ഇന്ന് 7 ജില്ലകളിൽ ഓറഞ്ച് അലർട്ട്, നാളെയും അതിശക്തമായ മഴയ്ക്ക് സാധ്യത

തിരുവനന്തപുരം: കേരളത്തിൽ മഴ ശക്തമാകുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. 

തെക്കുകിഴക്കൻ അറബിക്കടലിലും സമീപത്തെ ലക്ഷദ്വീപിനു മുകളിലുമായി നിലനിൽക്കുന്ന ന്യൂനമർദത്തെ തുടർന്ന് സംസ്ഥാനത്ത് വിവിധ ജില്ലകളിൽ ഓറഞ്ച്, മഞ്ഞ അലർട്ടുകൾ പ്രഖ്യാപിച്ചു.

 ഒറ്റപ്പെട്ടയിടങ്ങളിൽ അതിശക്തമായ മഴയ്ക്കും ഇടിമിന്നലോടുകൂടിയ മഴയ്ക്കും സാധ്യതയുണ്ട്.

ന്യൂനമർദവുമായി ബന്ധപ്പെട്ട ചക്രവാതച്ചുഴിയിൽനിന്ന് കേരളത്തിലൂടെ വടക്കൻ തമിഴ്നാട് തീരം വരെ ന്യൂനമർദപ്പാത്തിയും നിലനിൽക്കുന്നതായാണ് റിപ്പോർട്ട്.

 മഴക്കെടുതികൾക്കും മണ്ണിടിച്ചിലിനും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു.

കേരള മഴ മുന്നറിയിപ്പ്: ഇന്ന് ഏഴ് ജില്ലകളിൽ ഓറഞ്ച് അലർട്ട്

ഒക്ടോബർ 24-ന് തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് ഓറഞ്ച് അലർട്ട് പ്രഖ്യാപിച്ചിരിക്കുന്നത്. ഈ ജില്ലകളിൽ ഒറ്റപ്പെട്ടയിടങ്ങളിൽ അതിശക്തമായ മഴ ലഭിക്കാൻ സാധ്യതയുണ്ട്.

24 മണിക്കൂറിൽ 115.6 മില്ലിമീറ്റർ മുതൽ 204.4 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് അതിശക്തമായ മഴയായി കേന്ദ്ര കാലാവസ്ഥ വകുപ്പ് നിർവചിക്കുന്നത്.

നാളെ പത്ത് ജില്ലകളിൽ ഓറഞ്ച് അലർട്ട്

ഒക്ടോബർ 25-ന് പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്.

ഈ ജില്ലകളിലും ഒറ്റപ്പെട്ടയിടങ്ങളിൽ അതിശക്തമായ മഴയ്ക്കും ഇടിമിന്നലോടുകൂടിയ മഴയ്ക്കും സാധ്യതയുണ്ട്. കാലാവസ്ഥാ വകുപ്പിന്റെ പുതിയ അറിയിപ്പുകൾ അനുസരിച്ച് മുന്നറിയിപ്പുകളിൽ മാറ്റമുണ്ടാകാമെന്നതിനാൽ ഔദ്യോഗിക അറിയിപ്പുകൾ തുടർച്ചയായി പരിശോധിക്കണം.

ഇന്ന് ഏഴ് ജില്ലകളിൽ മഞ്ഞ അലർട്ട്

ഒക്ടോബർ 24-ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് മഞ്ഞ അലർട്ട്.

ഒക്ടോബർ 25-ന് തിരുവനന്തപുരം, കൊല്ലം, ആലപ്പുഴ, കാസർകോട് ജില്ലകളിലും മഞ്ഞ അലർട്ട് പ്രഖ്യാപിച്ചിട്ടുണ്ട്. ഈ ജില്ലകളിൽ ഒറ്റപ്പെട്ടയിടങ്ങളിൽ ശക്തമായ മഴ ലഭിക്കാനാണ് സാധ്യത.

24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴയായി കണക്കാക്കുന്നത്.

ഉരുൾപൊട്ടൽ, മണ്ണിടിച്ചിൽ സാധ്യതയുള്ളവർ ജാഗ്രത പാലിക്കണം

ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ എന്നിവയ്ക്ക് സാധ്യതയുള്ള പ്രദേശങ്ങളിൽ താമസിക്കുന്നവർ പ്രത്യേക ജാഗ്രത പാലിക്കണം. അധികൃതരുടെ നിർദേശമുണ്ടെങ്കിൽ സുരക്ഷിതമായ സ്ഥലങ്ങളിലേക്ക് മാറണം.

നദീതീരങ്ങളിലും അണക്കെട്ടുകളുടെ താഴ്ഭാഗങ്ങളിലും താമസിക്കുന്നവർ വെള്ളപ്പൊക്ക സാധ്യത കണക്കിലെടുത്ത് മുൻകരുതലെടുക്കണം.

