ജയ്സാൽമർ: പണം സുരക്ഷിതമായി സൂക്ഷിക്കാൻ ബാങ്ക് അക്കൗണ്ടുകളെ ആശ്രയിക്കുന്നതാണ് സാധാരണ രീതി. എന്നാൽ രാജസ്ഥാനിലെ പച്പദ്ര സ്വദേശി മാംഗിലാൽ മേഘ്വാൾ ചെയ്തത് തികച്ചും വ്യത്യസ്തമായിരുന്നു. മണ്ണിനടിയിൽ കുഴിച്ചിട്ട 5 ലക്ഷം രൂപ ഒരു വർഷത്തിന് ശേഷം കണ്ടെത്തിയപ്പോൾ ചിതൽ തിന്ന് നശിച്ച നിലയിലായിരുന്നു.
സ്ഥലം വിറ്റ് ലഭിച്ച തുക ഉപയോഗിച്ച് കൃഷിയിടത്തിൽ ഒരു മുറി നിർമിക്കാനായിരുന്നു മാംഗിലാലിന്റെ പദ്ധതി. എന്നാൽ വീട്ടിൽ പണം സൂക്ഷിച്ചാൽ മോഷണം പോകുമെന്നോ കുടുംബാംഗങ്ങൾ ചെലവഴിക്കുമെന്നോ ഭയന്ന് അദ്ദേഹം തുക രഹസ്യമായി കുഴിച്ചിടുകയായിരുന്നു.
മണ്ണിനടിയിൽ കുഴിച്ചിട്ട 5 ലക്ഷം മറന്നുപോയി
ഒരു രാത്രി അഞ്ച് ലക്ഷം രൂപയും പോളിത്തീൻ ബാഗിലാക്കി കൃഷിയിടത്തിന്റെ ഒരു ഭാഗത്ത് കുഴിച്ചിട്ടു. എന്നാൽ പിന്നീട് മാംഗിലാൽ ഈ കാര്യം മറന്നുപോയി.
മദ്യപാനവും ഓർമക്കുറവും ഉണ്ടായിരുന്ന മാംഗിലാലിന് പണം കുഴിച്ചിട്ട സ്ഥലം പിന്നീട് കൃത്യമായി ഓർത്തെടുക്കാൻ കഴിഞ്ഞില്ല. മുറി നിർമിക്കാൻ പണം ആവശ്യമായപ്പോഴാണ് പ്രതിസന്ധി മനസ്സിലായത്.
ദിവസങ്ങളോളം തിരഞ്ഞിട്ടും കണ്ടെത്താനായില്ല
കൃഷിയിടത്തിന്റെ വിവിധ ഭാഗങ്ങളിൽ ദിവസങ്ങളോളം തിരച്ചിൽ നടത്തിയെങ്കിലും പണം കണ്ടെത്താനായില്ല. ഒടുവിൽ മാംഗിലാൽ ഭാര്യയോടും മകനോടും പണം കുഴിച്ചിട്ട കാര്യം പറഞ്ഞു.
More Read
മൂവരും ചേർന്ന് തിരച്ചിൽ നടത്തിയെങ്കിലും ഫലം കണ്ടില്ല. തുടർന്ന് പണം കണ്ടെത്താനുള്ള ശ്രമം കുടുംബം ഉപേക്ഷിച്ചു.
ട്രാക്ടർ ഉഴുതപ്പോൾ ബാഗ് പുറത്തുവന്നു
ഒരു വർഷത്തിന് ശേഷം കൃഷിയിടം ഒരുക്കുന്നതിന്റെ ഭാഗമായി ട്രാക്ടർ ഉപയോഗിച്ച് സ്ഥലം ഉഴുതുമറിക്കുന്നതിനിടെയാണ് ഒരു ബാഗ് പുറത്തുവന്നത്. കീറിപ്പറിഞ്ഞ ബാഗ് പരിശോധിച്ചപ്പോഴാണ് അതിനുള്ളിൽ 500 രൂപയുടെ നോട്ടുകളുണ്ടെന്ന് കണ്ടെത്തിയത്.
എന്നാൽ നോട്ടുകളിൽ ഭൂരിഭാഗവും ചിതൽ തിന്ന് നശിച്ച നിലയിലായിരുന്നു. മണ്ണിനടിയിൽ ദീർഘകാലം കിടന്നതിനാൽ പണം ഉപയോഗിക്കാനാകാത്ത അവസ്ഥയിലായിരുന്നുവെന്ന് കുടുംബം പറയുന്നു.
ബാങ്കിലും നിരാശ
കേടായ നോട്ടുകളുമായി കുടുംബം ബാങ്കിനെ സമീപിച്ചു. എന്നാൽ നോട്ടുകളുടെ അവസ്ഥ കണ്ട് ആദ്യം അധികൃതർ അവ സ്വീകരിക്കാൻ തയ്യാറായില്ലെന്നാണ് കുടുംബത്തിന്റെ വാദം.
പിന്നീട് ബലോത്രയിലെ ബാങ്കിന്റെ പ്രധാന ശാഖയിലും കുടുംബം എത്തി. അവിടെയും പണം മാറ്റിയെടുക്കാൻ കഴിഞ്ഞില്ലെന്നാണ് റിപ്പോർട്ട്.
