നിയമപരമായ അനുമതിയോടെയാണ് കാർ ഉപയോഗിച്ചതെന്ന് കെ.എം. ഷാജി
തിരുവനന്തപുരം: റേഞ്ച് റോവർ ഉപയോഗിച്ച സംഭവവുമായി ബന്ധപ്പെട്ട വിവാദത്തിൽ വിശദീകരണവുമായി തദ്ദേശ സ്വയംഭരണ വകുപ്പ് മന്ത്രി കെ.എം. ഷാജി. കാറിന് മുന്നിൽ നിൽക്കുന്ന തരത്തിൽ പ്രചരിക്കുന്ന ചിത്രം എഐ ഉപയോഗിച്ച് സൃഷ്ടിച്ചതാണെന്ന് മന്ത്രി മാധ്യമങ്ങളോട് പറഞ്ഞു. സിപിഎം സൈബർ ലോബികൾ തനിക്കും കുടുംബത്തിനുമെതിരെ വ്യക്തിഹത്യ നടത്താൻ വ്യാജ ചിത്രങ്ങൾ പ്രചരിപ്പിക്കുകയാണെന്നും അദ്ദേഹം ആരോപിച്ചു.
കാർ ഉപയോഗിച്ചതിൽ ജാഗ്രതക്കുറവെന്ന് മന്ത്രി
റേഞ്ച് റോവർ ഉപയോഗിച്ചതിൽ ജാഗ്രതക്കുറവുണ്ടായെന്ന് സമ്മതിച്ച മന്ത്രി, എന്നാൽ ഉത്തരവ് പ്രകാരമാണ് വാഹനം ഉപയോഗിച്ചതെന്നും വ്യക്തമാക്കി. വാഹനത്തിന്റെ ഉപയോഗവുമായി ബന്ധപ്പെട്ട നിയമവശങ്ങൾ പരിശോധിച്ചിട്ടുണ്ടെന്നും നിയമലംഘനമുണ്ടെങ്കിൽ മാധ്യമങ്ങൾ അത് ചൂണ്ടിക്കാട്ടണമെന്നും അദ്ദേഹം പറഞ്ഞു.
സർക്കാർ അനുവദിച്ച ഔദ്യോഗിക വാഹനം സർവീസിലായിരുന്ന സാഹചര്യത്തിലാണ് സുഹൃത്തിന്റെ വാഹനം ഉപയോഗിച്ചതെന്നാണ് നേരത്തെയുള്ള വിശദീകരണം. സ്വകാര്യ വാഹനം ഔദ്യോഗിക ആവശ്യത്തിന് ഉപയോഗിച്ചതുമായി ബന്ധപ്പെട്ട് കുർഗിലേക്കുള്ള യാത്രയ്ക്ക് അനുമതി വാങ്ങിയിരുന്നുവെന്നും മന്ത്രി വ്യക്തമാക്കി.
സ്വകാര്യ വാഹനം ഉപയോഗിക്കുന്നതിനെക്കുറിച്ച് വിശദീകരണം
മന്ത്രിയുടെ വാദമനുസരിച്ച്, മന്ത്രിമാർക്ക് അനുവദിക്കുന്ന വാഹനം പ്രത്യേകമായി രജിസ്റ്റർ ചെയ്ത സ്റ്റേറ്റ് കാറായിരിക്കണമെന്നില്ല. സർക്കാർ ഉത്തരവുകളും ചട്ടങ്ങളും പാലിച്ചാണ് ഔദ്യോഗിക ആവശ്യങ്ങൾക്ക് വാഹനം ഉപയോഗിക്കുന്നതെന്നും അദ്ദേഹം പറഞ്ഞു. ഔദ്യോഗിക ആനുകൂല്യങ്ങൾ വ്യക്തിഗത ആവശ്യങ്ങൾക്ക് ഉപയോഗിക്കാൻ പാടില്ലെന്നും, അതേസമയം വ്യക്തിഗത വാഹനം ഔദ്യോഗിക ആവശ്യങ്ങൾക്ക് ഉപയോഗിക്കുന്നതിൽ തെറ്റില്ലെന്നുമാണ് മന്ത്രിയുടെ നിലപാട്.
More Read
റേഞ്ച് റോവർ ഉപയോഗിച്ചത് സ്ഥിരമായ സംവിധാനമല്ലെന്നും ആവശ്യമായ അനുമതികൾ വാങ്ങിയ ശേഷമാണ് വാഹനം ഉപയോഗിച്ചതെന്നുമാണ് ഷാജിയുടെ വിശദീകരണം.
വാഹനം ഇനി ഉപയോഗിക്കുമോ?
റേഞ്ച് റോവർ ഇനി ഉപയോഗിക്കുമോ എന്ന കാര്യത്തിൽ ഇപ്പോൾ തീരുമാനമെടുത്തിട്ടില്ലെന്ന് മന്ത്രി പറഞ്ഞു. വിവാദം ശക്തമായതിനെ തുടർന്ന് കാർ ഉടമയായ കണ്ണൂർ തില്ലങ്കേരി സ്വദേശി യാക്കൂബിന് വാഹനം തിരികെ നൽകിയിരുന്നു. സ്വകാര്യ വാഹനം ഔദ്യോഗിക വാഹനമായി ഉപയോഗിച്ചതിനെതിരെ പിന്നീട് സർക്കാരിലും മോട്ടോർ വാഹന കമ്മിഷണർക്കും പരാതിയും ലഭിച്ചിട്ടുണ്ട്.
കഴിഞ്ഞ സർക്കാരിന്റെ കാലത്തും മന്ത്രിമാർ സ്വകാര്യ വാഹനങ്ങൾ ഉപയോഗിച്ചിട്ടുണ്ടെന്നും ഷാജി കൂട്ടിച്ചേർത്തു. വിദേശയാത്ര സംബന്ധിച്ചും മന്ത്രി വിശദീകരണം നൽകി. വേൾഡ് മലയാളി ഫോറത്തിന്റെ പരിപാടിയിൽ പങ്കെടുക്കാനാണ് വിദേശത്തേക്ക് പോയതെന്നും പരിപാടി ബൾഗേറിയയിലായിരുന്നുവെന്നും അദ്ദേഹം വ്യക്തമാക്കി.
