മിൽപിറ്റാസ് ഇരട്ടക്കൊല: അനില ബേബിയുടെ മാനസികാരോഗ്യം പരിശോധിക്കാൻ കോടതി ഉത്തരവ്

സിലിക്കൺ വാലി: ഏറെ കോളിളക്കം സൃഷ്ടിച്ച മിൽപിറ്റാസ് ഇരട്ടക്കൊലക്കേസിൽ പ്രതിയായ അനില ബേബിയുടെ വിചാരണ നടപടികളിൽ നിർണായക വഴിത്തിരിവ്. വിചാരണ നേരിടാനുള്ള മാനസിക ശേഷി പ്രതിക്കുണ്ടോ എന്ന് പരിശോധിക്കാൻ മാനസികാരോഗ്യ വിദഗ്ധരെ നിയോഗിക്കാൻ കോടതി ഉത്തരവിട്ടു.

സാന്താക്ലാര കൗണ്ടി മെയിൻ ജയിലിൽ കഴിയുന്ന അനില ബേബി കോടതിയിൽ ഹാജരായപ്പോഴാണ് പ്രതിഭാഗം ഇക്കാര്യം ഉന്നയിച്ചത്. കൊല്ലപ്പെട്ടവരുടെ ചില അടുത്ത സുഹൃത്തുക്കളും കോടതിയിൽ സന്നിഹിതരായിരുന്നു.

മാനസിക ശേഷിയിൽ സംശയം ഉന്നയിച്ച് പ്രതിഭാഗം

പ്രതിയുമായി നേരിട്ട് നടത്തിയ കൂടിക്കാഴ്ചകൾക്കു ശേഷം, അനില ബേബിക്ക് വിചാരണ നേരിടാനുള്ള മാനസിക ശേഷിയില്ലെന്നും ഗുരുതരമായ മാനസിക അസ്ഥിരത അനുഭവപ്പെടുന്നുണ്ടെന്നും പ്രതിഭാഗം അഭിഭാഷകൻ ഷോൺ എം. ജോർജ് കോടതിയെ അറിയിച്ചു.

കാലിഫോർണിയ പീനൽ കോഡ് സെക്ഷൻ 1368 പ്രകാരമുള്ള വിഷയം അഭിഭാഷകൻ കോടതിയുടെ ശ്രദ്ധയിൽപ്പെടുത്തുകയായിരുന്നു. തുടർന്ന്, പ്രതിയുടെ നിലവിലെ മാനസികാവസ്ഥ വിലയിരുത്തുന്നതിനായി വിദഗ്ധ പരിശോധന നടത്താൻ കോടതി ഉത്തരവിട്ടു.

അടുത്ത വാദം ഒക്ടോബർ 16-ന്

മാനസികാരോഗ്യ വിദഗ്ധരെ നിയമിക്കുന്നതിനും തുടർനടപടികൾക്കുമായി കേസ് 2026 ഒക്ടോബർ 16-ലേക്ക് മാറ്റി. വിദഗ്ധരുടെ പരിശോധനാ റിപ്പോർട്ടുകൾ ലഭിച്ചശേഷം പ്രതിഭാഗം കോടതിയിൽ വീണ്ടും വാദങ്ങൾ അവതരിപ്പിക്കും.

പരിശോധനയിൽ പ്രതിക്ക് നിലവിൽ വിചാരണ നേരിടാനുള്ള മാനസിക ശേഷിയില്ലെന്ന് കണ്ടെത്തിയാൽ, തുടർനടപടികൾ കോടതി തീരുമാനിക്കും. സാഹചര്യങ്ങൾക്കനുസരിച്ച് വിചാരണ താൽക്കാലികമായി നിർത്തിവയ്ക്കുകയോ മാനസികാരോഗ്യ ചികിത്സയ്ക്കായി മാറ്റുകയോ ചെയ്യാം.

സ്വന്തം കേസിനെക്കുറിച്ച് അഭിഭാഷകനുമായി ഫലപ്രദമായി ആശയവിനിമയം നടത്താനും വിചാരണ നടപടികൾ മനസ്സിലാക്കി പ്രതിരോധിക്കാനും പ്രതിക്ക് ശേഷിയുണ്ടോ എന്നതാണ് പരിശോധനയിൽ പ്രധാനമായും വിലയിരുത്തുക.

കുറ്റകൃത്യം നടന്ന സമയത്തെ മാനസികാവസ്ഥ വേറെ വിഷയം

പ്രതിക്ക് ഇപ്പോൾ വിചാരണ നേരിടാനുള്ള മാനസിക ശേഷിയുണ്ടോ എന്ന് പരിശോധിക്കുന്നതും കുറ്റകൃത്യം നടന്ന സമയത്ത് മാനസിക അസ്ഥിരതയുണ്ടായിരുന്നോ എന്ന് നിർണയിക്കുന്നതും വ്യത്യസ്തമായ നിയമനടപടികളാണ്.

കുറ്റകൃത്യം നടന്ന സമയത്തെ മാനസികാവസ്ഥയെ അടിസ്ഥാനമാക്കി പ്രതിഭാഗം വാദമുന്നയിക്കുകയാണെങ്കിൽ, അതിന് അനുയോജ്യമായ തെളിവുകൾ ഹാജരാക്കേണ്ടിവരും. സംഭവത്തിന് മുമ്പുള്ള പെരുമാറ്റം, മുൻകാല മാനസികാരോഗ്യ രേഖകൾ, വിദഗ്ധരുടെ വിലയിരുത്തലുകൾ, കുടുംബാംഗങ്ങളുടെയും സുഹൃത്തുക്കളുടെയും മൊഴികൾ എന്നിവ ഇതിൽ പ്രസക്തമാകാം.

കുറ്റകൃത്യത്തിന്റെ സ്വഭാവം തിരിച്ചറിയാനോ ശരിയും തെറ്റും തിരിച്ചറിയാനോ ആ സമയത്ത് പ്രതിക്ക് മാനസിക ശേഷിയില്ലായിരുന്നുവെന്ന് നിയമപരമായി തെളിയിക്കേണ്ടിവരാം.

നിലവിലെ കോടതി ഉത്തരവ് അനില ബേബിയുടെ ഇപ്പോഴത്തെ മാനസികാവസ്ഥ വിലയിരുത്തുന്നതിനുള്ള നടപടിയുടെ ഭാഗമാണ്. ഇത് കുറ്റകൃത്യം നടന്ന സമയത്തെ മാനസികാവസ്ഥയെക്കുറിച്ചുള്ള അന്തിമ കണ്ടെത്തലല്ല.

English Summary: A California court has ordered a mental health evaluation for Anila Baby, the accused in the high-profile Milpitas double-murder case, after her defence lawyer questioned her fitness to stand trial. The case has been adjourned to October 16, 2026, for further proceedings. The evaluation concerns her present ability to understand and participate in the trial, not her mental state at the time of the alleged crime.