടപടികളോ ഉണ്ടായിട്ടില്ലെന്നാണ് പരാതി.

പലയിടത്തും ചായയ്ക്ക് ഇപ്പോഴും 15 മുതൽ 20 രൂപ വരെയാണ് ഈടാക്കുന്നത്. എണ്ണക്കടികൾക്ക് 15 രൂപയും നൽകണം. നേരത്തെ 12 രൂപയുണ്ടായിരുന്ന ചായയുടെ വിലയാണ് ഗ്യാസ് ക്ഷാമകാലത്ത് 15 രൂപയിലേക്ക് ഉയർന്നത്.

ഗ്യാസ് ക്ഷാമത്തിൽ കുത്തനെ ഉയർന്ന നിരക്ക്

വാണിജ്യ പാചകവാതക സിലിണ്ടറുകളുടെ ലഭ്യത കുറഞ്ഞതോടെയാണ് ഹോട്ടൽ ഭക്ഷണങ്ങളുടെ വില കുത്തനെ ഉയർന്നത്. സിലിണ്ടർ ലഭിക്കാതെ വന്നപ്പോൾ കരിഞ്ചന്തയിൽ ഏകദേശം 5000 രൂപ വരെ നൽകിയാണ് പല വ്യാപാരികളും സിലിണ്ടർ വാങ്ങിയത്.

പാചകച്ചെലവ് വർധിച്ചതോടെ ചായ, പലഹാരങ്ങൾ, പൊറോട്ട, ചപ്പാത്തി, ഊണ്, ബിരിയാണി തുടങ്ങിയവയ്ക്കെല്ലാം നിരക്ക് കൂട്ടി. എന്നാൽ ഇപ്പോൾ ഗ്യാസ് ലഭ്യത മെച്ചപ്പെട്ടിട്ടും പല ഹോട്ടലുകളും വില കുറച്ചിട്ടില്ല.

60 രൂപയുടെ ഊണിന് ഇപ്പോൾ 80 രൂപ

ഓരോ ഹോട്ടലിലും ഭക്ഷണത്തിന് വ്യത്യസ്ത നിരക്കാണ്. 120 രൂപയ്ക്ക് ലഭിച്ചിരുന്ന വെജിറ്റേറിയൻ സദ്യയുടെ വില ഇപ്പോൾ 140 രൂപയായതായി ഉപഭോക്താക്കൾ പറയുന്നു.

അതേസമയം, 60 രൂപയ്ക്ക് ലഭിച്ചിരുന്ന സാധാരണ ഊണിന് ഇപ്പോൾ 80 രൂപ നൽകണം. ബിരിയാണി, മന്തി തുടങ്ങിയ വിഭവങ്ങൾക്കും ഹോട്ടലുകൾക്കനുസരിച്ച് വലിയ നിരക്ക് വ്യത്യാസമുണ്ട്.

മാസച്ചെലവിൽ ആയിരങ്ങളുടെ വർധന

ഹോട്ടൽ ഭക്ഷണത്തെ സ്ഥിരമായി ആശ്രയിക്കുന്നവരുടെ പ്രതിമാസ ചെലവും ഇതോടെ ഉയർന്നു. ഹോസ്റ്റലുകളിലും മറ്റ് താമസസ്ഥലങ്ങളിലും ഭക്ഷണം പാകം ചെയ്യാൻ സൗകര്യമില്ലാത്തവർക്ക് പുറത്തുനിന്നുള്ള ഭക്ഷണമാണ് പ്രധാന ആശ്രയം.

നേരത്തെ ഭക്ഷണത്തിനായി മാസം ഏകദേശം 3000 രൂപ ചെലവഴിച്ചിരുന്നവർ ഇപ്പോൾ 4000 മുതൽ 5000 രൂപ വരെ മുടക്കേണ്ടിവരുന്നതായി പറയുന്നു.

വില കുറയ്ക്കാനാകില്ലെന്ന് വ്യാപാരികൾ

ഭക്ഷണവില കുറയ്ക്കാൻ കഴിയാത്ത സാഹചര്യമാണ് നിലവിലുള്ളതെന്നാണ് ഹോട്ടൽ വ്യാപാരികളുടെ വിശദീകരണം. ഗ്യാസ് വിലയ്ക്കു പുറമെ ഭക്ഷണം തയ്യാറാക്കാൻ ആവശ്യമായ മറ്റ് സാധനങ്ങൾക്കും വലിയ തോതിൽ വില വർധിച്ചിട്ടുണ്ടെന്നാണ് വ്യാപാരികൾ പറയുന്നത്.

പാൽ, മുട്ട, ഇറച്ചി, പഞ്ചസാര തുടങ്ങിയവയുടെ വില ഉയർന്നതിനൊപ്പം പാക്കിങ് സാധനങ്ങൾക്കും പ്ലാസ്റ്റിക് കവറുകൾക്കും വില വർധിച്ചിട്ടുണ്ട്. അതിനാൽ ചെലവിനനുസരിച്ചുള്ള വിലവർധന മാത്രമാണ് ഉണ്ടായതെന്നാണ് വ്യാപാരികളുടെ വാദം.

അമിതവില ഈടാക്കുന്ന സ്ഥാപനങ്ങൾ പരിശോധിക്കും

ജനങ്ങൾക്ക് ബുദ്ധിമുട്ടുണ്ടാക്കുന്ന തരത്തിൽ വില വർധിപ്പിക്കുന്ന സ്ഥാപനങ്ങൾ ശ്രദ്ധയിൽപ്പെട്ടാൽ പരിശോധിക്കുമെന്ന് കോർപ്പറേഷൻ അധികൃതർ വ്യക്തമാക്കി.

അതേസമയം, സാധനങ്ങളുടെ വില വർധന കണക്കിലെടുത്താൽ ഹോട്ടൽ ഭക്ഷണത്തിൽ വന്ന വിലവർധന പോലും പര്യാപ്തമല്ലെന്നാണ് വ്യാപാരികളുടെ നിലപാട്. ഇതോടെ ഗ്യാസ് ക്ഷാമം കുറഞ്ഞിട്ടും ഭക്ഷണവില കുറയാത്തതിനെച്ചൊല്ലിയുള്ള ഉപഭോക്താക്കളുടെ പ്രതിഷേധം ശക്തമാകുകയാണ്.

English Summary

Hotel food prices in Kozhikode have remained high despite an improvement in the availability of commercial LPG cylinders. Tea, snacks, meals, biryani and other dishes continue to be sold at increased prices in several hotels. A meal that previously cost around ₹60 is now priced at ₹80, while some tea prices have risen to ₹15–20. Regular hotel customers say their monthly food expenses have increased from around ₹3,000 to ₹4,000–5,000. Hotel owners cite higher prices of LPG, milk, eggs, meat, sugar and packaging materials as reasons for retaining the higher rates.