സ്വകാര്യതയ്ക്ക് ഇനി കൂടുതൽ സുരക്ഷ; ടെക്സ്റ്റ് മെസ്സേജുകളും ഒരിക്കൽ കണ്ടയുടൻ അപ്രത്യക്ഷമാകുന്ന ‘വ്യൂ-വൺസ് ടെക്സ്റ്റ്’ ഫീച്ചറുമായി വാട്‌സ്ആപ്പ്

വാട്സ് ആപ്പിലൂടെ സുഹൃത്തുക്കൾക്കോ മറ്റ് വ്യക്തികൾക്കോ അതീവ രഹസ്യ സ്വഭാവമുള്ള വിവരങ്ങൾ പങ്കിടുമ്പോൾ അത് പിന്നീട് മറ്റാരുടെയെങ്കിലും കൈകളിൽ എത്തിപ്പെടുമോ എന്ന ആശങ്ക പല ഉപയോക്താക്കൾക്കുമുണ്ട്.

അത്തരക്കാരുടെ വലിയൊരു സുരക്ഷാ പ്രശ്നത്തിന് പരിഹാരമെന്നോണം സ്വകാര്യതയ്ക്ക് കൂടുതൽ പ്രാധാന്യം നൽകുന്ന അത്യാധുനികമായ പുതിയൊരു ഫീച്ചറുമായി വാട്‌സ്ആപ്പ് എത്താനൊരുങ്ങുന്നതായാണ് പുതിയ റിപ്പോർട്ടുകൾ വ്യക്തമാക്കുന്നത്.

നിലവിലുള്ള ഫോട്ടോകളും വീഡിയോകളും പോലെ തന്നെ നമ്മൾ ടൈപ്പ് ചെയ്യുന്ന ടെക്സ്റ്റ് സന്ദേശങ്ങളും സ്വീകരിക്കുന്നയാൾക്ക് ഒരുതവണ മാത്രം വായിക്കാനാകുന്ന ‘വ്യൂ-വൺസ്’ (View-Once) ടെക്സ്റ്റ് സന്ദേശ സംവിധാനമാണ് കമ്പനി ഇപ്പോൾ പരീക്ഷിച്ചുകൊണ്ടിരിക്കുന്നത്.

വാട്‌സ്ആപ്പ് പുറത്തിറക്കുന്ന പുതിയ ഫീച്ചറുകളെക്കുറിച്ച് നിരന്തരം നിരീക്ഷിക്കുന്ന പ്രമുഖ പ്ലാറ്റ്‌ഫോമായ വാബീറ്റ ഇൻഫോയുടെ (WABetaInfo) ഏറ്റവും പുതിയ റിപ്പോർട്ട് പ്രകാരം, ഐഫോണുകൾക്കായുള്ള വാട്‍സാപ്പ് ബീറ്റ ഫോർ ഐഓഎസ് (WhatsApp Beta for iOS) പതിപ്പ് 26.24.10.16-ൽ ഈ പുതിയ ഫീച്ചറിന്റെ സാന്നിധ്യം കണ്ടെത്തിയിട്ടുണ്ട്.

എന്നാൽ ഈ ഫീച്ചർ ഇപ്പോഴും പ്രാഥമിക വികസന ഘട്ടത്തിൽ മാത്രമായതിനാൽ ബീറ്റാ ഉപയോക്താക്കൾക്കുപോലും ഇത് നിലവിൽ ഉപയോഗിക്കാൻ സാധിക്കുന്നില്ല. ആപ്പിളിന്റെ ഔദ്യോഗിക ടെസ്റ്റ്ഫ്ലൈറ്റ് പ്രോഗ്രാമിലൂടെ ഏറ്റവും പുതിയ ബീറ്റാ അപ്ഡേറ്റുകൾ കൃത്യമായി സ്വീകരിക്കുന്നവർക്ക് പോലും ഈ സുരക്ഷാ സൗകര്യം ഇതുവരെ ലഭ്യമാക്കിയിട്ടില്ലെന്നാണ് ലഭിക്കുന്ന വിവരം.

നിലവിൽ നമ്മൾ അയക്കുന്ന ഫോട്ടോകൾ, വീഡിയോകൾ, വോയ്‌സ് നോട്ടുകൾ എന്നിവയെല്ലാം ‘വ്യൂ-വൺസ്’ രീതിയിൽ അയയ്ക്കാനുള്ള സൗകര്യം വാട്‌സ്ആപ്പിൽ വ്യാപകമായി ലഭ്യമാണ്.

സന്ദേശം സ്വീകരിക്കുന്നയാൾക്ക് ഒരുതവണ മാത്രം കാണാനോ കേൾക്കാനോ കഴിയുന്ന ഇത്തരം ഉള്ളടക്കങ്ങൾ അവർ അത് കണ്ടുകഴിഞ്ഞാലുടൻ ഫോണിൽ നിന്നും സ്വയം അപ്രത്യക്ഷമാകുന്ന രീതിയാണിത്. ഇതേ സുരക്ഷിതമായ സാങ്കേതിക സംവിധാനമാണ് ഇനി മുതൽ നമ്മൾ സാധാരണയായി അയക്കുന്ന ടെക്സ്റ്റ് സന്ദേശങ്ങൾക്കും വ്യാപിപ്പിക്കാൻ കമ്പനി ഒരുങ്ങുന്നതെന്നാണ് വിവിധ ആഗോള റിപ്പോർട്ടുകൾ അടിവരയിടുന്നത്.

