facebook

നിലയ്ക്കലിൽ തീർത്ഥാടകന്റെ ഡ്രൈവറെ മർദിച്ചു; എഎസ്ഐക്ക് സസ്പെൻഷൻ

2 Min Read

പത്തനംതിട്ട: ശബരിമല തീർത്ഥാടകരുമായി നിലയ്ക്കൽ പാർക്കിംഗ് ഗ്രൗണ്ടിലെത്തിയ വാഹനത്തിന്റെ ഡ്രൈവറെ മർദിച്ച സംഭവത്തിൽ പൊലീസ് ഉദ്യോഗസ്ഥന് സസ്പെൻഷൻ. കളമശേരി റൂറൽ ക്യാമ്പിലെ എഎസ്ഐ ജിജോ വർഗീസിനെയാണ് അന്വേഷണത്തിനൊടുവിൽ സസ്പെൻഡ് ചെയ്തത്. സംഭവത്തിന്റെ ദൃശ്യങ്ങൾ പുറത്തുവന്നതോടെ പൊലീസിനെതിരെ വിമർശനമുയർന്നിരുന്നു.

നിലയ്ക്കലിൽ എഎസ്ഐക്ക് സസ്പെൻഷൻ; തർക്കത്തിനിടെ മർദനം

വടക്കൻ പറവൂർ സ്വദേശിയായ പ്രശാന്തിനാണ് മർദനമേറ്റത്. കഴിഞ്ഞ ദിവസം രാത്രിയായിരുന്നു സംഭവം. പാർക്കിംഗ് ഗ്രൗണ്ടിലേക്ക് പോകുന്നതിനിടെ ട്രാവലർ നിർത്തി തീർത്ഥാടകരെ ഇറക്കിയതാണ് തർക്കത്തിന് കാരണമായത്.

ഇതിനിടെ പ്രകോപിതനായ എഎസ്ഐ ഡ്രൈവറുടെ മുഖത്തടിക്കുകയായിരുന്നു. തുടർന്ന് വീണ്ടും മർദിക്കുകയും അസഭ്യം പറയുകയും ചെയ്തെന്നാണ് പരാതി.

ഡിജിപിക്ക് പരാതി നൽകി ഡ്രൈവർ

മർദനത്തിന്റെ ദൃശ്യങ്ങൾ പുറത്തുവന്നതിനു പിന്നാലെ പ്രശാന്ത് സംഭവത്തിൽ ഡിജിപിക്ക് പരാതി നൽകി. പരാതിയുടെ അടിസ്ഥാനത്തിൽ നടത്തിയ അന്വേഷണത്തിനൊടുവിലാണ് കളമശേരി റൂറൽ എസ്.പി ജിജോ വർഗീസിനെ സസ്പെൻഡ് ചെയ്തത്.

മദ്യപിച്ച് ബന്ധുവുമായി തല്ലുണ്ടാക്കിയ പൊലീസുകാരനും സസ്പെൻഷൻ

അതിനിടെ, നിലയ്ക്കലിലെ ഡ്യൂട്ടിക്കിടെ മറ്റൊരു സംഭവത്തിലും പൊലീസ് ഉദ്യോഗസ്ഥനെതിരെ നടപടി സ്വീകരിച്ചു. ഡ്യൂട്ടിക്കിടെ വിശ്രമം അനുവദിച്ച സമയത്ത് വെച്ചൂച്ചിറയിലെ ബന്ധുവീട്ടിലെത്തി മദ്യപിച്ച് സംഘർഷമുണ്ടാക്കിയ പൊലീസുകാരനെയാണ് സസ്പെൻഡ് ചെയ്തത്.

കൊട്ടാരക്കര റൂറൽ പൊലീസ് ക്യാമ്പിലെ ഡ്രൈവർ സുനിലിനെതിരെയാണ് നടപടി. അടുത്ത ദിവസം ഡ്യൂട്ടിക്ക് ഹാജരാകാതിരുന്നതും നടപടിക്ക് കാരണമായി. കൊട്ടാരക്കര റൂറൽ എസ്.പിയാണ് സുനിലിനെ സസ്പെൻഡ് ചെയ്തത്.


English Summary:

An Assistant Sub-Inspector from the Kalamassery Rural Police Camp has been suspended following allegations of assaulting a vehicle driver carrying Sabarimala pilgrims at Nilakkal parking ground. The driver, Prasanth from North Paravur, filed a complaint with the DGP after video footage of the incident surfaced. In a separate incident, a police driver from the Kottarakkara Rural Police Camp was also suspended for allegedly creating a disturbance after consuming alcohol at a relative’s house during a duty break and failing to report for duty the following day.

Share This Article