തിരുവനന്തപുരം: കേന്ദ്രസർക്കാർ നടപ്പിലാക്കുന്ന പിഎം ശ്രീ പദ്ധതിയുമായി കേരളത്തിന് മുന്നോട്ടുപോകാമെന്ന് പൊതുവിദ്യാഭ്യാസ ഡയറക്ടർ സർക്കാരിന് ശുപാർശ നൽകി. സ്കൂളുകളുടെ അടിസ്ഥാന വികസനം ലക്ഷ്യമിട്ടുള്ള ഈ പദ്ധതിയുടെ നിബന്ധനകളിൽ സംസ്ഥാനത്തിന്റെ പാഠ്യപദ്ധതി മാറ്റണമെന്ന് നിർബന്ധമില്ലെന്നാണ് റിപ്പോർട്ടിൽ വ്യക്തമാക്കുന്നത്. എന്നാൽ ഈ ഉദ്യോഗസ്ഥ റിപ്പോർട്ടിന്മേൽ അന്തിമ തീരുമാനം കൈക്കൊള്ളേണ്ടത് സംസ്ഥാന സർക്കാരാണ്.
പദ്ധതിയുടെ ഭാഗമായാലും കേരളത്തിന്റെ നിലവിലെ വിദ്യാഭ്യാസ നയത്തിൽ മാറ്റം വരുത്തേണ്ടി വരില്ലെന്ന് റിപ്പോർട്ട് ഉറപ്പുനൽകുന്നു. കേന്ദ്ര നിബന്ധനകളിൽ പ്രത്യേക പാഠ്യപദ്ധതി വേണമെന്ന് പറയുന്നില്ല. സ്കൂളുകളിൽ എൻസിഇആർടി പാഠപുസ്തകങ്ങൾ തന്നെ പഠിപ്പിക്കണമെന്ന് യാതൊരു നിർബന്ധവുമില്ല. കേരളത്തിന്റെ സ്വന്തം എസ്സിഇആർടി പാഠപുസ്തകങ്ങൾ ഉപയോഗിച്ച് തന്നെ വിദ്യാർത്ഥികൾക്ക് തുടർന്നും പഠനം നടത്താം. വിദ്യാലയങ്ങളിൽ സ്ഥാപിക്കുന്ന പിഎം ശ്രീ ബോർഡുകളിൽ മാത്രമായിരിക്കും കേന്ദ്ര നിബന്ധനകൾ പാലിക്കേണ്ടി വരിക.
അതേസമയം ഈ പദ്ധതിയുടെ ഭാഗമാകുമ്പോൾ പ്രധാനമന്ത്രിയുടെ ചിത്രം പതിച്ച ബോർഡുകൾ സ്കൂളുകളിൽ സ്ഥാപിക്കണമെന്ന നിബന്ധനയുണ്ട്. കേന്ദ്ര വിഹിതമായ സമഗ്ര ശിക്ഷാ കേരളം അഥവാ എസ്എസ്കെ ഫണ്ടുകൾ സംസ്ഥാനത്തിന് ലഭിക്കണമെങ്കിൽ ഈ പദ്ധതിയിൽ പങ്കാളികളാകണമെന്ന് ഡയറക്ടറുടെ റിപ്പോർട്ട് ഓർമ്മിപ്പിക്കുന്നു. പദ്ധതിയിൽ ചേരാൻ തയ്യാറായില്ലെങ്കിൽ വിദ്യാഭ്യാസ വികസനത്തിനുള്ള ഈ നിർണായക ഫണ്ടുകൾ കേരളത്തിന് ലഭ്യമാകില്ല. പൊതുവിദ്യാഭ്യാസ ഡയറക്ടർ മന്ത്രിക്ക് നൽകിയ റിപ്പോർട്ടിലെ ഈ വിവരങ്ങൾ പുറത്തുവന്നതോടെ ഇനി വിഷയത്തിൽ സംസ്ഥാന സർക്കാരിന്റെ രാഷ്ട്രീയവും ഭരണപരവുമായ തീരുമാനമാണ് അറിയേണ്ടത്.
കേന്ദ്രസർക്കാർ 2020ൽ പ്രഖ്യാപിച്ച പുതിയ ദേശീയ വിദ്യാഭ്യാസ നയത്തിന്റെ തുടർച്ചയായി 2022 സെപ്റ്റംബർ 7നാണ് പ്രധാനമന്ത്രി സ്കൂൾ ഫോർ റൈസിംഗ് ഇന്ത്യ അഥവാ പിഎം ശ്രീ പദ്ധതി അവതരിപ്പിച്ചത്. സർക്കാർ സ്കൂളുകളുടെ അടിസ്ഥാന സൗകര്യ വികസനമാണ് ഈ പദ്ധതിയിലൂടെ പ്രധാനമായും ലക്ഷ്യമിടുന്നത്. രാജ്യത്തെ പതിനാലായിരത്തി അഞ്ഞൂറോളം സർക്കാർ സ്കൂളുകളെ മികച്ച മാതൃകാ സ്ഥാപനങ്ങളായി ഉയർത്താനാണ് കേന്ദ്രസർക്കാർ ഇതിലൂടെ ശ്രമിക്കുന്നത്. ഇരുപത്തി ഏഴായിരം കോടി രൂപയാണ് ഈ വൻകിട പദ്ധതിക്കായി കേന്ദ്രം വകയിരുത്തിയിരിക്കുന്നത്.
