ആലപ്പുഴ: കരുവാറ്റ കൊലപാതകത്തിൽ കൂടുതൽ നിർണായക വിവരങ്ങൾ പുറത്ത്. കൊല്ലപ്പെട്ട ശിവൻകുട്ടിയോട് പെൺകുട്ടിക്ക് കടുത്ത പകയുണ്ടായിരുന്നെന്നാണ് പൊലീസ് കണ്ടെത്തിയത്. കൊലപാതകത്തിന് മുമ്പ് വീട്ടിൽ മോഷണശ്രമം നടത്തിയ പെൺകുട്ടിയെ ശിവൻകുട്ടി കണ്ടതും തുടർന്ന് ഇരുവരും തമ്മിൽ തർക്കമുണ്ടായതുമാണ് അന്വേഷണത്തിലെ പ്രധാന കണ്ടെത്തൽ.
കരുവാറ്റ കൊലപാതകത്തിലേക്ക് നയിച്ചത് പകയെന്ന് പൊലീസ്
വീട്ടിൽ മോഷണശ്രമം നടത്തുന്നതിനിടെ ശിവൻകുട്ടി പെൺകുട്ടിയെ കണ്ടെന്നാണ് പൊലീസ് പറയുന്നത്. ഇതേച്ചൊല്ലി ഇരുവരും തമ്മിൽ വീട്ടിൽ വഴക്കുണ്ടായി.
ഇതിനിടെ പെൺകുട്ടിയെ ‘കള്ളി’ എന്ന് വിളിച്ചതാണ് വിദ്വേഷം കൂടുതൽ ശക്തമാക്കാൻ കാരണമായതെന്നാണ് അന്വേഷണ സംഘത്തിന്റെ കണ്ടെത്തൽ. അന്ന് രാത്രി തന്നെ ശിവൻകുട്ടിയെ കൊലപ്പെടുത്തണമെന്ന് ആൺസുഹൃത്തിനോട് പെൺകുട്ടി പറഞ്ഞതായും പൊലീസ് പറയുന്നു.
‘ബാഡ് ടച്ച്’ ആരോപണവും പരിശോധിക്കും
More Read
സംഭവം നടന്ന രാത്രിയിൽ നടന്നതായി പെൺകുട്ടി ഉന്നയിക്കുന്ന ‘ബാഡ് ടച്ച്’ ആരോപണവും ശാസ്ത്രീയമായി പരിശോധിക്കുമെന്ന് പൊലീസ് വ്യക്തമാക്കി.
പെൺകുട്ടിയെ വിശദമായി ചോദ്യം ചെയ്യുന്നതിനായി സൈക്കോളജിസ്റ്റ് ഉൾപ്പെടുന്ന മെഡിക്കൽ ബോർഡ് രൂപീകരിക്കും. കൂടാതെ വൈദ്യപരിശോധനയ്ക്കും വിധേയയാക്കും.
പിടിയിലായ നാല് കുട്ടികളുടെയും കസ്റ്റഡി ആവശ്യപ്പെട്ട് അന്വേഷണ സംഘം ജുവനൈൽ ജസ്റ്റിസ് ബോർഡിന് മുന്നിൽ അപേക്ഷ നൽകിയിട്ടുണ്ട്.
കൊലപാതകം അച്ഛന്റെ പേരിലാക്കാനും ശ്രമം
അതേസമയം, കൊലപാതകത്തിന്റെ ഉത്തരവാദിത്തം പെൺകുട്ടിയുടെ അച്ഛന്റെ പേരിലേക്ക് മാറ്റാനും പ്രതികൾ ശ്രമിച്ചതായി പൊലീസ് പറയുന്നു. അച്ഛനും ശിവൻകുട്ടിയും തമ്മിൽ ശത്രുതയുണ്ടെന്ന് പെൺകുട്ടി മൊഴി നൽകിയിരുന്നു.
പെൺകുട്ടിയുടെ വയറ്റിൽ മുഴയുണ്ടായിരുന്നുവെന്നും ചികിത്സയ്ക്കായി പണം നൽകാനാണ് ഹരിപ്പാട് എത്തിയതെന്നുമായിരുന്നു പ്രതികളുടെ മൊഴി. എന്നാൽ ശാസ്ത്രീയ തെളിവുകൾ ഉപയോഗിച്ച് പൊലീസ് ഈ വാദങ്ങൾ പൊളിച്ചെന്നാണ് വിവരം.
പെൺകുട്ടി എവിടെയായിരുന്നു? അന്വേഷണം തുടരുന്നു
കൊലപാതകം നടന്ന സമയത്ത് പെൺകുട്ടി എവിടെയായിരുന്നു എന്നതിൽ ഇപ്പോഴും ദുരൂഹത തുടരുകയാണ്. എന്നാൽ പെൺകുട്ടി കരുവാറ്റയിൽനിന്ന് പോയിട്ടില്ലെന്നാണ് പൊലീസ് കണ്ടെത്തിയിരിക്കുന്നത്.
