കൊച്ചി: മുൻ ഭാര്യയും ഗായികയുമായ അമൃത സുരേഷിനെതിരെ വീണ്ടും ആരോപണങ്ങളുമായി നടൻ ബാല രംഗത്ത്. സാമൂഹിക മാധ്യമങ്ങളിൽ പങ്കുവെച്ച പുതിയ വീഡിയോയിലൂടെയാണ് ബാല തന്റെ പ്രതികരണം അറിയിച്ചത്. മകളുമായി ബന്ധപ്പെട്ട കേസുകളും നിയമനടപടികളും തനിക്ക് മാനസിക ബുദ്ധിമുട്ടുകൾ സൃഷ്ടിക്കുന്നുവെന്ന് അദ്ദേഹം പറഞ്ഞു.
മകൾക്കായി ചെയ്യേണ്ട എല്ലാ കാര്യങ്ങളും താൻ ചെയ്തിട്ടുണ്ടെന്നും സാമ്പത്തിക ബാധ്യതകളിൽ നിന്ന് ഒഴിഞ്ഞുമാറിയിട്ടില്ലെന്നും ബാല വീഡിയോയിൽ അവകാശപ്പെട്ടു. എന്നിട്ടും വിവിധ കേസുകളുടെയും ആരോപണങ്ങളുടെയും പേരിൽ കോടതികൾ കയറിയിറങ്ങേണ്ട സാഹചര്യം തുടരുകയാണെന്നാണ് അദ്ദേഹത്തിന്റെ വാദം.
വീഡിയോയിൽ റിപ്പോർട്ടർ ചാനലിന്റെ ന്യൂസ് എഡിറ്റർ അരുൺ കുമാറിനെയും ബാല രൂക്ഷമായി വിമർശിച്ചു. തനിക്കെതിരെ അടിസ്ഥാനരഹിതമായ വാർത്തകളും ആരോപണങ്ങളും പ്രചരിപ്പിച്ചുവെന്നാണ് ബാലയുടെ ആരോപണം. തനിക്കെതിരെ ഉയർന്ന സാമ്പത്തിക ആരോപണങ്ങൾക്ക് യാതൊരു അടിസ്ഥാനവുമില്ലെന്നും എല്ലാ രേഖകളും കോടതിയിൽ സമർപ്പിച്ചിട്ടുണ്ടെന്നും അദ്ദേഹം പറഞ്ഞു.
തന്നെക്കുറിച്ചുള്ള വാർത്തകൾ പ്രസിദ്ധീകരിക്കുന്നതിന് മുൻപ് ആവശ്യമായ തെളിവുകൾ പരിശോധിക്കേണ്ട ഉത്തരവാദിത്വം മാധ്യമങ്ങൾക്കുണ്ടെന്നും ബാല അഭിപ്രായപ്പെട്ടു. തനിക്കെതിരായ ആരോപണങ്ങളെക്കുറിച്ച് പൊതുവേദിയിൽ ചർച്ച ചെയ്യാൻ തയ്യാറാണെന്നും അദ്ദേഹം വെല്ലുവിളിച്ചു.
ബാല പങ്കുവെച്ച വീഡിയോയിൽ ഭാര്യ കോകിലയും മറ്റൊരാളും ഒപ്പമുണ്ടായിരുന്നു.
More Read
ബാലയും അമൃത സുരേഷും വർഷങ്ങൾക്ക് മുൻപാണ് വിവാഹമോചിതരായത്. ഇവരുടെ മകൾ നിലവിൽ അമൃത സുരേഷിന്റെ സംരക്ഷണത്തിലാണ്. മുൻപ് ഇരുവരും തമ്മിലുള്ള തർക്കങ്ങൾ പൊതുചർച്ചയായതിനെ തുടർന്ന് വിഷയവുമായി ബന്ധപ്പെട്ട പരാമർശങ്ങളിലും സോഷ്യൽ മീഡിയ ഉള്ളടക്കങ്ങളിലും കോടതി നിയന്ത്രണങ്ങൾ ഏർപ്പെടുത്തിയിരുന്നു.
English Summary
Actor Bala has once again made allegations against his former wife, singer Amrutha Suresh, through a video posted on social media. He claimed he had fulfilled all responsibilities toward his daughter but continues to face legal disputes. Bala also criticized Reporter Channel News Editor Arun Kumar, alleging that unverified reports caused problems in his family life.
