ന്യൂഡൽഹി: തുറന്നുകിടന്ന ഓടയിൽ വീണ് നാല് ദിവസമായി കാണാതായ 15കാരന്റെ മൃതദേഹം കണ്ടെത്തി. തെക്കുകിഴക്കൻ ഡൽഹിയിലെ ജസോല ഗ്രാമത്തിലാണ് ദാരുണമായ ഡൽഹി ഓട ദുരന്തം ഉണ്ടായത്.
പട്ടം പറത്തുന്നതിനിടെയാണ് എട്ടാം ക്ലാസ് വിദ്യാർഥിയായ മിഥുൻ തുറന്ന ഓടയിൽ വീണത്. മൂന്ന് ദിവസത്തോളം വിവിധ രക്ഷാസേനകൾ നടത്തിയ തിരച്ചിലിനൊടുവിലാണ് മൃതദേഹം കണ്ടെത്തിയത്.
ഡൽഹി ഓട ദുരന്തത്തിൽ 15കാരന് ദാരുണാന്ത്യം
ശനിയാഴ്ച രാവിലെ 11 മണിയോടെയാണ് മിഥുണിനെ കാണാതായത്. വീടിന് സമീപത്തുള്ള ഓടയിൽ വീണിരിക്കാമെന്ന് കുടുംബം സംശയിച്ചിരുന്നു.
തുടർന്ന് ഡൽഹി ഫയർ സർവീസ്, എൻഡിആർഎഫ്, പ്രത്യേക രക്ഷാസേന, സ്കൂബ ഡൈവർമാർ എന്നിവർ സംയുക്തമായി തിരച്ചിൽ ആരംഭിച്ചു.
മൂന്ന് ദിവസത്തെ തിരച്ചിലിനൊടുവിൽ മൃതദേഹം
രക്ഷാപ്രവർത്തകർ പ്രദേശത്ത് വ്യാപകമായി തിരച്ചിൽ നടത്തിയെങ്കിലും ആദ്യഘട്ടത്തിൽ കുട്ടിയെ കണ്ടെത്താനായില്ല. ഒടുവിൽ ചൊവ്വാഴ്ച ഉച്ചയ്ക്ക് 1.15ഓടെയാണ് ഓടയിൽനിന്ന് മിഥുണിന്റെ മൃതദേഹം പുറത്തെടുത്തത്.
ഇതോടെ മൂന്ന് ദിവസമായി തുടരുകയായിരുന്ന തിരച്ചിലിന് വിരാമമായി. നാല് ദിവസത്തിന് ശേഷമാണ് കുട്ടിയുടെ മൃതദേഹം കുടുംബത്തിന് കണ്ടെത്താനായത്.
മകനെ തേടി പിതാവും ഓടയിലിറങ്ങി
രക്ഷാസേനയ്ക്ക് കുട്ടിയെ കണ്ടെത്താൻ കഴിയാതെ വന്നതോടെ പിതാവ് സ്വയം ഓടയിലിറങ്ങി മകനെ തിരയുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.
കൈയിൽ വടിയുമായാണ് പിതാവ് ഓടയിൽ തിരച്ചിൽ നടത്തിയത്. ഉത്തർപ്രദേശിൽനിന്നുള്ള കുടുംബം ഡൽഹിയിൽ നിർമാണ തൊഴിലാളികളായി ജോലി ചെയ്തുവരികയായിരുന്നു.
ജൂനിയർ എഞ്ചിനീയർക്ക് സസ്പെൻഷൻ
സംഭവത്തിൽ ഡ്യൂട്ടിയിൽ വീഴ്ച വരുത്തിയെന്നാരോപിച്ച് സൗത്ത് ഈസ്റ്റ് (സെൻട്രൽ) സോണിലെ ജൂനിയർ എഞ്ചിനീയറെ മുൻസിപ്പൽ കോർപ്പറേഷൻ ഓഫ് ഡൽഹി സസ്പെൻഡ് ചെയ്തു.
ഉദ്യോഗസ്ഥനെതിരെ അച്ചടക്ക നടപടിയും ആരംഭിച്ചിട്ടുണ്ട്. കൂടാതെ, ഓടയുടെ അധികാരപരിധി സംബന്ധിച്ച വിവരങ്ങൾ ഒരു മണിക്കൂറിനുള്ളിൽ നൽകാനും കുറ്റക്കാരനായ ഉദ്യോഗസ്ഥനെ സസ്പെൻഡ് ചെയ്യാനും ഗുപ്ത ചീഫ് സെക്രട്ടറിക്ക് നിർദേശം നൽകിയിരുന്നു.
