തലശേരി: മാഹിയിൽ നിന്ന് നികുതി വെട്ടിച്ച് കേരളത്തിലേക്ക് കടത്തുകയായിരുന്ന 12,000 ലിറ്റർ ഡീസൽ തലശേരിയിൽ പൊലീസ് പിടികൂടി. ഡീസൽ കടത്താൻ ഉപയോഗിച്ച ടാങ്കർ ലോറിയും കസ്റ്റഡിയിലെടുത്തു. സംഭവവുമായി ബന്ധപ്പെട്ട് വടകര ചോറാട് സ്വദേശികളായ സഹോദരങ്ങൾ ഷിജീഷ്, വിജീഷ് എന്നിവരെ പൊലീസ് കസ്റ്റഡിയിലെടുത്തു.
പ്രത്യേക അന്വേഷണ സംഘത്തിന്റെ പരിശോധന
തലശേരി എ.എസ്.പി ഡോ. നന്ദഗോപന്റെ നേതൃത്വത്തിലുള്ള പ്രത്യേക അന്വേഷണ സംഘവും തലശേരി പൊലീസും ചേർന്ന് കുട്ടിമാക്കൂലിൽ നടത്തിയ പരിശോധനയിലാണ് ഡീസൽ കടത്ത് കണ്ടെത്തിയത്.
കേരളത്തേക്കാൾ ലിറ്ററിന് ഏകദേശം 12 രൂപ വിലക്കുറവിൽ മാഹിയിൽ ഡീസൽ ലഭിക്കുന്ന സാഹചര്യം മുതലെടുത്താണ് കടത്ത് നടക്കുന്നതെന്നാണ് പൊലീസിന് ലഭിച്ച വിവരം. മാഹിയിൽ നിന്ന് ഇന്ധനം ശേഖരിച്ച് കേരളത്തിൽ വിൽക്കുന്ന സംഘങ്ങൾ സജീവമാണെന്നും പൊലീസ് സംശയിക്കുന്നു.
ക്വാറികളും വാഹനങ്ങളും ലക്ഷ്യമിട്ട് കടത്ത്
കേരളത്തിലെ ക്വാറികൾ, വാഹനങ്ങൾ, മത്സ്യബന്ധന ബോട്ടുകൾ, യന്ത്രവത്കൃത യാനങ്ങൾ എന്നിവയ്ക്കായി ഇത്തരത്തിൽ ഡീസൽ എത്തിക്കുന്നതായിരിക്കാം സംഘത്തിന്റെ ലക്ഷ്യമെന്നാണ് പ്രാഥമിക നിഗമനം.
പിടികൂടിയ ഡീസൽ മാഹിയിലെ പമ്പിലേക്ക് കൊണ്ടുപോകേണ്ടതായിരുന്നോ, അതോ പമ്പിൽ നിന്ന് ടാങ്കറിൽ നിറച്ച് കേരളത്തിലേക്ക് കടത്തിയതാണോ എന്നതടക്കമുള്ള കാര്യങ്ങൾ പൊലീസ് പരിശോധിച്ചുവരികയാണ്.
ഉറവിടവും വിതരണ ശൃംഖലയും പരിശോധിക്കുന്നു
ഡീസലിന്റെ ഉറവിടം കണ്ടെത്തുന്നതിനും കടത്തിന് പിന്നിലുള്ള വിതരണ ശൃംഖല പുറത്തുകൊണ്ടുവരുന്നതിനും അന്വേഷണം ഊർജിതമാക്കിയിട്ടുണ്ട്. ഇതിന്റെ ഭാഗമായി മാഹി പൊലീസിന്റെയും ഇന്ധന കമ്പനികളുടെയും സഹായം തേടാനും അന്വേഷണ സംഘം തീരുമാനിച്ചിട്ടുണ്ട്.
English Summary: Police seized 12,000 litres of diesel and a tanker lorry in Thalassery over suspected fuel smuggling from Mahe. Two brothers from Chorode, Vadakara, were taken into custody.
