മലയാള ചലച്ചിത്ര രംഗത്തെ പ്രമുഖ താരങ്ങൾ തമ്മിലുള്ള നിയമപരമായ തർക്കത്തിൽ നടൻ ടിനി ടോമിന് താല്ക്കാലിക ആശ്വാസം. സഹപ്രവർത്തകയായ അൻസിബ നൽകിയ പരാതിയുടെ അടിസ്ഥാനത്തിൽ രജിസ്റ്റർ ചെയ്ത കേസിൽ ടിനി ടോമിന് എറണാകുളം പ്രിൻസിപ്പൽ സെഷൻസ് കോടതി മുൻകൂർ ജാമ്യം അനുവദിച്ചു.
കൊച്ചി കടവന്ത്ര പോലീസ് രജിസ്റ്റർ ചെയ്ത കേസിലാണ് കോടതിയുടെ ഈ നിർണായക ഉത്തരവ് പുറത്തുവന്നിരിക്കുന്നത്. സ്ത്രീത്വത്തെ അപമാനിക്കൽ, വർഗീയമായി അധിക്ഷേപിക്കൽ തുടങ്ങിയ ഗുരുതരമായ വകുപ്പുകൾ ചുമത്തിയാണ് ടിനിക്കെതിരെ കേസെടുത്തിരുന്നത്. അൻസിബയുടെ ഹർജി പരിഗണിച്ച കോടതി നേരത്തെ പോലീസിനോട് കേസെടുക്കാൻ കർശന നിർദേശം നൽകിയിരുന്നു.
തമാശയെന്ന പോലീസ് വാദം തള്ളി കോടതി
ഇക്കഴിഞ്ഞ ഫെബ്രുവരി പതിമൂന്നിന് കടവന്ത്ര റീജിയണൽ സ്പോർട്സ് സെന്ററിൽ വെച്ച് നടന്ന ‘അമ്മ’ കുടുംബയോഗത്തിന്റെ റിഹേഴ്സലിനിടയിലാണ് കേസിനാസ്പദമായ സംഭവങ്ങൾ അരങ്ങേറുന്നത്. അൻസിബയെ ജിഹാദിയെന്നും മതതീവ്രവാദിയെന്നും വിളിച്ച് ടിനി ടോം അധിക്ഷേപിച്ചതായി എഫ്ഐആറിൽ വ്യക്തമാക്കുന്നുണ്ട്.
എന്നാൽ ടിനി ടോം അൻസിബയെ ജിഹാദിയെന്ന് വിളിച്ചത് വെറും തമാശയുടെ ഭാഗമായിട്ടാണെന്നായിരുന്നു കടവന്ത്ര പോലീസിന്റെ പ്രാഥമിക റിപ്പോർട്ട്. പോലീസിന്റെ ഈ ന്യായീകരണം പൂർണ്ണമായും തള്ളിക്കളഞ്ഞുകൊണ്ടാണ് കോടതി ടിനിക്കെതിരെ വിശദമായ അന്വേഷണത്തിന് ഉത്തരവിട്ടത്. അൻസിബയ്ക്കെതിരെ പരസ്യമായി അശ്ലീല-ലൈംഗിക പരാമർശങ്ങൾ നടത്തിയതായും കേസിന്റെ പ്രാഥമിക വിവര റിപ്പോർട്ടിൽ വ്യക്തമാക്കുന്നുണ്ട്.
വ്യക്തിത്വത്തെ വ്രണപ്പെടുത്തിയ പരാമർശങ്ങൾ
ടിനി ടോമിൽ നിന്നും തനിക്ക് നേരിടേണ്ടി വന്നത് കടുത്ത മാനസിക പീഡനമാണെന്ന് അൻസിബ ആരോപിക്കുന്നു. തനിക്കെതിരെ അശ്ലീലച്ചുവയോടെ സംസാരിച്ചതിനൊപ്പം, താൻ ഒരു മതതീവ്രവാദിയാണെന്ന തരത്തിൽ ‘അമ്മ’ സംഘടനയിലെ മറ്റ് അംഗങ്ങൾക്കിടയിൽ ടിനി ടോം വ്യാപകമായി പ്രചാരണം നടത്തിയെന്നും പരാതിയിലുണ്ട്.
ഒരു വ്യക്തി എന്ന നിലയിലും സ്ത്രീ എന്ന നിലയിലും തന്റെ അന്തസ്സിനെ വ്രണപ്പെടുത്തുന്നതായിരുന്നു ഈ നീക്കങ്ങൾ. ഇത്തരത്തിലുള്ള വ്യാജ പ്രചാരണങ്ങൾ തനിക്ക് സമൂഹത്തിൽ വലിയ രീതിയിലുള്ള മാനഹാനിയും കടുത്ത മനോവിഷമവും ഉണ്ടാക്കിയെന്നും താരം ചൂണ്ടിക്കാണിച്ചിരുന്നു.
സാക്ഷിമൊഴികളും പോലീസിന്റെ നിലപാടും
ഈ കേസിൽ നടിയും ‘അമ്മ’ മുൻ എക്സിക്യൂട്ടീവ് അംഗവുമായ നീന കുറുപ്പിന്റെ മൊഴി കോടതി നടപടികളിൽ നിർണായക വഴിത്തിരിവായി മാറി. സംഘടനയുടെ ഓഫീസിൽ വെച്ച് ടിനി ടോം അൻസിബയെക്കുറിച്ച് അങ്ങേയറ്റം അധിക്ഷേപകരമായ രീതിയിൽ സംസാരിക്കുന്നത് താൻ നേരിട്ട് കേട്ടതായി നീന കുറുപ്പ് പോലീസിന് മൊഴി നൽകിയിരുന്നു.
മറ്റൊരു പ്രമുഖ നടിയായ ശ്വേതാ മേനോനും ഇതേ കാര്യങ്ങൾ തന്നോട് പങ്കുവെച്ചിരുന്നതായി നീന മൊഴിയിൽ കൂട്ടിച്ചേർത്തു. എന്നാൽ കേട്ടുകേൾവികൾ മാത്രമാണ് പരാതിക്ക് ആധാരമെന്നും കേസ് എടുക്കാനുള്ള കൃത്യമായ തെളിവുകളില്ലെന്നുമായിരുന്നു പോലീസിന്റെ ആദ്യ നിലപാട്.
More Read
സംഭവം നടന്നത് സ്വന്തം പരിധിയിലല്ലെങ്കിൽ എഫ്ഐആർ രജിസ്റ്റർ ചെയ്ത് ബന്ധപ്പെട്ട സ്റ്റേഷനിലേക്ക് കൈമാറുകയായിരുന്നു പോലീസ് ചെയ്യേണ്ടിയിരുന്നതെന്ന് ചൂണ്ടിക്കാട്ടിയാണ് കോടതി പോലീസിനെ തിരുത്തിയത്.
