കുമളി: തേനി ആണ്ടിപ്പെട്ടി സബ്‌ജയിലിൽ നിന്ന് ചാടിയതിൽ പിടികിട്ടാനുണ്ടായിരുന്ന രണ്ടുപേരെ കൂടി കണ്ടെത്തി. ചിന്നമന്നൂരിൽ നിന്നാണ് ഇവരെ പിടികൂടിയത്. ഇതോടെ ജയിൽചാടിയ 17 പ്രതികളും പിടിയിലായി.
ജയിൽ സുരക്ഷാ ജീവനക്കാരെ ആക്രമിച്ച ശേഷമാണ് ക്രിമിനൽ കേസുകളിൽ പ്രതികളായ 17 പേർ ജയിൽചാടിയത്. ഇന്നലെ ഒരാൾ സ്വമേധയാ ജയിലിൽ തിരിച്ചെത്തിയിരുന്നു. തുടർന്ന് ജയിലിന് സമീപത്തെ കാട്ടിൽ നിന്ന് നാലുപേരെ പിടികൂടി. ശേഷിച്ചവർക്കായി പൊലീസ് തെരച്ചിൽ തുടരുകയായിരുന്നു.
സുരക്ഷാ ജീവനക്കാരെ ആക്രമിച്ചാണ് രക്ഷപ്പെട്ടത്
17 പ്രതികളും ഒരേ സെല്ലിലായിരുന്നു കഴിഞ്ഞിരുന്നത്. ഒരാൾക്ക് സുഖമില്ലെന്ന് അറിയിച്ചതിനെ തുടർന്ന് പരിശോധനയ്ക്കായി നാല് സുരക്ഷാ പൊലീസുകാർ സെല്ലിനുള്ളിൽ പ്രവേശിച്ചു. ഈ സമയത്താണ് പ്രതികൾ പൊലീസുകാരെ ആക്രമിച്ച് രക്ഷപ്പെട്ടത്.
ആക്രമണത്തിൽ തങ്കപാണ്ടി എന്ന പൊലീസുകാരന് തലയ്ക്ക് പരിക്കേറ്റു. ഇദ്ദേഹം ആശുപത്രിയിൽ ചികിത്സയിലാണ്. മറ്റ് രണ്ട് പൊലീസുകാർക്കും പരിക്കേറ്റിട്ടുണ്ട്.
പ്രതികൾക്കായി കേരളത്തിലേക്കും തിരച്ചിൽ
പ്രതികളിൽ കൂടുതലും വില്ലുപുരം ജില്ലയിൽ നിന്നുള്ളവരാണെന്നാണ് വിവരം. ജയിൽചാട്ടത്തിന് പിന്നാലെ പ്രതികളുടെ ഫോട്ടോകളും മറ്റ് വിവരങ്ങളും സമീപത്തെ പൊലീസ് സ്റ്റേഷനുകളിലേക്ക് കൈമാറിയിരുന്നു. കേരളത്തിലെ തൊട്ടടുത്ത ജില്ലയായ ഇടുക്കി പൊലീസിനും വിവരങ്ങൾ നൽകിയിരുന്നു.
ജയിലിൽ നിന്ന് ഏകദേശം 25 കിലോമീറ്റർ അകലെയുള്ള വർഷനാട് വനമേഖലയിലും പ്രതികൾക്കായി പരിശോധന നടത്തിയിരുന്നു. ഒടുവിൽ ചിന്നമന്നൂരിൽ നിന്ന് രണ്ടുപേരെ കൂടി കണ്ടെത്തിയതോടെ തെരച്ചിലിന് വിരാമമായി.
More Read
English Summary: All 17 inmates who escaped from Andipatti Sub-Jail in Theni have been apprehended. The last two fugitives were found in Chinnamanur. The inmates had escaped after allegedly attacking prison security personnel.
