ട്രെയിനിൽ വെള്ളമില്ല; യാത്ര പാതിവഴിയിൽ ഉപേക്ഷിച്ച 24 അംഗ കുടുംബത്തിന് ₹16,000 നഷ്ടപരിഹാരം

ന്യൂഡൽഹി: ട്രെയിനിലെ ശുചിമുറികളിൽ വെള്ളമില്ലാത്തതിനെ തുടർന്ന് യാത്ര പാതിവഴിയിൽ ഉപേക്ഷിക്കേണ്ടിവന്ന 24 അംഗ കുടുംബത്തിന് ₹16,000 നഷ്ടപരിഹാരം നൽകാൻ സൗത്ത് വെസ്റ്റേൺ റെയിൽവേയ്ക്ക് കർണാടക ജില്ലാ ഉപഭോക്തൃ കോടതി ഉത്തരവിട്ടു.

 റെയിൽവേയുടെ സേവനത്തിൽ വീഴ്ചയുണ്ടായെന്ന് കണ്ടെത്തിയ കോടതി, ടിക്കറ്റ് തുക തിരികെ നൽകുന്നതിനൊപ്പം നഷ്ടപരിഹാരവും കോടതി ചെലവും നൽകാനും നിർദേശിച്ചു.

സേവനവീഴ്ചയ്ക്ക് ₹16,000 നൽകണം

ഒക്ടോബർ 17ന് പുറപ്പെടുവിച്ച ഉത്തരവിൽ ടിക്കറ്റ് തുകയായ ₹1,000 തിരികെ നൽകാനും ₹10,000 നഷ്ടപരിഹാരമായും ₹5,000 കോടതി ചെലവായും നൽകാനാണ് കമീഷൻ നിർദേശിച്ചത്.

ശിവമൊഗ സ്വദേശിയായ ടി. നാഗേന്ദ്രയും കുടുംബവുമാണ് റെയിൽവേയ്ക്കെതിരെ ഉപഭോക്തൃ കമീഷനെ സമീപിച്ചത്.

 ട്രെയിനിലെ ശുചിമുറികളിൽ വെള്ളമില്ലാത്തത് യാത്രക്കാർക്ക് വലിയ ബുദ്ധിമുട്ടുണ്ടാക്കിയെന്നാണ് പരാതി.

തിരുപ്പതി ദർശനത്തിന് പോയ 24 അംഗ സംഘം

നാല് കുട്ടികളും 20 മുതിർന്നവരും ഉൾപ്പെടുന്ന 24 അംഗ കുടുംബം തിരുപ്പതി-തിരുമല ക്ഷേത്രദർശനത്തിനായി പോയതായിരുന്നു. 

ബംഗളൂരുവിലെ യശ്വന്ത്പൂർ റെയിൽവേ സ്റ്റേഷനിൽനിന്ന് ശിവമൊഗയിലേക്ക് പോകാൻ സെക്കൻഡ് ക്ലാസ് ടിക്കറ്റുകളെടുത്താണ് സംഘം ട്രെയിനിൽ കയറിയത്. ടിക്കറ്റ് തുക ആകെ ₹1,000 ആയിരുന്നു.

യശ്വന്ത്പൂരിൽനിന്ന് തുമകൂരിലേക്കുള്ള യാത്രയ്ക്കിടെയാണ് കോച്ചിലെ ടോയ്‌ലറ്റുകളിൽ വെള്ളമില്ലെന്ന് കുടുംബം തിരിച്ചറിഞ്ഞത്. 

വെള്ളമില്ലാത്തതിനാൽ സ്ത്രീകൾക്കും കുട്ടികൾക്കും പ്രാഥമിക ആവശ്യങ്ങൾ നിറവേറ്റാൻ കഴിയാത്ത സാഹചര്യമുണ്ടായെന്നാണ് പരാതിയിൽ പറയുന്നത്.

പരാതി നൽകിയിട്ടും പരിഹാരമില്ലെന്ന് ആരോപണം

നാഗേന്ദ്ര ട്രെയിനിലുണ്ടായിരുന്ന റെയിൽവേ പൊലീസിനോട് പരാതി പറഞ്ഞെങ്കിലും പരിഹാരമുണ്ടായില്ലെന്നാണ് റിപ്പോർട്ട്.

 പകരം തുമകൂർ സ്റ്റേഷനിൽ ഇറങ്ങി സ്റ്റേഷൻ മാസ്റ്ററെ സമീപിക്കാനാണ് പൊലീസ് നിർദേശിച്ചതെന്നും പരാതിയിൽ പറയുന്നു.

തുമകൂരിൽ ഇറങ്ങിയ കുടുംബം ₹1,760 ചെലവഴിച്ച് പുതിയ ടിക്കറ്റുകൾ വാങ്ങി മറ്റൊരു എക്സ്പ്രസ് ട്രെയിനിൽ യാത്ര തുടർന്നു.

രേഖകൾ പരിശോധിച്ചാണ് ഉപഭോക്തൃ കോടതിയുടെ ഉത്തരവ്

പ്രസിഡന്റ് ടി. ശിവണ്ണയും അംഗം ബി.ഡി. യോഗാനന്ദയും ഉൾപ്പെട്ട ബെഞ്ച് റെയിൽവേ ടിക്കറ്റുകൾ, തുമകൂർ സ്റ്റേഷനിൽ നൽകിയ രേഖാമൂലമുള്ള പരാതി, പരാതിക്കാരൻ സമർപ്പിച്ച മറ്റ് രേഖകൾ എന്നിവ പരിശോധിച്ചു.

തുടർന്നാണ് സൗത്ത് വെസ്റ്റേൺ റെയിൽവേയുടെ സേവനത്തിൽ വീഴ്ചയുണ്ടായതായി കമീഷൻ കണ്ടെത്തിയത്. 

യാത്രക്കാർക്ക് ഉണ്ടായ ബുദ്ധിമുട്ടുകൾ പരിഗണിച്ചാണ് ടിക്കറ്റ് തുക മടക്കിനൽകാനും നഷ്ടപരിഹാരവും കോടതി ചെലവും നൽകാനും ഉത്തരവിട്ടത്.

English Summary:

A Karnataka District Consumer Commission has directed South Western Railway to pay ₹16,000 to a 24-member family after finding a service deficiency. The family, including four children and 20 adults, was travelling from Bengaluru’s Yesvantpur station to Shivamogga when they discovered that the train’s toilets had no water. Unable to meet basic needs, they got off at Tumakuru and bought fresh tickets for another express train. The commission ordered a refund of ₹1,000, ₹10,000 in compensation and ₹5,000 towards litigation costs.