വിവാഹനിശ്ചയം റദ്ദാക്കിയ പൃഥ്വി ഷായും ആകൃതിയും വീണ്ടും ഒന്നിച്ചു; പുതിയ തുടക്കമെന്ന് നടി

മുംബൈ: വിവാഹനിശ്ചയം റദ്ദാക്കി ഒരു മാസത്തിനുശേഷം ക്രിക്കറ്റ് താരം പൃഥ്വി ഷായും നടി ആകൃതി അഗർവാളും വീണ്ടും ഒന്നിച്ചു. ഇൻസ്റ്റഗ്രാമിലൂടെ പങ്കുവച്ച കുറിപ്പിലാണ് ആകൃതി ഇക്കാര്യം അറിയിച്ചത്.

ബന്ധത്തെക്കുറിച്ചുള്ള തെറ്റിദ്ധാരണകളും മറ്റുള്ളവരുടെ അഭിപ്രായങ്ങളും തങ്ങളുടെ തീരുമാനത്തെ സ്വാധീനിച്ചിരുന്നുവെന്ന് അവർ വ്യക്തമാക്കി. പൃഥ്വി ഷായും ആകൃതിയുടെ കുറിപ്പ് സ്വന്തം അക്കൗണ്ടിലൂടെ പങ്കുവച്ചു.

തെറ്റിദ്ധാരണകൾ മാറി; പുതിയ തുടക്കമെന്ന് ആകൃതി

‘വ്യക്തിപരമായ ഒരു വിശദീകരണം’ എന്ന തലക്കെട്ടിലാണ് ആകൃതി കുറിപ്പ് പങ്കുവച്ചത്. തങ്ങളുടെ ബന്ധത്തെക്കുറിച്ച് തങ്ങളേക്കാൾ കൂടുതൽ അറിയാമെന്ന രീതിയിൽ അഭിപ്രായപ്പെട്ട അടുപ്പമുള്ള ചിലരുടെ വാക്കുകൾ വിവാഹനിശ്ചയം റദ്ദാക്കാനുള്ള തീരുമാനത്തെ സ്വാധീനിച്ചുവെന്ന് അവർ പറഞ്ഞു.

പരസ്പരം തുറന്നുസംസാരിക്കാനും കാര്യങ്ങൾ മനസ്സിലാക്കാനും അവസരം നൽകാതെയാണ് അന്ന് തീരുമാനമെടുത്തതെന്നും ആകൃതി വ്യക്തമാക്കി.ആ തീരുമാനത്തിനും അതുമൂലമുണ്ടായ വേദനയ്ക്കും ഉത്തരവാദിത്തം ഏറ്റെടുക്കുന്നതായും അവർ കുറിച്ചു.

പിന്നീട് പൃഥ്വിയുമായി സംസാരിച്ച് പരസ്പരം മനസ്സിലാക്കിയശേഷമാണ് വീണ്ടും ഒന്നിക്കാൻ തീരുമാനിച്ചതെന്നും ആകൃതി അറിയിച്ചു.

സ്വകാര്യത മാനിക്കണമെന്ന് അഭ്യർഥന

തങ്ങളുടെ ബന്ധം ഇനി പരസ്പര ധാരണയിലും വിശ്വാസത്തിലും സ്നേഹത്തിലും അധിഷ്ഠിതമായിരിക്കണമെന്നാണ് ആഗ്രഹമെന്ന് ആകൃതി വ്യക്തമാക്കി.

പുതിയ തുടക്കത്തിലേക്ക് കടക്കുന്ന തങ്ങളുടെ തീരുമാനം മാനിക്കണമെന്നും അവർ അഭ്യർഥിച്ചു. ഷായും ഇമോജികൾക്കൊപ്പം ഇതേ കുറിപ്പ് പങ്കുവച്ചിട്ടുണ്ട്.

മാർച്ചിൽ വിവാഹനിശ്ചയം; സെപ്റ്റംബറിൽ വേർപിരിയൽ പ്രഖ്യാപനം

മാർച്ചിലായിരുന്നു പൃഥ്വി ഷായും ആകൃതി അഗർവാളും തമ്മിലുള്ള വിവാഹനിശ്ചയം. എന്നാൽ സെപ്റ്റംബർ 17ന് ഇരുവരും വേർപിരിയുന്നതായി ആകൃതി അറിയിക്കുകയായിരുന്നു.

ഭാവി ലക്ഷ്യങ്ങളും സാഹചര്യങ്ങളും പൊരുത്തപ്പെടാത്തതിനാൽ പരസ്പര ധാരണയോടെയാണ് തീരുമാനമെടുത്തതെന്നായിരുന്നു അന്നത്തെ വിശദീകരണം.

വേർപിരിയലിന്റെ കാരണങ്ങളെക്കുറിച്ച് ഊഹാപോഹങ്ങൾ പ്രചരിപ്പിക്കരുതെന്നും സ്വകാര്യത മാനിക്കണമെന്നും അവർ ആവശ്യപ്പെട്ടിരുന്നു.

ക്രിക്കറ്റ് കരിയർ തിരിച്ചുപിടിക്കാനുള്ള ശ്രമത്തിൽ പൃഥ്വി ഷാ

ക്രിക്കറ്റ് കരിയറിൽ തിരിച്ചുവരവിനായി ശ്രമിക്കുന്ന ഘട്ടത്തിലാണ് പൃഥ്വി ഷാ വ്യക്തിജീവിതത്തിലും പുതിയ തീരുമാനമെടുത്തിരിക്കുന്നത്. 2018ൽ വെസ്റ്റിൻഡീസിനെതിരെ സെഞ്ചറി നേടി ടെസ്റ്റ് ക്രിക്കറ്റിൽ അരങ്ങേറ്റം കുറിച്ച താരം ആഭ്യന്തര ക്രിക്കറ്റിലും ഫ്രാഞ്ചൈസി ക്രിക്കറ്റിലും അവസരങ്ങൾ തേടുകയാണ്.

2026ലെ ഐപിഎൽ ലേലത്തിന്റെ അവസാന ഘട്ടത്തിൽ 75 ലക്ഷം രൂപയ്ക്കാണ് ഡൽഹി ക്യാപിറ്റൽസ് പൃഥ്വി ഷായെ സ്വന്തമാക്കിയത്. എന്നാൽ സീസണിൽ ഒരു മത്സരത്തിൽപ്പോലും കളിക്കാൻ അവസരം ലഭിച്ചില്ല.

നേരത്തേ 2024 ഒക്ടോബറിൽ മുംബൈയുടെ രഞ്ജി ട്രോഫി ടീമിൽനിന്നും താരത്തെ ഒഴിവാക്കിയിരുന്നു.നിലവിൽ 26കാരനായ പൃഥ്വി ഷാ മഹാരാഷ്ട്രയ്ക്കുവേണ്ടിയാണ് ആഭ്യന്തര ക്രിക്കറ്റ് കളിക്കുന്നത്. ഈ വർഷത്തെ രഞ്ജി ട്രോഫിയിൽ മഹാരാഷ്ട്രയുടെ ക്യാപ്റ്റനുമാണ് താരം.

English Summary : Cricketer Prithvi Shaw and actress Aakriti Agarwal have reunited a month after calling off their engagement. In an Instagram post, Aakriti said that outside opinions and misunderstandings had influenced her earlier decision, but the couple later spoke openly and decided to give their relationship another chance. She has asked the public to respect their privacy as they begin a new chapter together.