പുതിയ വൈദ്യുതി കണക്‌ഷൻ ഇനി ചെലവേറും; ഒക്ടോബർ 12 മുതൽ പുതിയ നിരക്ക്

തിരുവനന്തപുരം: പുതിയ വൈദ്യുതി കണക്‌ഷൻ എടുക്കാൻ ഇനി ഉപഭോക്താക്കൾ കൂടുതൽ പണം നൽകണം.

കണക്‌ഷൻ ഫീസ് ഗണ്യമായി ഉയർത്തി വൈദ്യുതി റെഗുലേറ്ററി കമ്മിഷൻ പുതിയ നിരക്ക് പ്രഖ്യാപിച്ചു. ചില വിഭാഗങ്ങളിൽ ഫീസ് മൂന്നിരട്ടിയോളം വർധിക്കും. പുതുക്കിയ നിരക്കുകൾ ഒക്ടോബർ 12 മുതൽ പ്രാബല്യത്തിൽ വരും.

പുതിയ വൈദ്യുതി കണക്‌ഷന് നിരക്ക് ഏകീകരിച്ചു
പുതിയ നിരക്ക് ഘടനയിൽ പോസ്റ്റ്, അധിക വയർ, ട്രാൻസ്‌ഫോർമർ തുടങ്ങിയവ ആവശ്യമായതും ആവശ്യമില്ലാത്തതുമായ കണക്‌ഷനുകൾക്ക് 200 മീറ്റർ പരിധിക്കുള്ളിൽ ഒരേ നിരക്ക് ബാധകമാകും.

നേരത്തെ ഈ രണ്ട് വിഭാഗങ്ങൾക്കും വ്യത്യസ്ത നിരക്കുകളായിരുന്നു. കൂടാതെ, കിലോവാട്ട് അടിസ്ഥാനത്തിൽ നിരക്ക് ഏകീകരിച്ചതോടെ അപേക്ഷ നൽകുമ്പോൾ തന്നെ കണക്‌ഷൻ ഫീസ് അടയ്ക്കാനും സാധിക്കും.

നിലവിൽ പല കേസുകളിലും ആവശ്യമായ ചെലവ് കെ.എസ്.ഇ.ബി. കണക്കാക്കിയ ശേഷമാണ് ഫീസ് ഈടാക്കിയിരുന്നത്.

ഗാർഹിക കണക്‌ഷനും ഇനി ചെലവേറും
രണ്ട് കിലോവാട്ട് വരെ സിംഗിൾ ഫെയ്‌സ് ഗാർഹിക കണക്‌ഷന് ഇനി 2,000 രൂപ നൽകണം. നിലവിൽ അഞ്ച് കിലോവാട്ട് വരെയുള്ള കണക്‌ഷന് 1,740 രൂപയായിരുന്നു ഫീസ്.

രണ്ട് കിലോവാട്ടിന് മുകളിലും അഞ്ച് കിലോവാട്ട് വരെയുമുള്ള ഗാർഹിക കണക്‌ഷന് പുതിയ നിരക്ക് 5,000 രൂപയാണ്.

ഗാർഹികേതര കണക്‌ഷനുകളിലും ഫീസ് ഉയരും. ഒരു കിലോവാട്ട് വരെ 2,500 രൂപയും രണ്ട് കിലോവാട്ട് വരെ 3,000 രൂപയുമാകും പുതിയ നിരക്ക്.

ത്രീഫെയ്‌സ് കണക്‌ഷന് വൻ വർധന
ത്രീഫെയ്‌സ് കണക്‌ഷനുകളിൽ ലോഡ് കൂടുന്നതിനനുസരിച്ച് ഫീസും വർധിക്കും. അഞ്ച് മുതൽ ഏഴ് കിലോവാട്ട് വരെയുള്ള കണക്‌ഷന് 8,000 രൂപയും ഏഴ് മുതൽ 10 കിലോവാട്ട് വരെയുള്ളതിന് 10,000 രൂപയുമാകും.

നിലവിൽ അഞ്ച് മുതൽ 10 കിലോവാട്ട് വരെയുള്ള ത്രീഫെയ്‌സ് കണക്‌ഷന് 4,220 രൂപയായിരുന്നു ഫീസ്.

