ഇടുക്കി: പ്രതിസന്ധിയിലായ മധ്യവയസ്കനോട് പൊലീസിന്റെ കാർക്കശ്യമല്ല, സ്നേഹത്തോടെയുള്ള സമീപനമാണ് വേണ്ടതെന്ന് തിരിച്ചറിഞ്ഞ് ഇടപെട്ട് എസ്.ഐ ടി.ബി. ബിബിൻ. ഉത്രാട ദിനത്തിൽ നടത്തിയ സമയോചിത ഇടപെടലിലൂടെ ഒരാളെ സുരക്ഷിതമായി ജീവിതത്തിലേക്ക് തിരികെ കൊണ്ടുവരാൻ അദ്ദേഹത്തിനും സംഘത്തിനും കഴിഞ്ഞു. സംഭവത്തിന്റെ വീഡിയോ സമൂഹമാധ്യമങ്ങളിൽ ശ്രദ്ധ നേടി.
എസ്.ഐ ബിബിന്റെ സ്നേഹത്തോടെയുള്ള ഇടപെടൽ
ഓഗസ്റ്റ് 25ന് രാവിലെ 11.30ഓടെയായിരുന്നു സംഭവം. ഭാര്യയുമായുണ്ടായ തർക്കത്തെ തുടർന്ന് തടിയമ്പാട് കാർത്ത്യായനിക്കവല സ്വദേശിയായ മധ്യവയസ്കൻ കടുത്ത മാനസിക സമ്മർദത്തിലായിരുന്നു.
സംഭവത്തെ തുടർന്ന് ഭാര്യ കൺട്രോൾ റൂമിൽ വിവരം അറിയിക്കുകയും മിനിറ്റുകൾക്കകം എസ്.ഐ ബിബിന്റെ നേതൃത്വത്തിലുള്ള പൊലീസ് സംഘം സ്ഥലത്തെത്തുകയും ചെയ്തു.
കാർക്കശ്യമല്ല, കരുതലാണ് വേണ്ടതെന്ന് തിരിച്ചറിഞ്ഞു
പൊലീസ് എത്തിയപ്പോഴേക്കും ഇയാൾ മുറിക്കുള്ളിൽ കയറി വാതിലടച്ചിരുന്നു. സ്ഥിതിഗതികൾ മനസിലാക്കിയ എസ്.ഐ ബിബിൻ ശാന്തമായി സംസാരിച്ച് ഇയാളെ അനുനയിപ്പിക്കാൻ ശ്രമിച്ചു.
‘ചേട്ടാ, എന്ത് പ്രശ്നമുണ്ടെങ്കിലും നമുക്ക് തീർക്കാം’ എന്ന സ്നേഹത്തോടെയുള്ള സമീപനമാണ് ബിബിൻ സ്വീകരിച്ചത്. തുടർന്ന് ഇയാൾ പൊലീസിനോട് സഹകരിക്കുകയും സുരക്ഷിതമായി പുറത്തുവരികയും ചെയ്തു.
അരമണിക്കൂറിലേറെ സംസാരിച്ചു
എസ്.ഐ ബിബിൻ, ഗ്രേഡ് എസ്.ഐ നോബിൾ, സി.പി.ഒമാരായ കെ. സയോൺ രാജ്, ജിമ്മി എന്നിവർ ചേർന്ന് അരമണിക്കൂറിലേറെ ഇയാളുമായി സംസാരിച്ചു.
അദ്ദേഹത്തിന്റെ പ്രശ്നങ്ങളും സങ്കടങ്ങളും പൊലീസ് സംഘം ക്ഷമയോടെ കേട്ടു. തുടർന്ന് സാഹചര്യം ശാന്തമാക്കുകയും ആവശ്യമായ പിന്തുണ നൽകുകയും ചെയ്തു.
സോഷ്യൽ മീഡിയയിൽ കൈയടി
സംഭവത്തിൽ നിലവിൽ കേസെടുത്തിട്ടില്ല. അതേസമയം, പൊലീസ് നടത്തിയ ഇടപെടലിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ നിരവധിപേർ എസ്.ഐ ബിബിനെയും സംഘത്തെയും അഭിനന്ദിച്ച് രംഗത്തെത്തി.
More Read
പ്രതിസന്ധി നേരിടുന്ന ഒരാളോട് മാനുഷികമായ സമീപനം സ്വീകരിച്ചതാണ് സമൂഹമാധ്യമങ്ങളിൽ ബിബിന്റെ ഇടപെടലിന് വലിയ സ്വീകാര്യത നേടിയത്.
ദിവസങ്ങൾക്ക് മുമ്പാണ് ഇടുക്കിയിലെത്തിയത്
എറണാകുളം വടക്കൻ പറവൂർ സ്വദേശിയായ ബിബിൻ 38 വയസുകാരനാണ്. തൈക്കൂട്ടത്തിൽ ബാബുവിന്റെയും തങ്കയുടെയും മകനായ ബിബിന്റെ ഭാര്യ കെ.എസ്. സനിതയാണ്. എട്ട് വയസുകാരിയായ നിഹാരികയാണ് മകൾ.
പറവൂർ എസ്.ഐയായി സേവനമനുഷ്ഠിച്ചിരുന്ന ബിബിൻ ദിവസങ്ങൾക്ക് മുമ്പാണ് ഇടുക്കിയിലേക്ക് സ്ഥലംമാറിയെത്തിയത്. എട്ട് വർഷമായി പൊലീസ് സേനയിൽ സേവനം ചെയ്യുന്നു.
‘ആളെ രക്ഷിക്കുകയെന്നത് മാത്രമായിരുന്നു ലക്ഷ്യം’
സംഭവത്തെക്കുറിച്ച് എസ്.ഐ ബിബിന്റെ വാക്കുകളും ശ്രദ്ധേയമാണ്. “ആ സമയത്ത് അങ്ങനെ പറയാനാണ് തോന്നിയത്. മറ്റൊന്നും ചിന്തിച്ചില്ല. ആളെ രക്ഷിക്കുകയെന്നത് മാത്രമായിരുന്നു ലക്ഷ്യം” എന്നാണ് അദ്ദേഹം പ്രതികരിച്ചത്.
അതേസമയം, ഉത്രാട ദിനത്തിൽ നടന്ന ഈ ഇടപെടൽ പൊലീസിന്റെ ഉത്തരവാദിത്വത്തിനൊപ്പം മാനുഷികതയും ഉയർത്തിക്കാട്ടുന്ന സംഭവമായി മാറി.
