ബഹിരാകാശത്ത് സ്കോച്ച് വിസ്കി; 2028ൽ സ്പേസ് എക്സ് ദൗത്യത്തിൽ

ബഹിരാകാശ ഗവേഷണത്തിൽ പുതിയൊരു കൗതുക പരീക്ഷണത്തിന് ഒരുങ്ങുകയാണ് ഗവേഷകർ. മനുഷ്യർക്കും മൃഗങ്ങൾക്കും വിത്തുകൾക്കും പിന്നാലെ ഇനി ബഹിരാകാശത്ത് വിസ്കി എങ്ങനെ മാറുമെന്ന് പഠിക്കാനാണ് പദ്ധതി. സ്കോട്ലാൻഡിൽ നിന്നും ജപ്പാനിൽ നിന്നുമുള്ള എഞ്ചിനീയർമാരാണ് പരീക്ഷണത്തിന് പിന്നിൽ. ഗുരുത്വാകർഷണമില്ലാത്ത സാഹചര്യത്തിൽ വിസ്കിയുടെ ഏജിങ്, രുചി, രാസഘടന എന്നിവയിൽ ഉണ്ടാകുന്ന മാറ്റങ്ങളാണ് പ്രധാനമായും പരിശോധിക്കുക.

ബഹിരാകാശത്ത് വിസ്കി; പരീക്ഷണം 2028ൽ

2028ൽ വിക്ഷേപിക്കാനിരിക്കുന്ന സ്പേസ് എക്സ് ദൗത്യത്തിന്റെ ഭാഗമായി വിസ്കി സാമ്പിളുകൾ അടങ്ങിയ ക്യൂബ്സാറ്റ് അന്താരാഷ്ട്ര ബഹിരാകാശ നിലയമായ ഐഎസ്എസിലേക്ക് അയയ്ക്കാനാണ് പദ്ധതി.

ഭൂമിയിലെ സാധാരണ വിസ്കി ബാരലുകൾക്ക് വലിപ്പവും ഭാരവും കൂടുതലായതിനാൽ ബഹിരാകാശ ദൗത്യത്തിന് അനുയോജ്യമായ പ്രത്യേക മൈക്രോ-കണ്ടെയ്നർ സംവിധാനമാണ് ഗവേഷകർ വികസിപ്പിക്കുന്നത്.

ഓക്ക് മരക്കഷണങ്ങളുമായി വിസ്കി

സാധാരണ ബാരലുകളിൽ വിസ്കി സൂക്ഷിക്കുന്ന രീതിക്ക് പകരം ചെറിയ ഓക്ക് മരക്കഷണങ്ങൾ ദ്രാവകവുമായി നേരിട്ട് സമ്പർക്കത്തിൽ വരുന്ന രീതിയിലാണ് മൈക്രോ-കണ്ടെയ്നർ രൂപകൽപന ചെയ്യുന്നത്.

ഇതിലൂടെ ബഹിരാകാശ സാഹചര്യങ്ങൾ വിസ്കിയുടെ സ്വാദിനെയും രാസഘടനയെയും എങ്ങനെ സ്വാധീനിക്കുന്നുവെന്ന് പഠിക്കാനാകും. കൂടാതെ, ക്യൂബ്സാറ്റിനുള്ളിൽ സ്ഥാപിക്കുന്ന സെൻസറുകൾ വഴി വിവിധ മാറ്റങ്ങളും നിരീക്ഷിക്കും.

ഗുരുത്വാകർഷണമില്ലാത്ത അവസ്ഥയിൽ വിസ്കി എങ്ങനെ മാറും?

ഭാരമില്ലായ്മയിൽ ദ്രാവകം എങ്ങനെയാണ് ചലിക്കുന്നതെന്നും ബഹിരാകാശത്ത് ചൂട് എങ്ങനെ കൈമാറ്റം ചെയ്യപ്പെടുന്നുവെന്നും ഗവേഷകർ പരിശോധിക്കും.

അതേസമയം, ബഹിരാകാശ സാഹചര്യങ്ങളിൽ വിസ്കിയുടെ ഏജിങ് പ്രക്രിയ ഭൂമിയിലേതിനേക്കാൾ വേഗത്തിൽ നടക്കാൻ സാധ്യതയുണ്ടെന്നാണ് ഗവേഷകരുടെ അനുമാനം.

പുതിയ രാസപ്രക്രിയകൾ കണ്ടെത്താൻ കഴിയുമോ?

വിസ്കിയുടെ സ്വാദ് വികസിക്കുന്നതിന് പിന്നിലെ രാസപ്രക്രിയകളെക്കുറിച്ച് കൂടുതൽ മനസ്സിലാക്കുകയാണ് പരീക്ഷണത്തിന്റെ മറ്റൊരു ലക്ഷ്യം.

ബഹിരാകാശ സാഹചര്യങ്ങളിൽ ഓക്ക് മരവും വിസ്കിയും തമ്മിലുള്ള ഇടപെടലിൽ ഉണ്ടാകുന്ന മാറ്റങ്ങൾ പഠിക്കുന്നതിലൂടെ രുചി വികസനവുമായി ബന്ധപ്പെട്ട പുതിയ രാസപ്രക്രിയകൾ കണ്ടെത്താൻ കഴിയുമെന്നാണ് ഗവേഷകരുടെ പ്രതീക്ഷ.

English Summary

Researchers from Scotland and Japan are planning to send Scotch whisky samples into space to study how the ageing process changes under microgravity. As part of a SpaceX mission planned for 2028, a CubeSat carrying whisky samples is expected to be sent to the International Space Station. Instead of conventional barrels, the experiment will use specially designed micro-containers containing small pieces of oak in contact with the whisky. Sensors will monitor fluid movement, heat transfer and changes in flavour and chemical composition. Researchers hope the experiment will reveal new chemical processes involved in whisky flavour development.