മർച്ചന്റ് നേവി ഉദ്യോഗസ്ഥന്റെ കൊലപാതകം; ഭാര്യയ്ക്കും കാമുകനും വധശിക്ഷ

മീററ്റ്: മർച്ചന്റ് നേവി ഉദ്യോഗസ്ഥനായ സൗരഭ് രാജ്പുതിനെ കൊലപ്പെടുത്തിയ കേസിൽ ഭാര്യ മുസ്‌കാൻ രസ്തോഗിക്കും കാമുകൻ സാനിൽ ശുക്ലയ്ക്കും മീററ്റ് കോടതി വധശിക്ഷ വിധിച്ചു. 2025 മാർച്ച് മൂന്നിന് നടന്ന കൊലപാതകത്തിൽ മൃതദേഹം വെട്ടിനുറുക്കി കോൺക്രീറ്റ് നിറച്ച നീല പ്ലാസ്റ്റിക് ഡ്രമ്മിൽ ഒളിപ്പിക്കുകയായിരുന്നു.

കേസിൽ ഹാജരാക്കിയ ശാസ്ത്രീയ തെളിവുകളും സാഹചര്യത്തെളിവുകളും പ്രതികൾക്കെതിരായ നിർണായക തെളിവുകളായി. ഇത്തരം കുറ്റകൃത്യങ്ങൾ സമൂഹത്തിൽ ഭീതി സൃഷ്ടിക്കുന്നതാണെന്ന് കോടതി നിരീക്ഷിച്ചു.

ഭക്ഷണത്തിൽ മയക്കുമരുന്ന് കലർത്തി കൊലപാതകം

2025 മാർച്ച് മൂന്നിന് മീററ്റിലെ ഇന്ദ്രാനഗറിലുള്ള വീട്ടിലാണ് സൗരഭ് രാജ്പുത് കൊല്ലപ്പെട്ടത്. ഭാര്യ മുസ്‌കാൻ ഭക്ഷണത്തിൽ മയക്കുമരുന്ന് കലർത്തി നൽകിയതിനെത്തുടർന്ന് സൗരഭ് ബോധരഹിതനായെന്നാണ് അന്വേഷണത്തിൽ കണ്ടെത്തിയത്.

തുടർന്ന് വീട്ടിലെത്തിയ സാനിൽ ശുക്ലയും മുസ്‌കാനും ചേർന്ന് സൗരഭിനെ കുത്തിക്കൊലപ്പെടുത്തിയെന്നാണ് കേസ്. പിന്നീട് കുളിമുറിയിൽവച്ച് മൃതദേഹം വെട്ടിനുറുക്കി ശരീരഭാഗങ്ങൾ നീല പ്ലാസ്റ്റിക് ഡ്രമ്മിൽ നിറച്ചു.

കോൺക്രീറ്റും മണലും ഉപയോഗിച്ച് ഡ്രം അടച്ച് മൃതദേഹം ഒളിപ്പിക്കുകയായിരുന്നു.

നീല ഡ്രം കേസിൽ നിർണായക വഴിത്തിരിവ്

കൊലപാതകത്തിന് പിന്നാലെ പ്രതികൾ ഹിമാചൽ പ്രദേശിലേക്ക് കടന്നതായി അന്വേഷണത്തിൽ കണ്ടെത്തി. സൗരഭ് യാത്രയിലാണെന്ന് കുടുംബാംഗങ്ങളെ വിശ്വസിപ്പിക്കാൻ മുസ്‌കാൻ അദ്ദേഹത്തിന്റെ മൊബൈൽ ഫോൺ ഉപയോഗിച്ച് സന്ദേശങ്ങൾ അയച്ചിരുന്നു.

എന്നാൽ സംശയം തോന്നിയ ബന്ധുക്കളും നാട്ടുകാരും 2025 മാർച്ച് 17ന് വീട്ടിലെത്തി പരിശോധന നടത്തി. സൗരഭിന്റെയും മുസ്‌കാന്റെയും ആറുവയസ്സുള്ള മകൾ, ‘പപ്പ ഡ്രമ്മിലുണ്ട്’ എന്ന് അയൽക്കാരോട് പറഞ്ഞിരുന്നതായും റിപ്പോർട്ടിലുണ്ട്.

തുടർന്ന് പൊലീസ് നീല ഡ്രം വെട്ടിപ്പൊളിച്ച് സൗരഭിന്റെ ശരീരാവശിഷ്ടങ്ങൾ കണ്ടെത്തി.

കടയുടമകളുടെ മൊഴിയും മൊബൈൽ രേഖകളും

സംഭവം പുറത്തുവന്നതിന് പിന്നാലെ രണ്ടു ദിവസത്തിനകം മുസ്‌കാനെയും സാനിലിനെയും പൊലീസ് പിടികൂടി. വിചാരണയ്ക്കിടെ പ്രോസിക്യൂഷൻ പ്രതികൾക്കെതിരേ സാഹചര്യത്തെളിവുകളും ശാസ്ത്രീയ തെളിവുകളും ഹാജരാക്കി.

കൊലപാതകത്തിന് ഉപയോഗിച്ച നീല പ്ലാസ്റ്റിക് ഡ്രം, സിമന്റ് ചാക്കുകൾ, മണൽ, കത്തികൾ എന്നിവ പ്രതികൾ ചേർന്ന് വാങ്ങിയതായി കടയുടമകൾ കോടതിയിൽ മൊഴി നൽകി. കൊലപാതകം നടന്ന സമയത്ത് സാനിൽ വീട്ടിലുണ്ടായിരുന്നുവെന്ന് മൊബൈൽ ഫോൺ രേഖകളും വ്യക്തമാക്കിയതായി പ്രോസിക്യൂഷൻ ചൂണ്ടിക്കാട്ടി.

ഹിമാചൽ യാത്രയും അന്വേഷണത്തിലെ കണ്ടെത്തലുകളും

കൊലപാതകത്തിന് ശേഷം മുസ്‌കാനും സാനിലും ഹിമാചൽ പ്രദേശിലെ ഹോട്ടലുകളിൽ ഒന്നിച്ച് താമസിച്ചതായും പൊലീസ് കണ്ടെത്തി. കൊലപാതകത്തിനു പിന്നാലെയുള്ള ഇവരുടെ നീക്കങ്ങളും മറ്റ് തെളിവുകളും കേസിൽ നിർണായകമായി.

കുറ്റകൃത്യത്തിന്റെ ഗൗരവം ചൂണ്ടിക്കാട്ടിയ കോടതി ഇരുവർക്കും വധശിക്ഷ വിധിക്കുകയായിരുന്നു.

English Summary : A Meerut court sentenced Muskan Rastogi and her boyfriend, Sahil Shukla, to death for the murder of Merchant Navy officer Saurabh Rajput on March 3, 2025. The couple allegedly killed Rajput, dismembered his body and concealed the remains in a blue plastic drum filled with concrete and sand. Investigators relied on forensic and circumstantial evidence, including mobile phone records and testimony from shopkeepers who sold materials used to conceal the body.