കൊച്ചി: തെലങ്കാനയ്ക്ക് പുറമെ ആന്ധ്രപ്രദേശിലും വൻകിട അപ്പാരൽ പാർക്ക് സ്ഥാപിക്കാൻ കിറ്റെക്‌സ് ഗ്രൂപ്പിനെ ക്ഷണിച്ച് ആന്ധ്രപ്രദേശ് ഐ.ടി, മാനവവിഭവശേഷി മന്ത്രി നാരാ ലോകേഷ് കൊച്ചിയിൽ എത്തും. കിറ്റെക്‌സ് ഗാർമെന്റ്‌സ് മാനേജിങ് ഡയറക്ടർ സാബു എം. ജേക്കബുമായി ഇന്ന് വൈകിട്ട് 7.30ന് ബോൾഗാട്ടിയിലെ ഗ്രാൻഡ് ഹയാത്തിൽ കൂടിക്കാഴ്ച നടത്തും.
ആന്ധ്രപ്രദേശിൽ നിക്ഷേപം ആകർഷിക്കുന്നതിനുള്ള ലോകേഷിന്റെ തുടർച്ചയായ ശ്രമങ്ങളുടെ ഭാഗമായാണ് കൂടിക്കാഴ്ച.
അപ്പാരൽ പാർക്ക് സ്ഥാപിക്കാനാണ് ക്ഷണം
ആന്ധ്രപ്രദേശിലെ ടെക്‌സ്‌റ്റൈൽ, അപ്പാരൽ മേഖലകളിൽ കിറ്റെക്‌സ് ഗ്രൂപ്പിന്റെ നിക്ഷേപം ലക്ഷ്യമിട്ടാണ് സംസ്ഥാന സർക്കാർ നീക്കം നടത്തുന്നത്. ഇതിന്റെ ഭാഗമായി മാസങ്ങൾക്ക് മുമ്പ് ആന്ധ്ര ടെക്‌സ്‌റ്റൈൽസ് വകുപ്പ് മന്ത്രി എസ്. സവിത കൊച്ചിയിലെത്തി സാബു എം. ജേക്കബുമായി പ്രാഥമിക ചർച്ച നടത്തിയിരുന്നു.
ഇതിന്റെ തുടർനടപടിയായാണ് ഇപ്പോൾ നാരാ ലോകേഷിന്റെ നേതൃത്വത്തിലുള്ള ഉന്നതതല സംഘം നേരിട്ട് ചർച്ച നടത്തുന്നത്.
ജനപ്രതിനിധികളും ഉദ്യോഗസ്ഥരും സംഘത്തിൽ
ബല്ലി കല്യാണചക്രവർത്തി എം.എൽ.സി ഉൾപ്പെടെയുള്ള ജനപ്രതിനിധികളും ഉദ്യോഗസ്ഥരും നാരാ ലോകേഷിനൊപ്പമുണ്ടാകും.
More Read
ആന്ധ്രപ്രദേശിൽ വ്യവസായ നിക്ഷേപം വർധിപ്പിക്കുന്നതിനായി വിവിധ മേഖലകളിലെ കമ്പനികളുമായി ലോകേഷ് തുടർച്ചയായി ചർച്ചകൾ നടത്തിവരികയാണ്. സെപ്റ്റംബർ 25ന് ഗുജറാത്തിലെ വ്യവസായ പ്രതിനിധികളുമായും അദ്ദേഹം നിക്ഷേപ സാധ്യതകൾ സംബന്ധിച്ച് കൂടിക്കാഴ്ച നടത്തിയിരുന്നു.
തെലങ്കാനയ്ക്ക് പിന്നാലെ ആന്ധ്രയിലേക്കും
കിറ്റെക്‌സ് ഗ്രൂപ്പ് തെലങ്കാനയിൽ വൻ നിക്ഷേപ പദ്ധതി പ്രഖ്യാപിച്ച പശ്ചാത്തലത്തിലാണ് ആന്ധ്രപ്രദേശിന്റെ പുതിയ ക്ഷണം. ആന്ധ്രയിലും അപ്പാരൽ മേഖലയിലെ വലിയ നിക്ഷേപം കൊണ്ടുവരുകയാണ് സംസ്ഥാന സർക്കാരിന്റെ ലക്ഷ്യം.
അതേസമയം, കൊച്ചിയിലെ ഇന്നത്തെ കൂടിക്കാഴ്ചയിൽ നിക്ഷേപത്തിന്റെ സാധ്യതകളും പദ്ധതിയുടെ വിശദാംശങ്ങളും സംബന്ധിച്ച് കൂടുതൽ ചർച്ചകൾ നടക്കുമെന്നാണ് പ്രതീക്ഷിക്കുന്നത്.
English Summary:
Andhra Pradesh IT and HRD Minister Nara Lokesh is scheduled to meet Kitex Garments Managing Director Sabu M. Jacob in Kochi on September 29 to invite the Kitex Group to establish a major apparel park in Andhra Pradesh. The meeting is part of Andhra Pradesh’s efforts to attract investments in the textile and apparel sectors. A preliminary discussion had earlier been held between Sabu Jacob and Andhra Pradesh Textiles Minister S. Savitha in Kochi.
