അമേരിക്കൻ സൈന്യത്തിന്റെ ആക്രമണങ്ങൾക്ക് തൊട്ടുപിന്നാലെ അതിശക്തമായ തിരിച്ചടിയുമായി ഇറാൻ രംഗത്തെത്തിയതോടെ മിഡിൽ ഈസ്റ്റിൽ കനത്ത യുദ്ധഭീതി പടരുകയാണ്. ജോർദാനിലുള്ള യുഎസ് സൈനിക താവളത്തിന് നേരെ തങ്ങൾ വിജയകരമായി ആക്രമണം നടത്തിയതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് ഔദ്യോഗികമായി സ്ഥിരീകരിച്ചു.
അൽ അസ്റഖ് എന്ന പ്രദേശത്ത് സ്ഥിതി ചെയ്യുന്ന യുഎസ് താവളത്തെ ലക്ഷ്യമിട്ട് ദീർഘദൂര ഖര ഇന്ധന മിസൈലുകളാണ് ഇറാൻ പ്രയോഗിച്ചതെന്ന് ഐആർജിസി വ്യക്തമാക്കുന്നു. ഇതിന് പുറമെ ബഹ്റൈനിൽ തമ്പടിച്ചിരിക്കുന്ന അമേരിക്കയുടെ പ്രശസ്തമായ ഫിഫ്ത് ഫ്ലീറ്റ് സൈനിക വ്യൂഹത്തിന് നേരെയും ഇറാന്റെ ഭാഗത്തുനിന്ന് ആക്രമണമുണ്ടായിട്ടുണ്ട്.
വൻതോതിലുള്ള മിസൈൽ പ്രവാഹത്തിന്റെ പശ്ചാത്തലത്തിൽ കുവൈറ്റിൽ ആക്രമണത്തിന് മുന്നോടിയായുള്ള അടിയന്തര സൈറണുകൾ മുഴങ്ങുകയും ജനങ്ങളോട് സുരക്ഷിത സ്ഥാനങ്ങളിലേക്ക് മാറാൻ ഭരണകൂടം കർശന നിർദ്ദേശം നൽകുകയും ചെയ്തു.
ഇറാൻ അതിർത്തിക്കുള്ളിൽ അമേരിക്ക നടത്തിയ വ്യോമാക്രമണങ്ങൾക്ക് പ്രതികാരമായാണ് ഇപ്പോൾ അമേരിക്കൻ സൈനിക കേന്ദ്രങ്ങളെ ഇറാൻ ലക്ഷ്യമിട്ടിരിക്കുന്നത്. കഴിഞ്ഞ ദിവസം ഒമാൻ തീരത്ത് വച്ച് അമേരിക്കയുടെ അത്യാധുനിക ഹെലികോപ്റ്റർ ഇറാൻ സൈന്യം വെടിവച്ചിട്ടിരുന്നു. ഈ സംഭവത്തിനുള്ള മറുപടിയെന്നോണമാണ് തങ്ങൾ ഇറാനിൽ ആക്രമണം നടത്തിയതെന്നാണ് അമേരിക്കൻ ഐക്യനാടുകളുടെ ഔദ്യോഗിക വിശദീകരണം.
തങ്ങളുടെ സൈനികർക്കും ആസ്തികൾക്കും നേരെയുണ്ടാകുന്ന പ്രകോപനങ്ങളെ പ്രതിരോധിക്കുക മാത്രമാണ് തങ്ങൾ ചെയ്തതെന്ന് യുഎസ് കേന്ദ്രങ്ങൾ അവകാശപ്പെടുന്നു. ഹെലികോപ്റ്റർ തകർത്തതിന് പകരമായി ഇറാനിലെ തന്ത്രപ്രധാനമായ സൈനിക താവളങ്ങളെയാണ് അമേരിക്കൻ യുദ്ധവിമാനങ്ങൾ തകർത്തത്.
More Read
ഹോർമൂസ് കടലിടുക്കിന് ചുറ്റുമുള്ള ഇറാന്റെ വ്യോമ പ്രതിരോധ സംവിധാനങ്ങൾക്കും അത്യാധുനിക റഡാർ നിലയങ്ങൾക്കും നേരെയാണ് അമേരിക്ക പ്രധാനമായും ബോംബുകൾ വർഷിച്ചത്. കൂടാതെ ഇറാന്റെ പ്രധാന തുറമുഖ നഗരങ്ങളായ സിറിക്, ബന്ദാർ അബ്ബാസ് എന്നിവടങ്ങളിലും ഹോർമൂസിന്റെ അതിർത്തി പ്രദേശമായ ഖ്വേഷം ദ്വീപിലും അമേരിക്കൻ സൈന്യം കനത്ത നാശനഷ്ടങ്ങൾ വിതച്ചു.
ഈ വൻ വ്യോമാക്രമണത്തിൽ പ്രദേശത്തെ രണ്ട് പ്രധാന ജലസംഭരണികൾ പൂർണ്ണമായും തകർന്നതായി ഇസ്ലാമിക് റിപ്പബ്ലിക് ഓഫ് ഇറാൻ ബ്രോഡ്കാസ്റ്റിങ് റിപ്പോർട്ട് ചെയ്തിട്ടുണ്ട്. മേഖലയിലെ ജനജീവിതത്തെ സാരമായി ബാധിക്കുന്ന രീതിയിലാണ് യുഎസിന്റെ മിസൈൽ ആക്രമണം ഉണ്ടായത്.
അമേരിക്കൻ സൈന്യം നടത്തിയത് വളരെ ശക്തവും കൃത്യവുമായ ആക്രമണമാണെന്ന് യുഎസ് പ്രസിഡന്റ് ഡൊണാൾഡ് ട്രംപ് മാധ്യമങ്ങളോട് പ്രതികരിച്ചു. ഇറാൻ നടത്തിയ പ്രകോപനത്തിന് കൃത്യമായ മറുപടി നൽകേണ്ടത് അമേരിക്കയുടെ സുരക്ഷയ്ക്ക് അത്യന്താപേക്ഷിതമായിരുന്നുവെന്ന് അദ്ദേഹം ഓർമ്മിപ്പിച്ചു.
More Read
തങ്ങളുടെ ഹെലികോപ്റ്റർ തകർത്തവർക്കുള്ള വ്യക്തമായ സന്ദേശമാണ് ഈ തിരിച്ചടിയെന്നും ട്രംപ് കൂട്ടിച്ചേർത്തു. അതേസമയം അമേരിക്കയുടെ ഒരു പ്രകോപനവും മറുപടിയില്ലാതെ പോകില്ലെന്നും വരും ദിവസങ്ങളിൽ കൂടുതൽ ശക്തമായ പ്രത്യാഘാതങ്ങൾ അമേരിക്ക നേരിടേണ്ടി വരുമെന്നും ഇറാന്റെ വിദേശകാര്യ മന്ത്രി അബ്ബാസ് അരാഗ്ചി മുന്നറിയിപ്പ് നൽകി.
English Summary
Iran’s Islamic Revolutionary Guard Corps (IRGC) launched long-range solid-fuel missile attacks on US military bases in Jordan and Bahrain, retaliating against US airstrikes. This escalated after Iran downed a US helicopter near Oman. US President Donald Trump defended the strikes, while Iranian Foreign Minister Abbas Araghchi vowed continued resistance.
