പിഎസ്‌സി നിയമനം വൈകുന്നു; സെക്രട്ടേറിയറ്റിന് മുന്നിൽ തല മുണ്ഡനം ചെയ്ത് വളർമതി

തിരുവനന്തപുരം: പിഎസ്‌സി നിയമനം വൈകുന്നതിൽ പ്രതിഷേധിച്ച് സെക്രട്ടേറിയറ്റിന് മുന്നിൽ തല മുണ്ഡനം ചെയ്ത് എൽപിഎസ്ടി റാങ്ക് ലിസ്റ്റ് സമരസമിതി കൺവീനർ വളർമതി.

സമരം 113 ദിവസം പിന്നിട്ടിട്ടും ഉദ്യോഗാർഥികളുടെ ആവശ്യം പരിഗണിക്കാത്തതിനെതിരെ രൂക്ഷ വിമർശനവുമായി രംഗത്തെത്തിയ വളർമതി, മരണംവരെ സമരം തുടരുമെന്ന് വ്യക്തമാക്കി. ഉടൻ അനിശ്ചിതകാല സമരം ആരംഭിക്കാനാണ് സമരസമിതിയുടെ തീരുമാനം.

‘മരിക്കുംവരെ സമരം കിടക്കും’

ഉദ്യോഗാർഥികളെ അവഗണിച്ച് പണം നൽകുന്നവരെ മാത്രം സർക്കാർ പരിഗണിക്കുകയാണെന്ന് വളർമതി ആരോപിച്ചു.

‘കൃത്യമായ കോഴ സർക്കാരിന് കിട്ടുന്നുണ്ടാകും. അതുകൊണ്ടായിരിക്കാം ഉദ്യോഗാർഥികളെ പരിഗണിക്കാതെ പണം കൊടുക്കുന്ന ആളുകളെ മാത്രം ഗൗനിക്കുന്നത്. മരിക്കുംവരെ സമരം കിടക്കും’ – വളർമതി പറഞ്ഞു.

സമരം തുടങ്ങി 113 ദിവസം പിന്നിട്ടിട്ടും പ്രശ്നത്തിന് പരിഹാരമുണ്ടായിട്ടില്ലെന്നാണ് സമരസമിതിയുടെ നിലപാട്. ഇതിന്റെ ഭാഗമായി അനിശ്ചിതകാല സമരത്തിലേക്ക് കടക്കാനാണ് തീരുമാനമെന്നും വളർമതി വ്യക്തമാക്കി.

മുഖ്യമന്ത്രിയെ കാണാൻ ശ്രമിച്ചെങ്കിലും സാധിച്ചില്ല

മുഖ്യമന്ത്രിയെ നേരിൽ കണ്ട് വിഷയം അവതരിപ്പിക്കാൻ ശ്രമിച്ചെങ്കിലും അവസരം ലഭിച്ചില്ലെന്ന് വളർമതി പറഞ്ഞു. നിയമസഭാ സമ്മേളനവും പിന്നീട് വന്ന അവധി ദിവസങ്ങളുമാണ് കൂടിക്കാഴ്ചയ്ക്ക് തടസ്സമായതെന്ന് അവർ വ്യക്തമാക്കി.

‘സഭ നടക്കുന്ന സമയമായിരുന്നു. പിന്നീട് അവധി ദിവസങ്ങളും. അതിനാൽ കാണാൻ പറ്റിയില്ല. നാൽപത്തിയഞ്ച് ദിവസം സമയം ചോദിച്ചത് സമരം പൊളിക്കാനുള്ള നടപടിയായി മാത്രമേ കാണാൻ കഴിയൂ’ – വളർമതി പറഞ്ഞു.

‘പണക്കൊഴുപ്പിന്റെ അഹങ്കാരമാണ്’

എൽപിഎസ്ടി റാങ്ക് ലിസ്റ്റിൽനിന്നുള്ള നിയമനം വൈകുന്നതിൽ വിദ്യാഭ്യാസ വകുപ്പിനെതിരെയും വളർമതി വിമർശനം ഉന്നയിച്ചു. വിഷയത്തിൽ എന്ത് നടപടി സ്വീകരിക്കണമെന്ന് വിദ്യാഭ്യാസ വകുപ്പിന് അറിയാത്തതല്ലെന്നും അവർ പറഞ്ഞു.

‘എയ്ഡഡ് അധ്യാപകർ സെക്രട്ടേറിയറ്റിന് മുന്നിൽ സമരം നടത്തിയിട്ടോ നിരാഹാരം കിടന്നിട്ടോ തല മുണ്ഡനം ചെയ്തിട്ടോ ഒന്നുമല്ല അവർക്ക് സർക്കുലർ ഇറക്കി നിയമനം കൊടുത്തത്. ഇത് പണക്കൊഴുപ്പിന്റെ അഹങ്കാരമാണ്. കൃത്യമായിട്ടുള്ള ഒരു കോഴ കിട്ടുന്നുണ്ടാകും. അതാകും നമ്മളെ ഗൗനിക്കാതെ മറ്റുള്ളവരെ പരിഗണിക്കുന്നത്’ – വളർമതി ആരോപിച്ചു.

അനിശ്ചിതകാല സമരത്തിനൊരുങ്ങി സമരസമിതി

പിഎസ്‌സി നിയമനത്തിലെ കാലതാമസത്തിൽ പ്രതിഷേധിച്ച് സമരം ശക്തമാക്കാനാണ് എൽപിഎസ്ടി റാങ്ക് ലിസ്റ്റ് സമരസമിതിയുടെ തീരുമാനം.

സെക്രട്ടേറിയറ്റിന് മുന്നിൽ നടന്നുവരുന്ന സമരം അനിശ്ചിതകാല സമരമായി മാറ്റുന്നതോടെ പ്രതിഷേധം കൂടുതൽ ശക്തമാകുമെന്നാണ് സമരസമിതിയുടെ നിലപാട്.

English Summary : The LPSA rank list protest led by convenor Valarmathi has entered its 113th day, with allegations of delay in PSC appointments. Valarmathi shaved her head in front of the Secretariat in protest and accused the government of neglecting job aspirants. The protest committee is preparing to launch an indefinite strike, with Valarmathi stating that the protest will continue until their demands are addressed.