ഗൾഫ് മേഖലയിലെ സംഘർഷസാഹചര്യത്തിൽ സൗദി അറേബ്യയിലെ പ്രവാസി കേരളീയർ നേരിടുന്ന പ്രതിസന്ധികൾ സർക്കാരിന്റെ ശ്രദ്ധയിൽ കൊണ്ടുവരുന്നു. സൗദി പ്രവാസി സംഘടനകളുടെ യോഗത്തിൽ ഉയർന്ന നിർദേശങ്ങളാണ് സർക്കാരിന് സമർപ്പിച്ചത്.
സൗദിയിൽനിന്ന് കേരളത്തിലേക്കും തിരിച്ചും താങ്ങാനാവുന്ന നിരക്കിൽ ചാർട്ടേഡ് വിമാന സർവീസുകൾ ഏർപ്പെടുത്തണമെന്നാണ് പ്രധാന ആവശ്യം. അവധിക്ക് നാട്ടിലെത്തിയവരുടെ മടക്കയാത്രയും മൃതദേഹങ്ങൾ നാട്ടിലെത്തിക്കുന്നതിനുള്ള സൗകര്യവും ഉറപ്പാക്കണമെന്നും പ്രവാസികൾ ആവശ്യപ്പെടുന്നു.
ചാർട്ടേഡ് വിമാന സർവീസുകൾ വേണം
സൗദി അറേബ്യയ്ക്കും കേരളത്തിനുമിടയിൽ കുറഞ്ഞ നിരക്കിൽ ചാർട്ടേഡ് വിമാന സർവീസുകൾ ഏർപ്പെടുത്തണമെന്നാണ് പ്രവാസി സംഘടനകളുടെ പ്രധാന നിർദേശം. അവധിക്ക് നാട്ടിലെത്തിയ ജീവനക്കാർക്ക് സൗദിയിലേക്ക് മടങ്ങാൻ ആവശ്യമായ സൗകര്യങ്ങൾ ഒരുക്കണമെന്നും അവർ ആവശ്യപ്പെട്ടു.
മരണപ്പെട്ട പ്രവാസികളുടെ മൃതദേഹങ്ങൾ നാട്ടിലെത്തിക്കുന്നതിനുള്ള സംവിധാനവും ഉറപ്പാക്കണം. ഉംറ, വിസിറ്റ് വീസകളിൽ സൗദിയിലെത്തി യാത്രാതടസം നേരിടുന്നവർക്ക് യാത്ര, താമസം, ഭക്ഷണം എന്നിവ ലഭ്യമാക്കണമെന്നും കേരളീയ സമൂഹം ആവശ്യപ്പെട്ടു.
പ്രവാസികൾക്ക് സുരക്ഷാ മുന്നറിയിപ്പുമായി എംബസി
സൗദി അറേബ്യയിലെ ഇന്ത്യൻ പൗരന്മാർക്ക് റിയാദിലെ ഇന്ത്യൻ എംബസി സുരക്ഷാ മുന്നറിയിപ്പ് നൽകി. ഡ്രോൺ, മിസൈൽ ആക്രമണങ്ങൾ, അവയെ തടയുന്നതിനുള്ള പ്രതിരോധ നടപടികൾ,ആക്രമണങ്ങളുടെ ആഘാതമുണ്ടായ സ്ഥലങ്ങൾ എന്നിവ ചിത്രീകരിക്കരുതെന്ന് എംബസി നിർദേശിച്ചു.
More Read
ഇത്തരം സംഭവങ്ങളുമായി ബന്ധപ്പെട്ട വിവരങ്ങൾ, ചിത്രങ്ങൾ, വീഡിയോകൾ എന്നിവ പ്രസിദ്ധീകരിക്കുകയോ സാമൂഹികമാധ്യമങ്ങളിലൂടെ പങ്കുവെക്കുകയോ ചെയ്യരുതെന്നും മുന്നറിയിപ്പിൽ പറയുന്നു. സൗദിയിലെ പ്രാദേശിക നിയമങ്ങളും സുരക്ഷാ നിർദേശങ്ങളും കർശനമായി പാലിക്കണമെന്നും എംബസി ആവശ്യപ്പെട്ടു.
അടിയന്തര മുന്നറിയിപ്പുകൾ ലഭിച്ചാൽ സുരക്ഷിത ഇടങ്ങളിൽ തുടരുക
അടിയന്തര മുന്നറിയിപ്പുകൾ ലഭിക്കുന്ന സാഹചര്യത്തിൽ സുരക്ഷിതമായ കെട്ടിടത്തിനുള്ളിൽ തുടരണമെന്ന് എംബസി നിർദേശിച്ചു. ജനാലകൾ, തുറസ്സായ സ്ഥലങ്ങൾ, അപകടസാധ്യതയുള്ള പ്രദേശങ്ങൾ എന്നിവയിൽനിന്ന് അകന്നുനിൽക്കണമെന്നും മുന്നറിയിപ്പിൽ പറയുന്നു.
സ്ഥിരീകരിക്കാത്ത വാർത്തകളും ദൃശ്യങ്ങളും പ്രചരിപ്പിക്കുന്നത് ഒഴിവാക്കണം. ഔദ്യോഗിക സ്രോതസ്സുകളിൽനിന്നുള്ള വിവരങ്ങൾ മാത്രം പിന്തുടരണമെന്നും സൗദിയിലെ പ്രവാസികളോടും അവരുടെ കുടുംബാംഗങ്ങളോടും എംബസി അഭ്യർഥിച്ചു.
English Summary : Malayali expatriate organisations in Saudi Arabia have submitted demands to the government amid tensions in the Gulf region. Their key requests include affordable charter flights between Saudi Arabia and Kerala, assistance for expatriates returning from leave, and arrangements to transport mortal remains. The Indian Embassy in Riyadh has also issued safety instructions, urging Indian citizens to avoid sharing images or information related to attacks and to follow official advisories.