25 കിലോവാട്ടിന് 39,000 രൂപ
എൽ.ടി. ത്രീഫെയ്‌സ് വിഭാഗത്തിലാണ് പ്രധാനപ്പെട്ട വർധന. നിലവിൽ 10 മുതൽ 25 കിലോവാട്ട് വരെയുള്ള കണക്‌ഷന് 14,420 രൂപയായിരുന്നു ഫീസ്.

പുതിയ നിരക്കിൽ 10 മുതൽ 30 കിലോവാട്ട് വരെ ഓരോ കിലോവാട്ടിനും 1,560 രൂപയാണ് ഈടാക്കുക. ഇതനുസരിച്ച് 25 കിലോവാട്ട് കണക്‌ഷന് 39,000 രൂപ നൽകേണ്ടിവരും.

അതേസമയം, 30 മുതൽ 40 കിലോവാട്ട് വരെ ഓരോ കിലോവാട്ടിനും 2,890 രൂപയും 50 മുതൽ 100 കിലോവാട്ട് വരെ ഓരോ കിലോവാട്ടിനും 5,670 രൂപയുമാണ് പുതിയ നിരക്ക്.

50 കിലോവാട്ടിന് ഇനി 2.11 ലക്ഷം രൂപ
പുതിയ നിരക്ക് പ്രാബല്യത്തിൽ വരുന്നതോടെ 50 കിലോവാട്ട് കണക്ടഡ് ലോഡുള്ള പുതിയ വൈദ്യുതി കണക്‌ഷൻ എടുക്കുന്നതിനുള്ള ചെലവിൽ വലിയ വ്യത്യാസമുണ്ടാകും.

നിലവിൽ 21,750 രൂപയായിരുന്ന ഫീസ് പുതിയ നിരക്കിൽ ഏകദേശം 2.11 ലക്ഷം രൂപയായി ഉയരും. അതേസമയം, ഈ വിഭാഗത്തിൽ ട്രാൻസ്‌ഫോർമറോ മറ്റ് അനുബന്ധ ഉപകരണങ്ങളോ ആവശ്യമായാലും അവയ്ക്കായി പ്രത്യേക തുക ഈടാക്കില്ല.

200 മീറ്ററിന് അപ്പുറമുള്ള കണക്‌ഷനുകൾക്ക് നിലവിലെ നിരക്ക്

വൈദ്യുതി ലൈനിൽ നിന്ന് 200 മീറ്ററിലധികം അകലെയുള്ള സ്ഥലങ്ങളിൽ കൂടുതൽ പോസ്റ്റുകളും മറ്റ് ഉപകരണങ്ങളും ആവശ്യമായി വരുന്ന കണക്‌ഷനുകൾക്ക് നിലവിലെ നിരക്ക് തുടരും.

എന്നാൽ ഇത്തരം കണക്‌ഷനുകളുടെ നിരക്കും രണ്ട് മാസത്തിനകം പരിഷ്‌കരിച്ച് ശുപാർശ സമർപ്പിക്കണമെന്ന് റെഗുലേറ്ററി കമ്മിഷൻ നിർദേശിച്ചിട്ടുണ്ട്.

സിംഗിൾ ഫെയ്‌സിൽ നിന്ന് ത്രീഫെയ്‌സിലേക്ക് മാറ്റാനും ഫീസ്
കണക്ടഡ് ലോഡിൽ മാറ്റമില്ലാതെ സിംഗിൾ ഫെയ്‌സ് കണക്‌ഷൻ ത്രീഫെയ്‌സാക്കി മാറ്റുന്നതിനും പുതിയ ഫീസ് ബാധകമാകും.

ഇതിനായി ഓരോ കിലോവാട്ടിനും 700 രൂപ വീതം നൽകണം. പുതിയ നിരക്കുകൾ ഒക്ടോബർ 12 മുതൽ പ്രാബല്യത്തിൽ വരുന്നതോടെ വൈദ്യുതി കണക്‌ഷനുമായി ബന്ധപ്പെട്ട പ്രാരംഭ ചെലവിലും കാര്യമായ മാറ്റമുണ്ടാകും.

English Summary:
The Kerala Electricity Regulatory Commission has substantially increased the fees for new electricity connections. The revised rates will come into effect from October 12. Some categories will see fees rise nearly threefold. Domestic single-phase connections up to 2 kW will cost ₹2,000, while a 25 kW connection will cost ₹39,000. The fee for a 50 kW connected load will rise from ₹21,750 to around ₹2.11 lakh. Connections located more than 200 metres from the existing power line will continue under the current tariff for now.