ഈ പുതിയ ഫീച്ചർ പൂർണ്ണമായും നിലവിൽ വരുമ്പോൾ, ഉപയോക്താക്കൾ സാധാരണ രീതിയിൽ സന്ദേശം ടൈപ്പ് ചെയ്ത ശേഷം ചാറ്റിലുള്ള ‘സെൻഡ്’ (Send) ബട്ടൺ ദീർഘനേരം അമർത്തിപ്പിടിക്കുമ്പോൾ ‘സെൻഡ് ആസ് വ്യൂ വൺസ്’ (Send as View Once) എന്ന പ്രത്യേക ഓപ്ഷൻ തിരഞ്ഞെടുക്കാൻ സാധിക്കുമെന്നാണ് വിവരം.

ഇതുവഴി അയക്കുന്ന സന്ദേശങ്ങൾ സ്വീകരിക്കുന്ന വ്യക്തിക്ക് ഒരുതവണ മാത്രം വായിക്കാൻ മാത്രമേ സാധിക്കൂ. സന്ദേശം അടങ്ങിയ ചാറ്റ് ബോക്സ് അവർ ഒരു തവണ തുറന്ന് വായിച്ചു കഴിഞ്ഞാൽ പിന്നീട് അത് വീണ്ടും കാണാനോ ചാറ്റിൽ നിന്ന് വീണ്ടെടുക്കാനോ സാധിക്കില്ല.

വ്യക്തികൾ തമ്മിലുള്ള സാധാരണ ചാറ്റുകളിലും വലിയ ഗ്രൂപ്പ് ചാറ്റുകളിലും ഒരുപോലെ ഈ മികച്ച സൗകര്യം ലഭ്യമാകുമെന്നാണ് റിപ്പോർട്ടുകൾ വ്യക്തമാക്കുന്നത്. എന്നാൽ വാട്‌സ്ആപ്പ് ചാനലുകളിൽ വലിയൊരു ജനവിഭാഗത്തിലേക്ക് വിവരങ്ങൾ പങ്കുവെക്കുന്നതിനാൽ ഈ ഫീച്ചർ അവിടെ ലഭ്യമാകാൻ സാധ്യത വളരെ കുറവാണ്.

കൂടാതെ, നിലവിലെ ‘വ്യൂ-വൺസ്’ മീഡിയ ഫയലുകൾക്ക് ബാധകമായ എല്ലാത്തരം സുരക്ഷാ നിയന്ത്രണങ്ങളും ഈ പുതിയ ടെക്സ്റ്റ് സന്ദേശങ്ങൾക്കും ഒരുപോലെ ബാധകമായിരിക്കും. അതായത് ഇത്തരം മെസ്സേജുകൾ മറ്റൊരാൾക്ക് കോപ്പി ചെയ്യാനോ, ഫോർവേഡ് ചെയ്യാനോ, ഷെയർ ചെയ്യാനോ, സ്ക്രീൻഷോട്ട് എടുക്കാനോ, സ്ക്രീൻ റെക്കോർഡിംഗ് നടത്താനോ കഴിയില്ലെന്ന വലിയൊരു സുരക്ഷ കൂടി ഇതിലുണ്ടാകും.

ഇപ്പോൾ താൽക്കാലികവും രഹസ്യവുമായ വിവരങ്ങൾ മറ്റുള്ളവരുമായി പങ്കിടാൻ ആഗ്രഹിക്കുന്ന പല ഉപയോക്താക്കളും ഫോണിലെ നോട്ട്പാഡിൽ ടെക്സ്റ്റ് എഴുതിയ ശേഷം അതിന്റെ സ്ക്രീൻഷോട്ട് എടുത്ത് ‘വ്യൂ-വൺസ്’ ചിത്രങ്ങളായി വാട്സ്ആപ്പിൽ അയക്കുന്ന കഠിനമായ രീതിയാണ് പിന്തുടരുന്നത്.

പുതിയ ഫീച്ചർ പൂർണ്ണമായി യാഥാർഥ്യമാകുന്നതോടെ കൂടുതൽ ലളിതവും ഒപ്പം സുരക്ഷിതവുമായ ഒരു മികച്ച മാർഗമാകും ഉപയോക്താക്കൾക്ക് കൈവരിക. നിലവിലെ പരീക്ഷണ ഘട്ടങ്ങൾ വിജയകരമായി പൂർത്തിയാക്കി ഈ ഫീച്ചർ എപ്പോൾ പൊതുജനങ്ങൾക്ക് ലഭ്യമാകുമെന്ന കാര്യത്തിൽ ഇനി വാട്‌സ്ആപ്പിന്റെ ഭാഗത്തുനിന്നുള്ള ഔദ്യോഗിക പ്രഖ്യാപനത്തിനായാണ് സാങ്കേതിക ലോകം കാത്തിരിക്കുന്നത്.

English Summary

WhatsApp is testing a new ‘View-Once’ feature for text messages, allowing users to send texts that disappear after being read once. Spotted in the iOS beta version, this feature will restrict copying, forwarding, and screenshots, offering enhanced privacy similar to view-once photos and videos.