തിരുവനന്തപുരം: കേരളത്തിലെ ഏഴ് ജില്ലകളിൽ അടുത്ത മൂന്ന് മണിക്കൂറിനുള്ളിൽ ഒറ്റപ്പെട്ടയിടങ്ങളിൽ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട് ജില്ലകളിലാണ് മഴ മുന്നറിയിപ്പ്.
അതേസമയം, നവംബർ 11 മുതൽ 13 വരെ സംസ്ഥാനത്ത് ഇടിമിന്നലോടു കൂടിയ മഴയ്ക്കും സാധ്യതയുണ്ടെന്ന് കാലാവസ്ഥ വകുപ്പ് അറിയിച്ചു. ഈ സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്നും നിർദേശമുണ്ട്.
ഇടിമിന്നൽ അപകടകാരി; മുൻകരുതൽ നേരത്തേ സ്വീകരിക്കണം
മനുഷ്യരുടെയും മൃഗങ്ങളുടെയും ജീവന് ഭീഷണിയാകുന്നതാണ് ഇടിമിന്നൽ. വൈദ്യുതി, ആശയവിനിമയ ശൃംഖലകൾക്കും വൈദ്യുത ചാലകങ്ങളുമായി ബന്ധിപ്പിച്ചിട്ടുള്ള വീട്ടുപകരണങ്ങൾക്കും മിന്നൽ വലിയ നാശനഷ്ടങ്ങൾ ഉണ്ടാക്കാം.
കാർമേഘങ്ങൾ കണ്ടുതുടങ്ങുന്ന സമയം മുതൽ തന്നെ സുരക്ഷാ മുൻകരുതലുകൾ സ്വീകരിക്കണം. ഇടിമിന്നൽ എല്ലായ്പ്പോഴും ദൃശ്യമാകണമെന്നില്ല. അതിനാൽ മിന്നൽ കാണുന്നില്ലെന്ന കാരണത്താൽ ജാഗ്രത ഒഴിവാക്കരുത്.
More Read
മിന്നലിന്റെ ലക്ഷണം കണ്ടാൽ കെട്ടിടത്തിനുള്ളിലേക്ക് മാറണം
മിന്നലിന്റെ ആദ്യ ലക്ഷണം കണ്ടാലുടൻ സുരക്ഷിതമായ കെട്ടിടത്തിനുള്ളിലേക്ക് മാറണം. തുറസായ സ്ഥലങ്ങളിൽ തുടരുന്നത് മിന്നലേൽക്കാനുള്ള സാധ്യത വർധിപ്പിക്കും.
ശക്തമായ കാറ്റിനും ഇടിമിന്നലിനും സാധ്യതയുള്ളപ്പോൾ ജനലുകളും വാതിലുകളും അടച്ചിടണം. ഇവയുടെ സമീപത്ത് നിൽക്കരുത്. കെട്ടിടത്തിനുള്ളിൽ തന്നെ തുടരുകയും ഭിത്തിയിലും തറയിലും നേരിട്ട് സ്പർശിക്കുന്നത് പരമാവധി ഒഴിവാക്കുകയും വേണം.
More Read
വൈദ്യുതോപകരണങ്ങളും ടെലിഫോൺ ഉപയോഗവും ഒഴിവാക്കണം
ഇടിമിന്നൽ സമയത്ത് ഗൃഹോപകരണങ്ങളുടെ വൈദ്യുതിബന്ധം വിച്ഛേദിക്കണം. വൈദ്യുതോപകരണങ്ങളുമായുള്ള സമ്പർക്കവും സാമീപ്യവും ഒഴിവാക്കണം. ടെലിഫോൺ ഉപയോഗിക്കുന്നതും ഒഴിവാക്കണമെന്ന് കാലാവസ്ഥ വകുപ്പ് നിർദേശിക്കുന്നു. എന്നാൽ മൊബൈൽ ഫോൺ ഉപയോഗിക്കുന്നതിൽ പ്രശ്നമില്ലെന്നും മുന്നറിയിപ്പിൽ വ്യക്തമാക്കുന്നു.
അന്തരീക്ഷം മേഘാവൃതമായിരിക്കുമ്പോൾ കുട്ടികൾ ഉൾപ്പെടെയുള്ളവർ തുറസായ സ്ഥലങ്ങളിലും ടെറസുകളിലും കളിക്കുന്നത് ഒഴിവാക്കണം. കാലാവസ്ഥാ മുന്നറിയിപ്പുകൾ ശ്രദ്ധിക്കുകയും ആവശ്യമായ മുൻകരുതലുകൾ സ്വീകരിക്കുകയും ചെയ്യണം.
English Summary: The India Meteorological Department has forecast isolated rain in seven Kerala districts over the next three hours. Thunderstorms are also likely across the state from November 11 to 13. Residents are advised to take precautions against lightning and avoid open areas during thunderstorms.
