‘ഓടി രക്ഷപ്പെടൂ’; 1,643 വിദ്യാർഥികളുടെ ജീവൻ രക്ഷിച്ച് അധ്യാപകൻ

കാഠ്മണ്ഡു: ‘ഗ്രാമം മുഴുവനും വെള്ളത്തിൽ മുങ്ങി. വേഗം രക്ഷപ്പെട്ട് ഓടിക്കോളൂ…’ മിന്നൽ പ്രളയം ദുരന്തം വിതയ്ക്കുന്നതിനിടെ ലഭിച്ച മുന്നറിയിപ്പ് സന്ദേശം തിരിച്ചറിഞ്ഞ് നിമിഷങ്ങൾക്കുള്ളിൽ നടപടി സ്വീകരിച്ച അധ്യാപകൻ രക്ഷിച്ചത് 1,643 വിദ്യാർഥികളുടെ ജീവൻ. നേപ്പാളിലെ നുവാകോട്ടിലാണ് സമയോചിതമായ ഇടപെടലിലൂടെ വൻ ദുരന്തം ഒഴിവായത്.

ത്രിഭുവൻ തൃശൂലി സെക്കൻഡറി സ്കൂൾ പ്രിൻസിപ്പലും ഇംഗ്ലീഷ് അധ്യാപകനുമായ 47കാരൻ രാജേന്ദ്ര ദവാഡിയാണ് കുട്ടികളുടെ രക്ഷകനായത്. ഇന്ന് സ്കൂൾ നിന്നിടത്ത് അവശേഷിക്കുന്നത് ചെളിക്കൂന മാത്രമാണ്.

നേപ്പാൾ മിന്നൽ പ്രളയം; മുന്നറിയിപ്പ് ലഭിച്ചത് രാവിലെ

ബുധനാഴ്ച രാവിലെ 9.20നാണ് രാജേന്ദ്ര ദവാഡിക്ക് സുഹൃത്തിന്റെ ഫോൺ കോൾ ലഭിച്ചത്. ‘നമ്മുടെ ഗ്രാമം നദി കൊണ്ടുപോയി, വേഗം ഓടി രക്ഷപ്പെടൂ’ എന്നായിരുന്നു സന്ദേശം.

ആ സമയത്ത് സ്കൂൾ കെട്ടിടത്തിലും പരിസരത്തുമായി 1,643 കുട്ടികളുണ്ടായിരുന്നു. നദിയിൽനിന്ന് ഏകദേശം 60 മീറ്റർ ഉയരത്തിൽ കോൺക്രീറ്റ് കെട്ടിടമായതിനാൽ സ്കൂൾ സുരക്ഷിതമായിരിക്കുമെന്ന് ദവാഡി ആദ്യം കരുതി.

എന്നാൽ വെള്ളം അതിവേഗം ഉയരുകയാണെന്ന വിവരം ഒരു രക്ഷിതാവും സുഹൃത്തുമായ വ്യക്തി ഓടിയെത്തി അറിയിച്ചു. ഇതോടെ അപകടത്തിന്റെ ഗൗരവം ദവാഡിക്ക് വ്യക്തമായി.

ബെൽ മുഴക്കി ക്ലാസുകൾ ഒഴിപ്പിച്ചു

ഒട്ടും സമയം കളയാതെ സ്കൂൾ ബെൽ മുഴക്കാൻ ദവാഡി നിർദേശം നൽകി. അധ്യാപകരോട് ക്ലാസ് മുറികൾ ഒഴിപ്പിക്കാനും കുട്ടികളെ സുരക്ഷിത സ്ഥാനത്തേക്ക് മാറ്റാനും ആവശ്യപ്പെട്ടു.

സ്കൂൾ ബസുകൾ അടിയന്തരമായി തിരിച്ചുവിടാൻ ഡ്രൈവർമാർക്കും നിർദേശം നൽകി. ഇതിനിടെ പരിഭ്രാന്തരായ കുട്ടികൾ കുന്നിൻമുകളിലേക്ക് ഓടിമാറി.

