ഉത്തർപ്രദേശിലെ ഗാസിയാബാദിൽ ഏഴുവയസ്സുകാരി ക്രൂരമായ കൂട്ടബലാത്സംഗത്തിനും കൊലപാതകത്തിനും ഇരയായ സംഭവം രാജ്യത്തെ നടുക്കിയിരിക്കുകയാണ്. രാജ്നഗർ എക്സ്റ്റൻഷനിൽ നിർമ്മാണത്തിലിരിക്കുന്ന ഒരു കെട്ടിടത്തിൽ വെച്ചാണ് വെള്ളിയാഴ്ച പെൺകുട്ടി ഈ ക്രൂരതയ്ക്ക് ഇരയായത്.
കുട്ടിയെ അതിക്രൂരമായി പീഡിപ്പിച്ച ശേഷം പ്രതികൾ ഇരുമ്പുദണ്ഡുകൊണ്ട് തലയ്ക്കടിച്ച് പരിക്കേൽപ്പിക്കുകയും, പിന്നീട് കെട്ടിടത്തിന്റെ മൂന്നാം നിലയിൽ നിന്ന് താഴേക്ക് തള്ളിയിട്ട് കൊലപ്പെടുത്തുകയുമായിരുന്നു. കാണാതായ കുട്ടിക്കായി കുടുംബാംഗങ്ങളും നാട്ടുകാരും ചേർന്ന് നാല് മണിക്കൂറോളം നടത്തിയ തെരച്ചിലിനൊടുവിലാണ് മൃതദേഹം കണ്ടെത്താനായത്.
മൃതദേഹം കണ്ടെത്താൻ സഹായിച്ച തെരുവ് നായ
കുട്ടിയെ കാണാതായതിനെ തുടർന്ന് കുടുംബവും നാട്ടുകാരും പരിസരപ്രദേശങ്ങളാകെ അരിച്ചുപെറുക്കിയെങ്കിലും ആദ്യമൊന്നും യാതൊരു സൂചനയും ലഭിച്ചിരുന്നില്ല. ഈ ദുരൂഹ സാഹചര്യത്തിൽ ഒരു തെരുവ് നായയാണ് മൃതദേഹം കണ്ടെത്താൻ കുടുംബത്തിന് വഴികാട്ടിയായത്.
പെൺകുട്ടിയുടെ അമ്മ മാധ്യമങ്ങളോട് പങ്കുവെച്ച വിവരങ്ങൾ പ്രകാരം, തിരച്ചിലിനിടയിൽ നാട്ടുകാർ നിർമ്മാണത്തിലിരിക്കുന്ന ഇരുണ്ട കെട്ടിടത്തിന് സമീപത്തേക്ക് നീങ്ങിയപ്പോൾ ഒരു തെരുവ് നായ അവരെ പിന്തുടരുകയായിരുന്നു. നിമിഷങ്ങൾക്കകം ആ നായ കെട്ടിടത്തിന്റെ ഒരു പ്രത്യേക ഭാഗത്തേക്ക് നീങ്ങുകയും അവിടെ അനങ്ങാതെ നിൽക്കുകയും ചെയ്തു. നായയുടെ ഈ അസാധാരണ പെരുമാറ്റം ശ്രദ്ധയിൽപ്പെട്ട നാട്ടുകാർ അതിന്റെ പുറകേ ചെന്ന് നോക്കിയപ്പോഴാണ് പെൺകുട്ടിയുടെ മൃതദേഹം കണ്ടെത്തിയത്.
പ്രതികളെ തിരിച്ചറിഞ്ഞു; അന്വേഷണം ഊർജ്ജിതം
ക്രൂരമായ ഈ കൊലപാതകവുമായി ബന്ധപ്പെട്ട് ജഹാംഗീർപുരി പോലീസ് കേസ് രജിസ്റ്റർ ചെയ്യുകയും അന്വേഷണത്തിനായി പ്രത്യേക സംഘത്തെ നിയോഗിക്കുകയും ചെയ്തിട്ടുണ്ട്. സംഭവസ്ഥലത്തെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ പരിശോധനയിൽ നിന്നും മൂന്ന് പ്രതികളെ പോലീസ് തിരിച്ചറിഞ്ഞിട്ടുണ്ട്.
More Read
ഇതിൽ ഒരാളെ പോലീസ് ഇതിനകം തന്നെ അറസ്റ്റ് ചെയ്തു കഴിഞ്ഞു. ബാക്കി പ്രതികൾക്കായുള്ള തിരച്ചിൽ ഊർജ്ജിതമായി തുടരുകയാണ്. സംഭവസ്ഥലത്ത് ഫൊറൻസിക് വിദഗ്ധരും ഉന്നത പോലീസ് ഉദ്യോഗസ്ഥരും നേരിട്ടെത്തി തെളിവുകൾ ശേഖരിച്ചിട്ടുണ്ട്.
