വിദേശത്ത് ഉയർന്ന ശമ്പളമുള്ള ജോലി വാഗ്ദാനം ചെയ്ത് ഇന്ത്യൻ യുവതികളെ വിദേശത്തേക്ക് കടത്തുകയും ക്രൂരമായ ചൂഷണത്തിന് ഇരയാക്കുകയും ചെയ്യുന്ന അന്താരാഷ്ട്ര മനുഷ്യക്കടത്ത് സംഘത്തിന്റെ ഞെട്ടിക്കുന്ന വിവരങ്ങളാണ് പൂണെയിൽ നിന്നും പുറത്തുവരുന്നത്. മഹാരാഷ്ട്രയിലെ നാഗ്പൂർ സ്വദേശിനിയായ 28-കാരിയായ യുവതിയാണ് പൂണെ ആസ്ഥാനമായി പ്രവർത്തിക്കുന്ന പ്രമുഖ റിക്രൂട്ടിംഗ് ഏജൻസിയുടെ ക്രൂരമായ തട്ടിപ്പിനിരയായത്.
പ്രതിമാസം ഒന്നര ലക്ഷം രൂപ വരെ വേതനം ലഭിക്കുന്ന സുരക്ഷിതമായ ജോലി പോർച്ചുഗലിൽ വാഗ്ദാനം ചെയ്താണ് തട്ടിപ്പുസംഘം യുവതിയെ വിദേശത്തേക്ക് അയച്ചത്. എന്നാൽ വിദേശത്തെത്തിച്ചതിന് പിന്നാലെ യുവതിയെ ഒരു ബിയർ ഷോപ്പ് ഉടമയ്ക്ക് വൻ തുകയ്ക്ക് വിൽപ്പന നടത്തുകയായിരുന്നുവെന്ന ഗുരുതരമായ ആരോപണമാണ് ഇപ്പോൾ ഉയർന്നിരിക്കുന്നത്.
ഇൻസ്റ്റഗ്രാം പരസ്യങ്ങൾ കണ്ടാണ് യുവതി ‘വീ മൈഗ്രേറ്റ്’ എന്ന സ്ഥാപനത്തിന്റെ പ്രതിനിധികളുമായി ആദ്യം ബന്ധപ്പെടുന്നത്. യൂറോപ്യൻ രാജ്യങ്ങളിൽ പ്രതിദിനം എട്ട് മണിക്കൂർ മാത്രം ജോലിയും ആകർഷകമായ ശമ്പളവും വാഗ്ദാനം ചെയ്ത് ഏജൻസി പ്രതിനിധികൾ യുവതിയുടെ വിശ്വാസ്യത നേടിയെടുത്തു. വിസ പ്രൊസസിംഗിനും യാത്രാ ചെലവുകൾക്കുമായി ഘട്ടം ഘട്ടമായി 11 ലക്ഷത്തോളം രൂപയാണ് ഇവർ യുവതിയിൽ നിന്നും ഈടാക്കിയത്.
എന്നാൽ വലിയ പ്രതീക്ഷകളോടെ പോർച്ചുഗലിൽ വിമാനമിറങ്ങിയ യുവതിക്ക് നേരിടേണ്ടി വന്നത് സങ്കല്പിക്കാൻ പോലും കഴിയാത്ത ക്രൂരതകളായിരുന്നു. വിമാനത്താവളത്തിലെത്തിയ ഉടൻ തന്നെ അവിടെയുണ്ടായിരുന്ന പ്രാദേശിക ഏജന്റുമാർ യുവതിയുടെ പാസ്പോർട്ടും യാത്രാരേഖകളും നിർബന്ധപൂർവ്വം പിടിച്ചെടുക്കുകയായിരുന്നു.
