ന്യൂഡൽഹി: മുത്തച്ഛന്റെ മരണശേഷം 1956-ലെ ഹിന്ദു പിന്തുടർച്ചാവകാശ നിയമപ്രകാരം പിതാവിന് ലഭിച്ച സ്വത്തിൽ മകന് ജന്മാവകാശമില്ലെന്ന് സുപ്രീംകോടതി. പിതാവിന് ലഭിച്ച ഭൂമിയുടെ പകുതി ആവശ്യപ്പെട്ട് തമിഴ്നാട് സ്വദേശിയായ മകൻ നൽകിയ അപ്പീൽ തള്ളിയാണ് ജസ്റ്റിസ് അഗസ്റ്റിൻ ജോർജ് മാസിഹ്, ജസ്റ്റിസ് സുനിത അഗർവാൾ എന്നിവരടങ്ങിയ ബെഞ്ച് നിർണായക വിധി പുറപ്പെടുവിച്ചത്.
മുത്തച്ഛന്റെ സ്വത്തിൽ പകുതി ആവശ്യപ്പെട്ട് ഹർജി
മുത്തച്ഛന്റെ മരണശേഷം പിതാവിന് ലഭിച്ച ഭൂമിയിൽ മകനെന്ന നിലയിൽ തനിക്കും അവകാശമുണ്ടെന്നും സ്വത്ത് വിഭജിച്ച് പകുതി നൽകണമെന്നുമായിരുന്നു ഹർജിക്കാരന്റെ ആവശ്യം.
എന്നാൽ മദ്രാസ് ഹൈക്കോടതി ഈ ആവശ്യം നേരത്തെ തള്ളിയിരുന്നു. ഇതിനെതിരെയാണ് മകൻ സുപ്രീംകോടതിയെ സമീപിച്ചത്.
ഹിന്ദു പിന്തുടർച്ചാവകാശ നിയമത്തിലെ വ്യവസ്ഥ
More Read
1956-ലെ ഹിന്ദു പിന്തുടർച്ചാവകാശ നിയമത്തിലെ എട്ടാം വകുപ്പ് പ്രകാരം ഒരാൾ വിൽപത്രം എഴുതാതെ മരിച്ചാൽ സ്വത്ത് നിയമത്തിൽ നിർവചിച്ചിട്ടുള്ള ഒന്നാം വിഭാഗം അവകാശികൾക്ക് കൈമാറും.
മുത്തച്ഛന്റെ മരണശേഷം സ്വത്ത് നിയമപ്രകാരം അവകാശികൾക്കിടയിൽ വിഭജിക്കപ്പെട്ടാൽ പിതാവിന് ലഭിക്കുന്ന ഓഹരി അദ്ദേഹത്തിന്റെ വ്യക്തിഗത സ്വത്തായി മാറുമെന്ന് സുപ്രീംകോടതി വ്യക്തമാക്കി. അത്തരം സ്വത്തിൽ മകന് ജന്മാവകാശത്തിന്റെ അടിസ്ഥാനത്തിൽ സ്വതന്ത്രമായി അവകാശവാദം ഉന്നയിക്കാനാവില്ലെന്നും കോടതി നിരീക്ഷിച്ചു.
അപ്പീൽ തള്ളി സുപ്രീംകോടതി
More Read
മുത്തച്ഛന്റെ സ്വത്ത് പിതാവിന് ലഭിച്ചതുകൊണ്ടുമാത്രം അത് മകന്റെ പിതൃപരമ്പരാഗത കൂട്ടുടമസ്ഥതയിലുള്ള സ്വത്തായി മാറില്ലെന്നാണ് കോടതിയുടെ നിലപാട്. അതിനാൽ പിതാവിന്റെ കൈവശമുള്ള സ്വത്തിൽ പകുതി ആവശ്യപ്പെട്ടുള്ള മകന്റെ വാദം അംഗീകരിക്കാനാവില്ലെന്ന് കോടതി വ്യക്തമാക്കി.
ഇതോടെ മദ്രാസ് ഹൈക്കോടതി വിധിക്കെതിരായ അപ്പീൽ സുപ്രീംകോടതി തള്ളി.
English Summary: The Supreme Court dismissed a Tamil Nadu man’s appeal seeking a half share in land inherited by his father from his grandfather. The court held that property devolving upon the father under Section 8 of the Hindu Succession Act, 1956, and subsequently partitioned, becomes his individual property.