കൊല്ലത്ത് താമസിച്ചിരുന്ന സമയത്തും പെൺകുട്ടി അയൽവാസികളുമായി അധികം ബന്ധം പുലർത്തിയിരുന്നില്ലെന്നാണ് വിവരം. അതേസമയം, പെൺകുട്ടി മാന്യമായാണ് പെരുമാറിയിരുന്നതെന്ന് അയൽവാസികൾ പറയുന്നു.
തെളിവുകൾ നിരത്തിയ ശേഷമാണ് വീട്ടുകാർ വിശ്വസിച്ചത്
കരുവാറ്റയിലെ കൊലപാതകത്തിന് പിന്നിൽ കുട്ടികളാണെന്ന വിവരം പൊലീസ് എത്തിയപ്പോഴാണ് വീട്ടുകാർ അറിയുന്നത്. ആദ്യം കുടുംബാംഗങ്ങൾ ഇത് വിശ്വസിച്ചില്ലെങ്കിലും പിന്നീട് പൊലീസ് തെളിവുകൾ മുന്നിൽവെച്ചതോടെയാണ് കാര്യങ്ങൾ വ്യക്തമായത്.
പൊലീസിനെ കണ്ടപ്പോഴും കുട്ടികൾക്ക് പ്രത്യേക ഭാവവ്യത്യാസമില്ലായിരുന്നുവെന്നാണ് അന്വേഷണ സംഘത്തിന്റെ വിലയിരുത്തൽ. സ്ഥിരമായി യാത്ര ചെയ്യുന്ന സ്വഭാവമുള്ളവരാണ് കുട്ടികളെന്നും പൊലീസ് പറയുന്നു.
മുൻകാല ക്രിമിനൽ പശ്ചാത്തലം കണ്ടെത്തിയില്ല
അറസ്റ്റിലായ മൂന്ന് പരവൂർ സ്വദേശികളും സാമ്പത്തികമായി പിന്നാക്ക കുടുംബങ്ങളിൽ നിന്നുള്ളവരാണെന്നാണ് വിവരം. ഇവർക്ക് മുൻകാല ക്രിമിനൽ പശ്ചാത്തലമുണ്ടായിരുന്നതായി ഇതുവരെയുള്ള അന്വേഷണത്തിൽ കണ്ടെത്തിയിട്ടില്ല.
അന്വേഷണത്തിന്റെ ആദ്യഘട്ടത്തിൽ തന്നെ കൊലപാതകത്തിന് പിന്നിൽ പ്രൊഫഷണൽ കുറ്റവാളിയല്ലെന്ന് പൊലീസ് ഉറപ്പിച്ചിരുന്നു. വീട്ടിനുള്ളിലെ ഒരാളുടെ സഹായം ലഭിച്ചിട്ടുണ്ടാകാമെന്ന സംശയത്തിനിടെയാണ് എട്ടാം ക്ലാസുകാരിക്ക് സംഭവത്തിൽ പങ്കുണ്ടെന്ന നിഗമനത്തിലേക്ക് അന്വേഷണ സംഘം എത്തിയത്.
ആറ് പവൻ സ്വർണം നഷ്ടപ്പെട്ടു
67 വയസുള്ള ശിവൻകുട്ടിയെ വീട്ടിൽ മരിച്ച നിലയിലാണ് കണ്ടെത്തിയത്. സംഭവസ്ഥലത്ത് നിന്ന് ആറ് പവൻ സ്വർണം നഷ്ടപ്പെട്ടതായും പൊലീസ് കണ്ടെത്തിയിരുന്നു.
കൂട്ടുപ്രതികൾ പെൺകുട്ടിക്കൊപ്പം പഠിച്ചവരും പരിചയക്കാരുമാണെന്നാണ് വിവരം. അതേസമയം, സംഭവത്തിലേക്ക് നയിച്ച സാഹചര്യങ്ങളും കൊലപാതകത്തിന്റെ കൃത്യമായ കാരണങ്ങളും കേന്ദ്രീകരിച്ച് പൊലീസ് അന്വേഷണം തുടരുകയാണ്.
കുട്ടികൾക്കെതിരെ ബാധകമായ നിയമപ്രകാരമുള്ള തുടർനടപടികളാണ് ഇനി ഉണ്ടാകുക. കേസിൽ കൂടുതൽ തെളിവുകൾ ശേഖരിച്ച ശേഷമായിരിക്കും അന്വേഷണ സംഘം തുടർ നടപടികളിലേക്ക് കടക്കുക.
