സമൂഹമാധ്യമങ്ങളിലൂടെയും അല്ലാതെയും അധികാരികളെയും നിയമസംവിധാനങ്ങളെയും തുടർച്ചയായി വെല്ലുവിളിച്ച് ഒളിവിലിരുന്ന കുപ്രസിദ്ധ കുറ്റവാളി അർജുൻ ആയങ്കിയെ പൊലീസ് പിടികൂടി കോടതിയിൽ ഹാജരാക്കി റിമാൻഡ് ചെയ്തു. കണ്ണൂർ സൈബർ പൊലീസ് രജിസ്റ്റർ ചെയ്ത കേസിന്റെ അടിസ്ഥാനത്തിൽ കസ്റ്റഡിയിലെടുത്ത ഇയാളെ കൂത്തുപറമ്പ് മജിസ്ട്രേറ്റിനു മുന്നിൽ ഹാജരാക്കിയ ശേഷമാണ് കോടതി റിമാൻഡ് ചെയ്തത്.
ഉത്തരവിനെ തുടർന്ന് പ്രതിയെ തലശ്ശേരി സ്പെഷ്യൽ സബ് ജയിലിലേക്ക് മാറ്റിയിട്ടുണ്ട്. ഇയാൾക്കെതിരെ നിലനിൽക്കുന്ന മറ്റ് കേസുകളിൽ ഊന്നുകൽ പൊലീസ് നാളെ കണ്ണൂർ കോടതിയിൽ ഫോർമൽ അറസ്റ്റിനുള്ള അപേക്ഷ നൽകുമെന്നും വിവരമുണ്ട്. അറസ്റ്റിലായെങ്കിലും അർജുൻ ആയങ്കി കോടതിയിൽ നിലവിൽ ജാമ്യാപേക്ഷ സമർപ്പിച്ചിട്ടില്ലെന്നാണ് അറിയാൻ കഴിയുന്നത്.
അതിനിടെ, അർജുൻ ആയങ്കി നിയമത്തിന് മുന്നിൽ കീഴടങ്ങാൻ ഉറപ്പിച്ചാണ് തന്നെ കാണാൻ എത്തിയതെന്ന് അദ്ദേഹത്തിന്റെ അഭിഭാഷക അഡ്വക്കേറ്റ് ഡെലീറ്റ ടൈറ്റസ് വ്യക്തമാക്കുകയുണ്ടായി. ഒളിവിലായിരുന്ന ആയങ്കിയെ താൻ ഒളിപ്പിച്ചു താമസിപ്പിച്ചിട്ടില്ലെന്നും വിവരമറിഞ്ഞ് പൊലീസ് എത്തിയ ഉടൻ തന്നെ യാതൊരു തടസ്സവും കൂടാതെ ഇയാളെ കൈമാറുകയായിരുന്നുവെന്നും അഭിഭാഷക മാധ്യമങ്ങളോട് പ്രതികരിച്ചു.
തളിപ്പറമ്പിൽ അർജുൻ ആയങ്കിയുണ്ടെന്ന രഹസ്യ വിവരത്തിന്റെ അടിസ്ഥാനത്തിൽ ഇന്നലെ ഉച്ച മുതൽ പൊലീസ് പ്രദേശത്ത് വൻ തിരച്ചിൽ നടത്തിവരികയായിരുന്നു. ഒടുവിൽ മണിക്കൂറുകൾ നീണ്ട കൃത്യമായ നിരീക്ഷണങ്ങൾക്കും നീക്കങ്ങൾക്കും ശേഷമാണ് പുലർച്ചെ 2:45 ഓടെ ഇയാൾ പൊലീസിന്റെ കസ്റ്റഡിയിലാകുന്നത്.
വ്യാജ പ്രചാരണങ്ങളും വെല്ലുവിളികളും നടത്തി പൊലീസിനെ നിരന്തരം വലച്ച കൊടും കുറ്റവാളിയായ അർജുൻ ആയങ്കിയെ പിടികൂടാൻ സാധിച്ചത് ആഭ്യന്തര വകുപ്പിനും കേരള പൊലീസിനും വലിയ രീതിയിലുള്ള ആശ്വാസവും അഭിമാന നേട്ടവുമാണ് സമ്മാനിച്ചിരിക്കുന്നത്.
More Read
ആഭ്യന്തര മന്ത്രിയെ പോലും പരസ്യമായി വെല്ലുവിളിച്ച് ഇയാൾ നടത്തിവന്ന ഒളിച്ചുകളിയും മാധ്യമ പ്രചാരണങ്ങളും പൊലീസിനും ഭരണകൂടത്തിനും വലിയ തോതിൽ നാണക്കേട് ഉണ്ടാക്കിയിരുന്നു. ഇത് ഗുണ്ടകളുടെ നാടല്ലെന്നും നിയമവാഴ്ചയുള്ള കേരളമാണെന്നും ആഭ്യന്തരമന്ത്രി നേരത്തെ ശക്തമായ മുന്നറിയിപ്പ് നൽകിയിരുന്നു. ഈ മുന്നറിയിപ്പിന് പിന്നാലെ നടന്ന കണിശമായ പൊലീസ് നീക്കമാണ് ഒടുവിൽ ഇയാളെ അഴിയെണ്ണിച്ചത്.
ആയങ്കിയുടെ അറസ്റ്റോടെ ഒതുങ്ങാതെ സംസ്ഥാനത്ത് ക്രിമിനലുകളെയും ഗുണ്ടാസംഘങ്ങളെയും പൂർണ്ണമായി അമർച്ച ചെയ്യാനുള്ള നീക്കത്തിലാണ് പൊലീസ് സംവിധാനം. ഇതിന്റെ ഭാഗമായി ‘ഓപ്പറേഷൻ ഗ്രിപ്പ്’ പോലുള്ള റെയ്ഡുകളും പരിശോധനകളും വരും ദിവസങ്ങളിൽ കൂടുതൽ ശക്തമാക്കാനാണ് ആഭ്യന്തര വകുപ്പിന്റെ തീരുമാനം.
ക്രിമിനൽ പശ്ചാത്തലമുള്ളവർക്കും ഒളിവിൽ കഴിയുന്നവർക്കുമെതിരെ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്ന് പൊലീസ് ഉറപ്പിച്ചുപറയുന്നു. ആയങ്കിയുടെ അറസ്റ്റ് പൊതുസമൂഹത്തിലും നിയമപാലകരിലും വലിയ ആത്മവിശ്വാസമാണ് വളർത്തിയിരിക്കുന്നത്.