ഈ പദ്ധതിയിൽ പ്രവേശിക്കുന്നതിനായി സ്കൂളുകൾക്ക് ചില പ്രത്യേക മാനദണ്ഡങ്ങൾ ഏർപ്പെടുത്തിയിട്ടുണ്ട്. ഓരോ ബ്ലോക്കിൽ നിന്നും രണ്ട് സ്കൂളുകൾ വീതമാണ് പദ്ധതിക്കായി തിരഞ്ഞെടുക്കുന്നത്. സ്കൂൾ കെട്ടിടത്തിന്റെ ഗുണനിലവാരം, കുട്ടികൾക്കുള്ള ടോയ്ലെറ്റ് സൗകര്യം തുടങ്ങി വിവിധ വശങ്ങളാണ് ഇതിനായി പരിശോധിക്കുന്നത്. കൂടാതെ സ്കൂളിന്റെ അടിസ്ഥാന സൗകര്യങ്ങൾ, കുട്ടികളുടെ പഠന നിലവാരം, അധ്യാപകരുടെ പങ്കാളിത്തം എന്നിവ വിലയിരുത്തി മാർക്കുകൾ നൽകും. നഗരപ്രദേശങ്ങളിൽ എഴുപത് ശതമാനവും ഗ്രാമപ്രദേശങ്ങളിൽ അറുപത് ശതമാനവും സ്കോർ നേടുന്ന സ്കൂളുകൾക്ക് പദ്ധതിയിലേക്ക് അപേക്ഷിക്കാം.
More Read
പദ്ധതിയിൽ പങ്കാളികളാകാൻ കേന്ദ്ര വിദ്യാഭ്യാസ മന്ത്രാലയവുമായി പ്രത്യേക ധാരണാപത്രത്തിൽ ഒപ്പുവെക്കേണ്ടതുണ്ട്. സംസ്ഥാനങ്ങൾ, കേന്ദ്രഭരണപ്രദേശങ്ങൾ, കേന്ദ്രീയ വിദ്യാലയ സംഗതൻ, നവോദയ വിദ്യാലയ സമിതി എന്നിവരാണ് ഈ ധാരണപത്രത്തിൽ ഒപ്പുവെക്കേണ്ടത്. തിരഞ്ഞെടുക്കപ്പെടുന്ന സ്കൂളുകളുടെ പേരിന് മുന്നിലായി പിഎം ശ്രീ എന്ന് നിർബന്ധമായും ചേർക്കണമെന്ന നിബന്ധന കേന്ദ്രത്തിനുണ്ട്. പദ്ധതി പ്രഖ്യാപിച്ച സമയത്ത് തന്നെ കേരളം ഉൾപ്പെടെയുള്ള ബിജെപി ഇതര സംസ്ഥാനങ്ങൾ ഇതിനെതിരെ കടുത്ത വിയോജിപ്പ് പ്രകടിപ്പിച്ചിരുന്നു.
ഡൽഹി, പഞ്ചാബ് സംസ്ഥാനങ്ങളിൽ സമാനമായ പദ്ധതികൾ അന്നത്തെ ആംആദ്മി പാർട്ടി സർക്കാരുകൾ നടപ്പിലാക്കിയിരുന്നതിനാൽ അവർ പദ്ധതിയിൽ ചേരില്ലെന്ന് ആദ്യമേ അറിയിച്ചിരുന്നു. സ്കൂളുകളുടെ പേരിനൊപ്പം പിഎം ശ്രീ എന്ന് ചേർക്കാൻ കഴിയില്ലെന്ന നിലപാടാണ് പശ്ചിമ ബംഗാൾ സ്വീകരിച്ചത്. എന്നാൽ പിന്നീട് പഞ്ചാബ് ഈ പദ്ധതിയുടെ ഭാഗമാകാൻ തയ്യാറായി. അതേസമയം കേന്ദ്രം ഫണ്ട് നിഷേധിച്ചതിനെതിരെ പശ്ചിമ ബംഗാളും തമിഴ്നാടും നിലവിൽ സുപ്രീം കോടതിയെ സമീപിച്ച് നിയമപോരാട്ടം നടത്തുകയാണ്.
English Summary
More Read
The Director of General Education has recommended that Kerala can proceed with the Central Government’s PM SHRI scheme, as changing the state curriculum is not mandatory. However, schools must display boards featuring the Prime Minister’s photo. Skipping the project could result in losing crucial SSK funds from the Centre.