 ദുരന്തസാധ്യതയുള്ള പ്രദേശങ്ങളിൽ ദുരിതാശ്വാസ ക്യാംപുകൾ തുറന്നിട്ടുണ്ടോയെന്ന് തദ്ദേശസ്ഥാപനങ്ങളുമായോ റവന്യൂ അധികൃതരുമായോ ബന്ധപ്പെട്ട് ഉറപ്പാക്കണം. ആവശ്യമെങ്കിൽ പകൽസമയത്തുതന്നെ സുരക്ഷിത കേന്ദ്രങ്ങളിലേക്ക് മാറുന്നതാണ് ഉചിതം.

ശക്തമായ കാറ്റിനും സാധ്യത; വീടുകളിലും പരിസരങ്ങളിലും ശ്രദ്ധ വേണം

ശക്തമായ കാറ്റിന് സാധ്യതയുള്ളതിനാൽ മേൽക്കൂര ബലഹീനമായ വീടുകളിലും അടച്ചുറപ്പില്ലാത്ത വീടുകളിലും താമസിക്കുന്നവർ ജാഗ്രത പാലിക്കണം.

 അപകടാവസ്ഥയിലുള്ള മരങ്ങൾ, വൈദ്യുതത്തൂണുകൾ, പരസ്യബോർഡുകൾ, മതിലുകൾ എന്നിവ അപകടഭീഷണിയാകാം. ഇത്തരം സാഹചര്യങ്ങൾ അധികൃതരുടെ ശ്രദ്ധയിൽപ്പെടുത്തണം.

ദുരന്തസാധ്യതയുള്ള പ്രദേശങ്ങളിൽ താമസിക്കുന്നവർ മരുന്നുകൾ, കുടിവെള്ളം, ആവശ്യമായ രേഖകൾ, ടോർച്ച്, ബാറ്ററികൾ തുടങ്ങിയവ ഉൾപ്പെടുത്തി എമർജൻസി കിറ്റ് തയ്യാറാക്കി വയ്ക്കണം. 

സുരക്ഷിത സ്ഥാനത്തേക്ക് മാറേണ്ടിവന്നാൽ ആവശ്യമായ സാധനങ്ങൾ കൈവശമുണ്ടെന്ന് ഉറപ്പാക്കണം.

അടിയന്തര സഹായത്തിന് 1077, 1070 നമ്പറുകൾ

കേരളത്തിലെ എല്ലാ ജില്ലകളിലും 24 മണിക്കൂറും പ്രവർത്തിക്കുന്ന താലൂക്ക്, ജില്ലാ കൺട്രോൾ റൂമുകളുണ്ട്. അടിയന്തര സഹായത്തിനും അപകടസാധ്യതകൾ അറിയിക്കാനും 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാം.

ശക്തമായ കാറ്റ് ഉൾപ്പെടെയുള്ള സാഹചര്യങ്ങളിൽ സ്വീകരിക്കേണ്ട മുൻകരുതലുകളെക്കുറിച്ചുള്ള നിർദേശങ്ങൾ കേരള സംസ്ഥാന ദുരന്ത നിവാരണ അതോറിറ്റിയുടെ വെബ്സൈറ്റിൽ ലഭ്യമാണ്: https://sdma.kerala.gov.in/windwarning/

ഓറഞ്ച്, മഞ്ഞ അലർട്ടുകളുടെ അർഥവും സ്വീകരിക്കേണ്ട മുൻകരുതലുകളും സംസ്ഥാന ദുരന്ത നിവാരണ അതോറിറ്റിയുടെ ഓറഞ്ച് ബുക്ക് 2026-ൽ വിശദീകരിച്ചിട്ടുണ്ട്. മഴ മുന്നറിയിപ്പുകളിൽ മാറ്റമുണ്ടാകാമെന്നതിനാൽ കാലാവസ്ഥാ വകുപ്പിന്റെയും ദുരന്ത നിവാരണ അതോറിറ്റിയുടെയും ഏറ്റവും പുതിയ അറിയിപ്പുകൾ പരിശോധിക്കുകയും സുരക്ഷാ നിർദേശങ്ങൾ പാലിക്കുകയും വേണം.

English Summary:

A low-pressure area over the southeastern Arabian Sea and adjoining Lakshadweep is contributing to the likelihood of heavy rainfall in Kerala. An orange alert has been issued for seven districts on October 24 and ten districts on October 25, with yellow alerts in other districts. Authorities have advised people in landslide- and flood-prone areas to remain alert, follow official instructions and move to safer locations when necessary. Emergency assistance is available through the control-room numbers 1077 and 1070.