പത്തനംതിട്ട: തിരുവല്ല ആനന്ദേശ്വരം ക്ഷേത്രവുമായി ബന്ധപ്പെട്ട ഭൂമി വിവാദത്തിൽ പ്രതിഷേധം ശക്തമായി. ക്ഷേത്രഭൂമിയിൽ പ്രവർത്തിച്ചിരുന്ന ജേക്കബ് തിയറ്ററിലേക്ക് ഭക്തജനങ്ങൾ പ്രതിഷേധ മാർച്ച് നടത്തി. പ്രതിഷേധത്തിനിടെ ക്ഷേത്രഭൂമിയിൽ കാവിക്കൊടി നാട്ടി ഭൂമി തിരിച്ചുപിടിച്ചതായി അവർ പ്രഖ്യാപിച്ചു.
ക്ഷേത്രത്തിന്റെ ഉടമസ്ഥതയിലുള്ള ഭൂമി ക്ഷേത്ര ട്രസ്റ്റിന് വിട്ടുനൽകണമെന്ന് 2023ൽ കോടതി ഉത്തരവിട്ടിരുന്നുവെന്നാണ് പ്രതിഷേധക്കാർ ചൂണ്ടിക്കാട്ടുന്നത്. എന്നാൽ വർഷങ്ങൾ കഴിഞ്ഞിട്ടും ഭൂമി കൈമാറാത്ത സാഹചര്യത്തിലാണ് പ്രതിഷേധവുമായി രംഗത്തെത്തിയതെന്ന് അവർ പറഞ്ഞു.
1978ൽ ക്ഷേത്രത്തിന്റെ പടിഞ്ഞാറ് ഭാഗത്തുള്ള 36 സെന്റ് ഭൂമി 25 വർഷത്തേക്ക് പാട്ടത്തിന് നൽകിയിരുന്നു. പാട്ടക്കാലാവധി അവസാനിച്ച ശേഷവും ഭൂമി ഒഴിയുകയോ കെട്ടിടം മാറ്റുകയോ ചെയ്തില്ലെന്നാണ് ക്ഷേത്ര ട്രസ്റ്റിന്റെ ആരോപണം. തുടർന്ന് ട്രസ്റ്റ് നിയമനടപടികൾ സ്വീകരിക്കുകയും തിരുവല്ല മുൻസിഫ് കോടതിയിൽ നിന്ന് അനുകൂല വിധി നേടുകയും ചെയ്തു.
തിയറ്റർ കെട്ടിടം പൊളിച്ചുനീക്കാനും കുടിശിക വാടക ക്ഷേത്രത്തിന് നൽകാനും കോടതി നിർദേശിച്ചിരുന്നുവെന്നാണ് ട്രസ്റ്റ് വ്യക്തമാക്കുന്നത്. എന്നാൽ ഉത്തരവ് നടപ്പായില്ലെന്ന് ആരോപിച്ചാണ് വിശ്വാസികൾ പ്രതിഷേധം സംഘടിപ്പിച്ചത്.
വിശ്വഹിന്ദു പരിഷത്ത് സംസ്ഥാന ജനറൽ സെക്രട്ടറി അനിൽ വിളയിലിന്റെ നേതൃത്വത്തിലാണ് പ്രതിഷേധ പരിപാടി നടന്നത്. ക്ഷേത്ര സ്വത്തുക്കൾ സംരക്ഷിക്കേണ്ടതിന്റെ ആവശ്യകതയാണ് സമരം ഉയർത്തിക്കാട്ടുന്നതെന്ന് സംഘാടകർ വ്യക്തമാക്കി.
More Read
അതേസമയം, വിഷയത്തിൽ ബന്ധപ്പെട്ട കക്ഷികളുടെ ഔദ്യോഗിക പ്രതികരണം ലഭ്യമായിട്ടില്ല.
English Summary
Devotees staged a protest in Thiruvalla over a land dispute involving the Anandeswaram Temple. Protesters marched to the Jacob Theatre, which is alleged to be functioning on temple-owned land, and symbolically claimed the property by planting saffron flags. According to the temple trust, a court had ordered the land to be returned to the temple in 2023, but the order has not yet been implemented. The trust says the land was leased in 1978 for 25 years and was not vacated after the lease expired. The protest was led by VHP state general secretary Anil Vilayil.
