തിരുവനന്തപുരം: മുഖ്യമന്ത്രി വി.ഡി. സതീശന്റെ വാഹനം തടഞ്ഞ സംഭവത്തിൽ ചേന്തി അനിലിനെ പുറത്താക്കി കോൺഗ്രസ്. തിരുവനന്തപുരം ഡിസിസി അംഗമായ ചേന്തി അനിലിനെ പാർട്ടിയുടെ പ്രാഥമിക അംഗത്വത്തിൽനിന്നാണ് പുറത്താക്കിയത്. കെപിസിസി നേതൃത്വത്തിന്റെ നിർദേശപ്രകാരം ഡിസിസി അധ്യക്ഷൻ എൻ. ശക്തനാണ് നടപടി സ്വീകരിച്ചത്.
മുഖ്യമന്ത്രിയെ തെരുവിൽ തടഞ്ഞുനിർത്തിയ സംഭവത്തെ പാർട്ടി അംഗീകരിക്കുന്നില്ലെന്ന നിലപാടിലാണ് കോൺഗ്രസ് നേതൃത്വം.
ചേന്തി അനിലിനെ പുറത്താക്കി; കെപിസിസി നിർദേശപ്രകാരം നടപടി
മുഖ്യമന്ത്രിയുടെ വാഹനം തടഞ്ഞ സംഭവത്തിൽ ചേന്തി അനിലിനെതിരെ നടപടിയെടുക്കണമെന്ന കാര്യത്തിൽ കോൺഗ്രസ് നേതാക്കൾ ഒറ്റക്കെട്ടായിരുന്നുവെന്നാണ് വിവരം.
സംഭവത്തിൽ ചേന്തി അനിലിന് പിന്തുണയുമായി പാർട്ടിയിൽനിന്ന് ആരും രംഗത്തെത്തിയിട്ടില്ല. നിയമം നിയമത്തിന്റെ വഴിക്ക് പോകുമെന്നായിരുന്നു ആഭ്യന്തരമന്ത്രി രമേശ് ചെന്നിത്തലയുടെ പ്രതികരണം.
മുഖ്യമന്ത്രിയുടെ വാഹനം തടഞ്ഞത് വിവാദമായി
ശ്രീനാരായണഗുരു ജയന്തി ആഘോഷങ്ങളുടെ ഭാഗമായി ചേന്തിയിൽ നടന്ന പരിപാടിയിൽ പങ്കെടുക്കാനെത്തിയ മുഖ്യമന്ത്രി ചടങ്ങ് ഉദ്ഘാടനം ചെയ്യാതെ മടങ്ങുന്നതിനിടെയാണ് സംഭവം.
More Read
ഒരു സംഘം പ്രവർത്തകർ വാഹനം കൈകാണിച്ച് തടഞ്ഞുനിർത്തിയെന്നാണ് ആരോപണം. ചേന്തി അനിലിന്റെ നേതൃത്വത്തിലുള്ള സംഘം മുഖ്യമന്ത്രിയോട് മോശമായി പെരുമാറുകയും അസഭ്യവാക്കുകൾ പറയുകയും ചെയ്തതായും ആരോപണമുണ്ട്.
സുരക്ഷാ ഉദ്യോഗസ്ഥർ ഇടപെട്ടു
സംഭവത്തെ തുടർന്ന് മുഖ്യമന്ത്രിയുടെ സുരക്ഷാ ഉദ്യോഗസ്ഥർ ഇടപെട്ട് സംഘത്തെ സ്ഥലത്തുനിന്ന് മാറ്റുകയായിരുന്നു.
അതേസമയം, മുഖ്യമന്ത്രിയെ തടഞ്ഞുനിർത്തിയാൽ അറസ്റ്റ് ചെയ്യുമെന്ന് മന്ത്രി കെ. മുരളീധരനും നേരത്തെ വ്യക്തമാക്കിയിരുന്നു.
More Read
ഔദ്യോഗിക പരിപാടി പട്ടികയിൽ ചേന്തിയിലെ ചടങ്ങില്ല
മുഖ്യമന്ത്രിയുടെ ഔദ്യോഗിക പരിപാടി പട്ടികയിൽ ചേന്തിയിലെ ചടങ്ങ് ഉണ്ടായിരുന്നില്ലെന്നാണ് മുഖ്യമന്ത്രിയുടെ ഓഫിസിന്റെ വിശദീകരണം.
എന്നാൽ മുഖ്യമന്ത്രി നേരത്തെ പരിപാടിയിൽ പങ്കെടുക്കുമെന്ന് ഉറപ്പുനൽകിയിരുന്നുവെന്നും അവസാന നിമിഷം പരിപാടിയിൽനിന്ന് പിന്മാറുകയായിരുന്നുവെന്നും സംഘാടകർ ആരോപിച്ചു. എല്ലാ വർഷവും ചെമ്പഴന്തിയിലെത്തുന്ന മുഖ്യമന്ത്രിമാർ ശ്രീനാരായണ സാംസ്കാരിക നിലയത്തിലെ പരിപാടിയിൽ പങ്കെടുക്കാറുണ്ടെന്നും സംഘാടകർ പറഞ്ഞു.
റിമാൻഡ് റിപ്പോർട്ടിൽ ഗുരുതര ആരോപണങ്ങൾ
അതിനിടെ, ചേന്തി അനിലിനെതിരായ പൊലീസിന്റെ റിമാൻഡ് റിപ്പോർട്ടും പുറത്തുവന്നു. മുഖ്യമന്ത്രിയെ അവഹേളിക്കണമെന്ന ഉദ്ദേശത്തോടെയാണ് പ്രതി സ്ഥലത്തെത്തിയതെന്നാണ് റിപ്പോർട്ടിലുള്ളത്.
കാറിൽനിന്ന് ഇറങ്ങിയ മുഖ്യമന്ത്രിയെ പൊതുജനമധ്യത്തിൽ ഭീഷണിപ്പെടുത്തിയതായും മന്ത്രിയുടെയും ഒപ്പമുണ്ടായിരുന്ന പൊലീസുകാരുടെയും ഔദ്യോഗിക ജോലി തടസ്സപ്പെടുത്തിയതായും റിപ്പോർട്ടിൽ പറയുന്നു.
വിവിധ സ്റ്റേഷനുകളിൽ കേസുകൾ
ചേന്തി അനിലിനെതിരെ ശ്രീകാര്യം, തുമ്പ, മെഡിക്കൽ കോളേജ് പൊലീസ് സ്റ്റേഷനുകളിൽ നിരവധി കേസുകളുണ്ടെന്ന് പൊലീസ് അറിയിച്ചു.
പ്രതി റൗഡി ലിസ്റ്റിൽ ഉൾപ്പെട്ടിരുന്നയാളാണെന്നും പൊലീസ് വ്യക്തമാക്കി. സംഭവത്തിൽ പൊലീസ് നിയമനടപടികൾ തുടരുന്നതിനിടെയാണ് കോൺഗ്രസ് പാർട്ടിയിൽനിന്ന് പുറത്താക്കാനുള്ള തീരുമാനം.
More Read
