ഓർക്കുട്ട് തിരിച്ചുവരുന്നു? പഴയ സൗഹൃദങ്ങളുടെ ലോകം പുനരുജ്ജീവിപ്പിക്കാൻ സ്ഥാപകന്റെ നീക്കം

ടെക്നോളജി ഡെസ്ക്: ഫെയ്സ്ബുക്കും ഇൻസ്റ്റഗ്രാമും സ്നാപ്ചാറ്റും സോഷ്യൽ മീഡിയ ലോകം കീഴടക്കുന്നതിന് മുൻപ് ഇന്റർനെറ്റ് ഉപയോക്താക്കളുടെ പ്രിയപ്പെട്ട ഇടമായിരുന്നു ഓർക്കുട്ട്.

2000-കളിൽ ഓർക്കുട്ടിലൂടെ സൗഹൃദങ്ങളും കൂട്ടായ്മകളും കണ്ടെത്തിയവർക്ക് ആ പഴയ കാലം വീണ്ടും ഓർമിക്കാം.

പ്ലാറ്റ്ഫോമിന്റെ സ്ഥാപകനായ ഓർക്കുട്ട് ബുയൂക്കോക്ടെൻ ഓർക്കുട്ടിനെ തിരിച്ചുകൊണ്ടുവരാനുള്ള നീക്കവുമായി രംഗത്തെത്തിയിരിക്കുകയാണ്.

പുതിയ പ്ലാറ്റ്ഫോം യാഥാർഥ്യമായാൽ സൗഹൃദങ്ങൾക്കും കൂട്ടായ്മകൾക്കും മനുഷ്യർ തമ്മിലുള്ള യഥാർഥ ബന്ധങ്ങൾക്കും മുൻഗണന നൽകുമെന്നാണ് സ്ഥാപകന്റെ നിലപാട്.

ഇതിനായി അദ്ദേഹം ഇന്റർനെറ്റ് ഉപയോക്താക്കളുടെ പിന്തുണ തേടിയിട്ടുണ്ട്. എന്നാൽ പുതിയ പ്ലാറ്റ്ഫോം എപ്പോൾ പുറത്തിറങ്ങുമെന്ന കാര്യത്തിൽ ഔദ്യോഗിക തീയതി പ്രഖ്യാപിച്ചിട്ടില്ല.

‘സോഷ്യൽ മീഡിയ വഴിതെറ്റി’; സ്ഥാപകന്റെ തുറന്ന കത്ത്

ഓർക്കുട്ടിന്റെ ഔദ്യോഗിക വെബ്സൈറ്റിൽ പ്രസിദ്ധീകരിച്ച തുറന്ന കത്തിലൂടെയാണ് പ്ലാറ്റ്ഫോം തിരിച്ചുകൊണ്ടുവരാനുള്ള ആശയം സ്ഥാപകൻ വിശദീകരിച്ചത്.

കഴിഞ്ഞ രണ്ട് പതിറ്റാണ്ടിനിടെ സോഷ്യൽ മീഡിയയിൽ സംഭവിച്ച മാറ്റങ്ങളെ അദ്ദേഹം വിമർശിച്ചു.

യഥാർഥ ബന്ധങ്ങൾ വളർത്തുന്നതിനുപകരം ഉപയോക്താക്കളുടെ ശ്രദ്ധ പരമാവധി പിടിച്ചുനിർത്തുന്നതിനാണ് ഇന്നത്തെ പല സോഷ്യൽ മീഡിയ പ്ലാറ്റ്ഫോമുകളും മുൻഗണന നൽകുന്നതെന്നാണ് അദ്ദേഹത്തിന്റെ വിമർശനം.

ഇന്റർനെറ്റ് കൂടുതൽ മാനുഷികമായിരുന്ന കാലവും അദ്ദേഹം കത്തിൽ ഓർത്തെടുത്തു. മറ്റൊരു ഭൂഖണ്ഡത്തിലുള്ള അപരിചിതനിൽ നിന്ന് ഒരു സന്ദേശം ലഭിക്കുന്നത് അന്ന് അത്ഭുതകരമായ അനുഭവമായിരുന്നുവെന്നും ആ ചെറിയ സന്തോഷത്തിന് യഥാർഥ ബന്ധങ്ങളുടെ ഊഷ്മളതയുണ്ടായിരുന്നുവെന്നും അദ്ദേഹം ചൂണ്ടിക്കാട്ടി.

