തൃശൂർ: ചാവക്കാട് താലൂക്ക് ആശുപത്രിയിൽ നടത്തിയ പ്രസവ ശസ്ത്രക്രിയയ്ക്കിടെ വയറ്റിൽ പഞ്ഞി മറന്നുവെച്ചെന്ന പരാതിയുമായി യുവതി. മുന്നക്കകടവ് സ്വദേശിനി ഫാത്തിമത് ഷർഫിയയാണ് ആശുപത്രിക്കെതിരെ ആരോപണവുമായി രംഗത്തെത്തിയത്. ശസ്ത്രക്രിയയ്ക്കുശേഷം കടുത്ത വേദന അനുഭവപ്പെട്ടിട്ടും കൃത്യമായ പരിശോധന നടത്താതെ പലതവണ മടക്കി അയച്ചെന്നാണ് യുവതിയുടെ പരാതി.
ശസ്ത്രക്രിയ കഴിഞ്ഞ് 43-ാം ദിവസം പഞ്ഞി പുറത്തെടുത്തു
ഓഗസ്റ്റ് 18നാണ് ഫാത്തിമത് ഷർഫിയയുടെ പ്രസവ ശസ്ത്രക്രിയ നടന്നത്. തുടർന്ന് തുടർച്ചയായി കടുത്ത വേദന അനുഭവപ്പെട്ടതോടെ മൂന്ന് തവണ ആശുപത്രിയിൽ ചികിത്സ തേടി.
എന്നാൽ മതിയായ പരിശോധന നടത്താതെ മടക്കി അയച്ചെന്നാണ് യുവതി ആരോപിക്കുന്നത്. പിന്നീട് നടത്തിയ സ്കാനിങ്ങിലാണ് വയറ്റിൽ പഞ്ഞി അവശേഷിക്കുന്നതായി കണ്ടെത്തിയത്. തുടർന്ന് ശസ്ത്രക്രിയയിലൂടെ പഞ്ഞി പുറത്തെടുത്തു.
പ്രസവ ശസ്ത്രക്രിയ കഴിഞ്ഞ് 43-ാം ദിവസമാണ് പഞ്ഞി പുറത്തെടുത്തതെന്നും ഫാത്തിമത് ഷർഫിയ പറയുന്നു.
More Read
ആശുപത്രി അധികൃതർക്ക് പരാതി നൽകി
സംഭവത്തെക്കുറിച്ച് താലൂക്ക് ആശുപത്രി സൂപ്രണ്ട് ഡോ. ഷാജ് കുമാറിനും പ്രസവ ശസ്ത്രക്രിയ നടത്തിയ ഗൈനക്കോളജിസ്റ്റ് ഡോ. ടിറ്റോയ്ക്കും പരാതി നൽകിയതായി യുവതി പറഞ്ഞു.
എന്നാൽ നഴ്സുമാരുടെ ഭാഗത്തുനിന്നുണ്ടായ പിഴവാണെന്ന് പറഞ്ഞ് അധികൃതർ ഉത്തരവാദിത്വത്തിൽനിന്ന് ഒഴിഞ്ഞുമാറിയെന്നാണ് ഫാത്തിമത് ഷർഫിയയുടെ ആരോപണം.
സംഭവം പുറത്തറിയരുതെന്ന് പറഞ്ഞതായി ആരോപണം
സംഭവം പുറത്തറിയരുതെന്ന് ആവശ്യപ്പെട്ട് ആശുപത്രി അധികൃതർ തന്നെ തിരിച്ചയച്ചെന്നും പിന്നീട് ആരും അന്വേഷിച്ചില്ലെന്നും യുവതി ആരോപിക്കുന്നു.
അതേസമയം, സംഭവത്തിൽ ആശുപത്രി അധികൃതരുടെ ഔദ്യോഗിക വിശദീകരണം ലഭ്യമായിട്ടില്ല. ചികിത്സാ പിഴവ് സംബന്ധിച്ച ആരോപണങ്ങളിൽ ഔദ്യോഗിക അന്വേഷണം നടന്നിട്ടുണ്ടോ എന്നതും വ്യക്തമല്ല.
English Summary: A woman from Munnakkakadavu has alleged that cotton was left inside her abdomen during a childbirth surgery at Chavakkad Taluk Hospital on August 18. She says it was detected through a scan and removed through another surgery on the 43rd day after delivery.
