ട്രംപിന്റെ ‘മനുഷ്യ പ്രിന്റർ’; നതാലി ഹാർപിനെ ചുറ്റി വിവാദം

വാഷിങ്ടൺ: അമേരിക്കൻ പ്രസിഡന്റ് ഡൊണൾഡ് ട്രംപിനെ ചുറ്റിപ്പറ്റിയുള്ള പുതിയ രാഷ്ട്രീയ ചർച്ചകളിൽ ശ്രദ്ധാകേന്ദ്രമായി നതാലി ഹാർപ്. വൈറ്റ് ഹൗസ് എക്സിക്യൂട്ടീവ് അസിസ്റ്റന്റായ 35കാരിക്ക് വലിയ ഔദ്യോഗിക പദവിയില്ലെങ്കിലും ട്രംപിൽ കാര്യമായ സ്വാധീനമുണ്ടെന്ന ആരോപണമാണ് ഉയരുന്നത്.

നതാലി ഹാർപ്; ട്രംപിനോട് അടുത്ത ബന്ധമെന്ന് ആരോപണം

ട്രംപിന്റെ അടുത്ത വൃത്തങ്ങളിൽനിന്നും സമാനമായ വിമർശനങ്ങൾ ഉയർന്നതോടെയാണ് നതാലി ഹാർപ് വീണ്ടും ചർച്ചയായത്. ഡമോക്രാറ്റിക് പാർട്ടി സെനറ്റർ ജോൺ ഓസോഫ് അടുത്തിടെ ട്രംപുമായുള്ള നതാലിയുടെ അടുത്ത ബന്ധത്തെ പരസ്യമായി വിമർശിച്ചിരുന്നു.

ഇതോടെയാണ് വൈറ്റ് ഹൗസിലെ അവരുടെ സ്വാധീനവും ഔദ്യോഗിക ചുമതലകളും സംബന്ധിച്ച ചർച്ചകൾ ശക്തമായത്.

മുൻ മാധ്യമപ്രവർത്തക; ട്രംപിന്റെ പ്രചാരണത്തിലും സജീവം

മുൻ മാധ്യമപ്രവർത്തകയായ നതാലി ട്രംപിന്റെ കഴിഞ്ഞ തിരഞ്ഞെടുപ്പ് പ്രചാരണത്തിൽ സജീവമായി പ്രവർത്തിച്ചിരുന്നു. ട്രംപിന്റെ ഉടമസ്ഥതയിലുള്ള ‘ട്രൂത്ത് സോഷ്യൽ’ സമൂഹമാധ്യമവുമായി ബന്ധപ്പെട്ട പ്രവർത്തനങ്ങളിലും അവർ പങ്കാളിയായിരുന്നുവെന്നാണ് റിപ്പോർട്ടുകൾ.

ട്രംപിനൊപ്പം നിരന്തരം യാത്ര ചെയ്യുന്നതും അദ്ദേഹത്തിന് ആവശ്യമായ വിവരങ്ങൾ എത്തിക്കുന്നതുമാണ് നതാലിയെ ശ്രദ്ധേയയാക്കുന്ന മറ്റൊരു ഘടകം.

‘മനുഷ്യ പ്രിന്റർ’ എന്ന വിളിപ്പേര്

2023ൽ ട്രംപ് ന്യൂയോർക്കിലേക്ക് യാത്ര ചെയ്യുന്നതിനിടെ വാഹനവ്യൂഹത്തിൽ സ്ഥലമില്ലാത്തതിനാൽ നതാലിക്ക് വാഹനത്തിൽ കയറാനായില്ലെന്നാണ് റിപ്പോർട്ട്. തുടർന്ന് കാറുകളിലൊന്നിന്റെ ഡിക്കിയിൽ കയറിയാണ് അവർ യാത്ര ചെയ്തതെന്നും റിപ്പോർട്ടുകളുണ്ട്.

എപ്പോഴും പോർട്ടബിൾ പ്രിന്റർ കൈവശം വയ്ക്കുന്ന നതാലി, ട്രംപിന് ആവശ്യമായ വാർത്തകളും സമൂഹമാധ്യമ പ്രതികരണങ്ങളും മറ്റ് വിവരങ്ങളും പ്രിന്റ് ചെയ്ത് നൽകാറുണ്ടെന്നാണ് പറയുന്നത്.

ഇതോടെയാണ് അവർക്ക് ‘മനുഷ്യ പ്രിന്റർ’ എന്ന വിശേഷണം ലഭിച്ചത്.

സുരക്ഷാ അനുമതിയുമായി ബന്ധപ്പെട്ടും വിവാദം

അതേസമയം, സുരക്ഷാ അനുമതിയില്ലാതെ ഏകദേശം ഒരു വർഷത്തോളം നതാലി വൈറ്റ് ഹൗസിൽ ജോലി ചെയ്തെന്ന ആരോപണവും ഉയർന്നിട്ടുണ്ട്.

കഴിഞ്ഞ മാസം തുർക്കിയിൽ ട്രംപിന് നേരെ സുരക്ഷാഭീഷണി ഉയർന്ന സാഹചര്യത്തിൽ അദ്ദേഹത്തെ വിമാനത്തിലേക്ക് മാറ്റുന്നതിനിടയിലും ഒപ്പമുണ്ടായിരുന്നവരിൽ നതാലിയും ഉണ്ടായിരുന്നുവെന്നാണ് റിപ്പോർട്ടുകൾ.

ട്രംപിലെ സ്വാധീനം എങ്ങനെ?

വലിയ ഔദ്യോഗിക പദവിയില്ലാത്ത ഒരാൾക്ക് അമേരിക്കൻ പ്രസിഡന്റിൽ ഇത്രയധികം സ്വാധീനം ലഭിക്കുന്നത് എങ്ങനെയെന്ന ചോദ്യമാണ് ഇപ്പോൾ യുഎസ് രാഷ്ട്രീയത്തിൽ ഉയരുന്നത്.

അതേസമയം, നതാലിയുടെ യഥാർഥ അധികാരപരിധിയും ട്രംപിന്റെ തീരുമാനങ്ങളിൽ അവരുടെ സ്വാധീനത്തിന്റെ വ്യാപ്തിയും സംബന്ധിച്ച ആരോപണങ്ങൾ രാഷ്ട്രീയ ചർച്ചയായി തുടരുകയാണ്.