ഭയന്നുവിറച്ച് ശ്വാസംമുട്ടൽ അനുഭവപ്പെട്ട ചില വിദ്യാർഥികളെ മോട്ടോർസൈക്കിളുകളിലാണ് സുരക്ഷിതമായി മുകളിലെത്തിച്ചത്. അധ്യാപകരും കുട്ടികൾക്കൊപ്പം കുന്നിൻമുകളിലേക്ക് നീങ്ങി.

കുട്ടികൾ രക്ഷപ്പെട്ടു; സ്കൂൾ കെട്ടിടങ്ങൾ തകർന്നു

കുന്നിൻമുകളിലെ വലിയ മരച്ചുവട്ടിൽ അഭയം തേടിയതിന് പിന്നാലെ തൃശൂലി നദിയിലെ പ്രളയജലം സ്കൂൾ കെട്ടിടങ്ങളെ പൂർണമായി വിഴുങ്ങി.

മിനിറ്റുകൾക്കുള്ളിൽ കെട്ടിടം പൂർണമായും തകർന്നുവീണു. എന്നാൽ ദവാഡിയുടെ സമയോചിതമായ ഇടപെടലിലൂടെ 1,643 വിദ്യാർഥികളെയും അവർക്കൊപ്പമുണ്ടായിരുന്ന അധ്യാപകരെയും രക്ഷിക്കാനായി.

നേപ്പാൾ മിന്നൽ പ്രളയത്തിൽ രണ്ട് ജീവനുകൾ നഷ്ടമായി

വൻ ദുരന്തത്തിൽ സ്കൂളിന് രണ്ട് ജീവനുകൾ നഷ്ടപ്പെട്ടു. അധ്യാപകനായ സന്തോഷ് പരിയാർ (32), സ്കൂൾ ജീവനക്കാരനായ സുൽത്താൻ ലാമ എന്നിവരാണ് മരിച്ചത്.

നദീതീരത്തെ വാടകമുറിയിൽനിന്ന് സാധനങ്ങൾ എടുക്കാൻ പോയ സന്തോഷും സ്കൂളിന്റെ വാതിലുകൾ പൂട്ടാൻ തിരികെപ്പോയ സുൽത്താനും മലവെള്ളപ്പാച്ചിലിൽ ഒലിച്ചുപോവുകയായിരുന്നു.

ആയിരക്കണക്കിന് കുട്ടികൾക്ക് രക്ഷകനായി പ്രിൻസിപ്പൽ

കൺമുന്നിൽ ദുരന്തം എത്തിയപ്പോഴും പരിഭ്രാന്തരാകാതെ സമയോചിതമായി തീരുമാനമെടുത്തതാണ് വൻ ദുരന്തത്തിൽനിന്ന് കുട്ടികളെ രക്ഷിക്കാൻ നിർണായകമായത്.

അതേസമയം, നാട്ടുകാരും വിദ്യാർഥികളും രാജേന്ദ്ര ദവാഡിയെ ഇന്ന് ‘ഹീറോ’ എന്നാണ് വിശേഷിപ്പിക്കുന്നത്. പ്രളയം സ്കൂളിനെ ഇല്ലാതാക്കിയെങ്കിലും അധ്യാപകന്റെ ഇടപെടൽ 1,643 കുട്ടികൾക്ക് ജീവിതത്തിലേക്കുള്ള വഴിയൊരുക്കി. :::

English Summary:
During a flash flood in Nepal’s Nuwakot district, school principal and English teacher Rajendra Dawadi reportedly helped save all 1,643 students at Tribhuvan Trishuli Secondary School. After receiving an urgent warning about rapidly rising floodwaters, he ordered the school to be evacuated, redirected buses and moved students to higher ground. The school buildings were later completely destroyed by floodwaters. Two school staff members died in the disaster.