തുടർന്ന് രണ്ടു ദിവസത്തോളം യുവതിയെ അജ്ഞാത കേന്ദ്രത്തിലെ മുറിയിൽ പൂട്ടിയിടുകയും മാനസികമായി തളർത്തുകയും ചെയ്തു. ഇതിനുശേഷമാണ് ഒരു ബിയർ ഷോപ്പ് ഉടമയ്ക്ക് 11 ലക്ഷം രൂപയ്ക്ക് യുവതിയെ ഇവർ കച്ചവടം ചെയ്തത്. അവിടെ വെച്ച് ക്രൂരമായ ശാരീരിക-മാനസിക പീഡനങ്ങൾക്കാണ് യുവതി ഇരയായത്. നിരന്തരം ഉപദ്രവിക്കുകയും അനധികൃതമായി ജോലി ചെയ്യാൻ നിർബന്ധിക്കുകയും ചെയ്തു.
More Read
തന്റെ പാസ്പോർട്ട് തിരികെ നൽകി നാട്ടിലേക്ക് പോകാൻ അനുവദിക്കണമെന്ന് കരഞ്ഞു അപേക്ഷിച്ചെങ്കിലും കൂടുതൽ പണം നൽകിയാൽ മാത്രമേ മോചനം സാധ്യമാകൂ എന്ന നിലപാടാണ് തടവിലാക്കിയവർ സ്വീകരിച്ചത്. ഒരു മാസത്തോളം നീണ്ട പീഡനങ്ങൾക്കൊടുവിൽ അതിസാഹസികമായാണ് യുവതി അവിടെ നിന്നും രക്ഷപ്പെട്ടത്.
ലിസ്ബണിലേക്ക് ബസ് മാർഗ്ഗം യാത്ര തിരിച്ച് രക്ഷപ്പെട്ട യുവതി പിന്നീട് മാഡ്രിഡിലും അവിടെ നിന്ന് ദോഹ വഴിയുമാണ് ഒടുവിൽ ഇന്ത്യയിൽ തിരിച്ചെത്തിയത്. എന്നാൽ നാട്ടിലെത്തിയ ശേഷവും തട്ടിപ്പുസംഘത്തിന്റെ ശല്യം അവസാനിച്ചില്ല. മൂന്ന് ലക്ഷം രൂപ കൂടി നൽകിയാൽ മാൾട്ടയിൽ പുതിയ ജോലി ശരിയാക്കി നൽകാമെന്ന് പറഞ്ഞ് സ്ഥാപനം വീണ്ടും യുവതിയെ സമീപിച്ചു.
എന്നാൽ ഈ ഓഫർ നിരസിച്ചതോടെ തട്ടിപ്പുകാർ ഭീഷണിയുമായി രംഗത്തെത്തി. പണം നൽകിയില്ലെങ്കിൽ ഭർത്താവിനെ വധിക്കുമെന്നും യുവതിയെ വ്യാജ കേസുകളിൽ കുടുക്കി ജയിലിലടയ്ക്കുമെന്നും ഇവർ ഭീഷണിപ്പെടുത്തി. ഇതോടെയാണ് സഹികെട്ട യുവതി പോലീസിനെ സമീപിക്കാൻ തീരുമാനിച്ചത്.
More Read
യുവതിയുടെ പരാതിയുടെ അടിസ്ഥാനത്തിൽ പൂണെ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. മനുഷ്യക്കടത്ത്, പിടിച്ചുപറി, വഞ്ചന, ഭീഷണിപ്പെടുത്തൽ തുടങ്ങിയ ഗുരുതരമായ വകുപ്പുകൾ ചുമത്തിയാണ് ‘വീ മൈഗ്രേറ്റ്’ സ്ഥാപനത്തിന്റെ നടത്തിപ്പുകാർ ഉൾപ്പെടെ എട്ടുപേർക്കെതിരെ കേസ് എടുത്തിരിക്കുന്നത്.
വിദേശത്തേക്ക് ആളുകളെ കടത്തുന്ന വലിയൊരു സംഘം ഇതിനുപിന്നിൽ പ്രവർത്തിക്കുന്നുണ്ടെന്ന നിഗമനത്തിലാണ് പോലീസ്. സംഭവത്തിൽ ശാസ്ത്രീയ തെളിവുകൾ ശേഖരിച്ചുവരികയാണെന്നും കുറ്റക്കാർക്കെതിരെ ശക്തമായ നടപടി സ്വീകരിക്കുമെന്നും പോലീസ് വൃത്തങ്ങൾ അറിയിച്ചു.