അൽഗോരിതങ്ങൾക്കപ്പുറം യഥാർഥ ബന്ധങ്ങൾ

ഇന്നത്തെ സോഷ്യൽ മീഡിയയിൽ മനുഷ്യബന്ധങ്ങളെക്കാൾ അൽഗോരിതങ്ങൾക്ക് പ്രാധാന്യം ലഭിക്കുന്നുവെന്നാണ് ഓർക്കുട്ട് ബുയൂക്കോക്ടെന്റെ വിലയിരുത്തൽ. ഉപയോക്താക്കളുടെ ശ്രദ്ധ പിടിച്ചുപറ്റാനുള്ള മത്സരവും സാമൂഹിക മാധ്യമങ്ങളുടെ ഉപയോഗരീതിയും മനുഷ്യരെ ഏകാന്തതയിലേക്കും ഉത്കണ്ഠയിലേക്കും നയിക്കുന്നതായും അദ്ദേഹം അഭിപ്രായപ്പെട്ടു.

പുതിയ ഓർക്കുട്ടിലൂടെ ഈ പ്രവണതയ്ക്ക് ബദൽ ഒരുക്കുകയാണ് ലക്ഷ്യമിടുന്നത്. ആളുകൾക്ക് പരസ്പരം പരിചയപ്പെടാനും ആശയങ്ങൾ പങ്കുവയ്ക്കാനും പൊതുവായ താൽപര്യങ്ങളുടെ അടിസ്ഥാനത്തിൽ കൂട്ടായ്മകൾ സൃഷ്ടിക്കാനും കഴിയുന്ന ഇടം വീണ്ടും ഒരുക്കാനാണ് ശ്രമം.

2004-ൽ തുടക്കം; ഇന്ത്യയിലും ബ്രസീലിലും വൻ ജനപ്രീതി

ഗൂഗിൾ എൻജിനീയറായിരുന്ന ഓർക്കുട്ട് ബുയൂക്കോക്ടെൻ സൃഷ്ടിച്ച ഓർക്കുട്ട് 2004 ജനുവരിയിലാണ് ആരംഭിച്ചത്. ഇന്ത്യയിലും ബ്രസീലിലും ഉൾപ്പെടെ നിരവധി രാജ്യങ്ങളിൽ പ്ലാറ്റ്ഫോമിന് വലിയ ജനപ്രീതി ലഭിച്ചു.

പ്രൊഫൈലുകൾ, കമ്മ്യൂണിറ്റികൾ, ടെസ്റ്റിമോണിയലുകൾ തുടങ്ങിയ സവിശേഷതകളായിരുന്നു ഓർക്കുട്ടിനെ വ്യത്യസ്തമാക്കിയത്. സുഹൃത്തുക്കളെ കണ്ടെത്താനും പൊതുവായ താൽപര്യങ്ങളുള്ളവരുമായി ബന്ധപ്പെടാനും ഓൺലൈൻ കൂട്ടായ്മകളിൽ പങ്കാളികളാകാനും ഉപയോക്താക്കൾ ഈ സൗകര്യങ്ങൾ പ്രയോജനപ്പെടുത്തി.

2014-ൽ അടച്ചുപൂട്ടി; ഇനി പുതിയൊരു തുടക്കമോ?

ഫെയ്സ്ബുക്ക് ഉൾപ്പെടെയുള്ള സോഷ്യൽ മീഡിയ പ്ലാറ്റ്ഫോമുകൾക്ക് ജനപ്രീതി വർധിച്ചതോടെ ഓർക്കുട്ടിന്റെ സ്വാധീനം കുറഞ്ഞു. തുടർന്ന് 2014 സെപ്റ്റംബറിൽ ഗൂഗിൾ സേവനം അവസാനിപ്പിച്ചു.

പത്ത് വർഷത്തിലേറെ നീണ്ട ഇടവേളയ്ക്കുശേഷം ഓർക്കുട്ടിന്റെ പേര് വീണ്ടും ചർച്ചയാകുകയാണ്. എന്നാൽ പഴയ പ്ലാറ്റ്ഫോം അതേപടി തിരിച്ചെത്തുമോ, അതോ പുതിയ സാങ്കേതികവിദ്യകളും സൗകര്യങ്ങളുമുള്ള മറ്റൊരു സോഷ്യൽ നെറ്റ്വർക്കായി മാറുമോ എന്നത് വ്യക്തമല്ല.

പുതിയ പ്ലാറ്റ്ഫോമിന്റെ രൂപകൽപ്പന, പ്രവർത്തനസവിശേഷതകൾ, ലോഞ്ച് തീയതി എന്നിവ സംബന്ധിച്ച ഔദ്യോഗിക വിവരങ്ങൾ പുറത്തുവരാനുണ്ട്. അതിനാൽ ഓർക്കുട്ടിന്റെ തിരിച്ചുവരവ് ഇപ്പോൾ പ്രഖ്യാപനഘട്ടത്തിലുള്ള നീക്കമായാണ് കാണേണ്ടത്.

English Summary: Orkut founder Orkut Büyükkökten is seeking support to revive the social networking platform, with a renewed focus on genuine human connections and communities. In an open letter, he criticised modern social media for prioritising user attention over meaningful relationships. No official launch date has been announced.