മലേഷ്യയിൽ നിന്ന് നാട്ടിലേക്ക് മടങ്ങിയ പ്രവാസിയെ സ്വീകരിക്കാൻ മൂന്ന് സ്ത്രീകൾ ഒരേസമയം എത്തിയതിനെത്തുടർന്ന് ധാക്ക വിമാനത്താവളത്തിൽ സംഘർഷമുണ്ടായെന്ന റിപ്പോർട്ടുകൾ സോഷ്യൽ മീഡിയയിൽ ചർച്ചയാകുന്നു.
യുവാവിന്റെ ഭാര്യമാരാണെന്ന് അവകാശപ്പെട്ടെത്തിയ സ്ത്രീകൾ തമ്മിൽ വാക്കേറ്റവും കൈയാങ്കളിയും ഉണ്ടായെന്നാണ് പ്രചരിക്കുന്ന വീഡിയോയിലെ ദൃശ്യങ്ങൾ. എന്നാൽ സംഭവത്തിന്റെ യാഥാർഥ്യത്തെക്കുറിച്ച് ഇതുവരെ വ്യക്തതയില്ല.
മൂന്ന് സ്ത്രീകൾ, ഒരേ അവകാശവാദം
ബംഗ്ലാദേശ് തലസ്ഥാനമായ ധാക്കയിലെ ഹസ്രത്ത് ഷാജലാൽ രാജ്യാന്തര വിമാനത്താവളത്തിലാണ് സംഭവം നടന്നതെന്നാണ് റിപ്പോർട്ടുകൾ. മലേഷ്യയിൽ നിന്ന് മടങ്ങിയെത്തിയ ബംഗ്ലാദേശി പ്രവാസിയെ സ്വീകരിക്കാനാണ് മൂന്ന് സ്ത്രീകൾ ഒരേസമയം എത്തിയത്.
യുവാവിന്റെ യഥാർത്ഥ ഭാര്യ താനാണെന്ന് ഓരോരുത്തരും അവകാശപ്പെട്ടതോടെ തർക്കം ആരംഭിച്ചതായാണ് വിവരം. യുവാവിനെ സ്വന്തം വീട്ടിലേക്ക് കൊണ്ടുപോകണമെന്ന് മൂന്നുപേരും നിർബന്ധം പിടിച്ചതോടെ വാക്കേറ്റം രൂക്ഷമായി.
വിമാനത്താവളത്തിന് പുറത്ത് കൈയാങ്കളി
തർക്കം പിന്നീട് കൈയാങ്കളിയിലേക്ക് നീങ്ങിയെന്നും വിമാനത്താവളത്തിന് പുറത്ത് ബഹളമുണ്ടായെന്നും പ്രചരിക്കുന്ന ദൃശ്യങ്ങൾ സൂചിപ്പിക്കുന്നു. സ്ഥിതിഗതികൾ വഷളായതോടെ വിമാനത്താവള സുരക്ഷാ ഉദ്യോഗസ്ഥർ സ്ഥലത്തെത്തി ഇടപെട്ടാണ് പ്രശ്നം അവസാനിപ്പിച്ചതെന്നാണ് റിപ്പോർട്ട്.
എന്നാൽ സംഭവത്തിൽ ഔദ്യോഗിക വിശദീകരണം ലഭ്യമായിട്ടില്ല. യുവാവിന്റെയോ ഇയാളെ സ്വീകരിക്കാനെത്തിയ സ്ത്രീകളുടെയോ വ്യക്തിവിവരങ്ങളും പുറത്തുവന്നിട്ടില്ല.
വൈറൽ വീഡിയോയുടെ യാഥാർഥ്യത്തിൽ സംശയം
2026 നവംബർ 10-നാണ് സംഭവം നടന്നതെന്നാണ് സോഷ്യൽ മീഡിയയിൽ പ്രചരിക്കുന്ന വിവരം. എന്നാൽ വീഡിയോ യഥാർത്ഥ സംഭവത്തിന്റേതാണോ എന്ന കാര്യത്തിൽ സംശയങ്ങൾ ഉയർന്നിട്ടുണ്ട്.
വൈറലാകാൻ വേണ്ടി ആസൂത്രണം ചെയ്ത് ചിത്രീകരിച്ച ദൃശ്യങ്ങളാണോ ഇതെന്നും ചിലർ ചോദിക്കുന്നു. വിവിധ അന്താരാഷ്ട്ര മാധ്യമങ്ങൾ സംഭവം റിപ്പോർട്ട് ചെയ്തതായും പറയപ്പെടുന്നു. എന്നിരുന്നാലും വീഡിയോയുടെ ആധികാരികതയും സംഭവത്തിന്റെ പൂർണവിവരങ്ങളും സ്വതന്ത്രമായി സ്ഥിരീകരിക്കപ്പെട്ടിട്ടില്ല.
English Summary
A video reportedly showing three women claiming to be the wives of a Bangladeshi expatriate has sparked debate on social media. The women allegedly arrived at Hazrat Shahjalal International Airport in Dhaka to receive the man returning from Malaysia. An argument reportedly escalated into a physical altercation before airport security intervened. The incident is said to have taken place on November 10, 2026, but the authenticity of the viral video and the details of the incident remain unverified.
