രാജ്യത്തെ താപവൈദ്യുത നിലയങ്ങളിൽ കൽക്കരി ശേഖരം കുറയുന്നു
തിരുവനന്തപുരം: രാജ്യത്തെ കൽക്കരി അധിഷ്ഠിത താപവൈദ്യുത നിലയങ്ങളിൽ ശേഖരം കുറയുന്നത് വൈദ്യുതി ഉൽപാദനത്തെ ബാധിച്ചേക്കും. സെൻട്രൽ ഇലക്ട്രിസിറ്റി അതോറിറ്റിയുടെ കണക്കനുസരിച്ച് രാജ്യത്തെ 190 കൽക്കരി താപവൈദ്യുത നിലയങ്ങളിൽ 74 എണ്ണത്തിലും ശേഖരം ഗണ്യമായി കുറഞ്ഞിട്ടുണ്ട്. പല നിലയങ്ങളിലും ഒരാഴ്ചത്തേക്കുള്ള കൽക്കരി മാത്രമാണ് ശേഷിക്കുന്നത്. ഓഗസ്റ്റിൽ ഇത്തരത്തിൽ ശേഖരം കുറഞ്ഞ നിലയങ്ങളുടെ എണ്ണം 51 ആയിരുന്നു.
ഉൽപാദനത്തിൽ കുറവിന് സാധ്യത
കൽക്കരി ലഭ്യത കുറഞ്ഞതിനെ തുടർന്ന് നിലയങ്ങൾ പൂർണ ശേഷിയിൽ പ്രവർത്തിക്കാൻ കഴിയാതെ വന്നാൽ വൈദ്യുതി ഉൽപാദനത്തിലും സംസ്ഥാനങ്ങൾക്ക് ലഭിക്കുന്ന വിഹിതത്തിലും കുറവുണ്ടാകാം. കഴിഞ്ഞവർഷത്തെ അപേക്ഷിച്ച് കൽക്കരി ശേഖരത്തിൽ 42 ശതമാനം കുറവുണ്ടെന്നാണ് കണക്ക്. പല നിലയങ്ങളിലും ഉൽപാദനം കുറഞ്ഞതോടെ ദേശീയ ഗ്രിഡിൽ ഏകദേശം 12,000 മെഗാവാട്ടിന്റെ കുറവുണ്ടായതായും റിപ്പോർട്ടുണ്ട്.
മഴയും ഗതാഗത തടസ്സവും
കൽക്കരി ഖനനം കൂടുതലായി നടക്കുന്ന ഒഡിഷ, ഛത്തീസ്ഗഢ്, ഝാർഖണ്ഡ് സംസ്ഥാനങ്ങളിലെ കനത്ത മഴ ഖനനത്തെയും കൽക്കരി നീക്കത്തെയും ബാധിച്ചതാണ് നിലവിലെ പ്രതിസന്ധിക്ക് പ്രധാന കാരണങ്ങളിലൊന്ന്. വൈദ്യുതി ഉപയോഗം ഉയരുമെന്ന് കണക്കാക്കി ആവശ്യമായ അളവിൽ കൽക്കരി എത്തിക്കുന്നതിൽ വീഴ്ചയുണ്ടായതായും വിലയിരുത്തലുണ്ട്.
രാജ്യത്തെ വൈദ്യുതി ഉൽപാദനത്തിന്റെ ഏകദേശം പകുതി താപവൈദ്യുത നിലയങ്ങളിൽ നിന്നാണ്. ജലവൈദ്യുതി ഉൾപ്പെടെയുള്ള മറ്റ് സ്രോതസുകളിൽ ഉൽപാദനം കുറയുമ്പോൾ ഗ്രിഡിന്റെ ആവശ്യകത നിറവേറ്റുന്നതിൽ താപനിലയങ്ങൾക്ക് നിർണായക പങ്കുണ്ട്.
More Read
ജലവൈദ്യുതി കുറഞ്ഞതും തിരിച്ചടിയായി
ജലവൈദ്യുതി ഉൽപാദനത്തിൽ 12 ശതമാനം കുറവുണ്ടായതിനെ തുടർന്ന് കൽക്കരി നിലയങ്ങളിലെ ഉൽപാദനം 18 ശതമാനം വർധിപ്പിച്ചതും കൽക്കരി ശേഖരം വേഗത്തിൽ കുറയാൻ കാരണമായതായി വിലയിരുത്തുന്നു. അന്താരാഷ്ട്ര വിപണിയിൽ കൽക്കരി വില ഉയർന്നതോടെ സ്വകാര്യ വൈദ്യുതി കമ്പനികൾ ഇറക്കുമതി കുറച്ച് ആഭ്യന്തര ഖനികളെ കൂടുതലായി ആശ്രയിച്ചതും ലഭ്യതയെ ബാധിച്ചു.
കൽക്കരി വിതരണം സാധാരണ നിലയിലായില്ലെങ്കിൽ വരും ദിവസങ്ങളിൽ വൈദ്യുതി ഉൽപാദനത്തിലും വിതരണത്തിലും സമ്മർദം വർധിക്കാനുള്ള സാധ്യതയുണ്ട്.
