തിരുവനന്തപുരം: വട്ടിയൂർക്കാവ് സ്വദേശിയും നഗരസഭാ കൗൺസിലറുമായ ആർ. സുഗതനെ പൊലീസ് അറസ്റ്റ് ചെയ്ത സംഭവം വിവാദമായി. അറസ്റ്റ് നടപടിക്കിടെ പൊലീസ് വീട്ടിൽ കയറി ഭാര്യയെ മർദിച്ചെന്നും കുടുംബാംഗങ്ങളെ ഭീഷണിപ്പെടുത്തിയെന്നും ആരോപിച്ച് സുഗതനും കുടുംബവും പരാതിയുമായി രംഗത്തെത്തി.
പൊലീസ് നോട്ടീസ് നൽകിയ കേസിൽ ഹാജരാകാൻ അസുഖം കാരണം സാവകാശം ആവശ്യപ്പെട്ടിരുന്നുവെന്നാണ് സുഗതന്റെ വാദം. എന്നാൽ പുലർച്ചെ വൻ പൊലീസ് സന്നാഹത്തോടെയാണ് വീട്ടിലെത്തി അറസ്റ്റ് ചെയ്തതെന്ന് അദ്ദേഹം ആരോപിച്ചു.
അറസ്റ്റ് നടപടിക്കിടെ ഭാര്യയെ മർദിക്കുകയും താലിമാല പൊട്ടിക്കുകയും കുട്ടികളെ ഭയപ്പെടുത്തുകയും ചെയ്തതായി കുടുംബം പരാതിപ്പെട്ടിട്ടുണ്ട്. വനിതാ പൊലീസ് സാന്നിധ്യമില്ലാതെയായിരുന്നു നടപടിയെന്നും ആരോപണമുണ്ട്.
അതേസമയം, കഴിഞ്ഞ മാസം വട്ടിയൂർക്കാവ് മേഖലയിലുണ്ടായ സംഘർഷവുമായി ബന്ധപ്പെട്ട കേസിൽ പ്രതിയായതിനാലാണ് അറസ്റ്റ് നടത്തിയതെന്നാണ് പൊലീസ് വിശദീകരണം. സുഗതനെതിരെ കാപ്പ നിയമപ്രകാരമുള്ള നടപടികളും സ്വീകരിച്ചിട്ടുണ്ടെന്നാണ് റിപ്പോർട്ടുകൾ.
അറസ്റ്റിനിടെ സ്ഥലത്ത് എത്തിയ ബിജെപി പ്രവർത്തകരും പൊലീസും തമ്മിൽ സംഘർഷാവസ്ഥ രൂപപ്പെട്ടതായും, ജനക്കൂട്ടത്തെ നിയന്ത്രിക്കുന്നതിനിടെ പൊലീസ് ആകാശത്തേക്ക് വെടിയുതിർത്തെന്നുമാണ് വിവരം.
More Read
സുഗതനെ വൈദ്യപരിശോധനയ്ക്ക് വിധേയനാക്കിയ ശേഷം കോടതിയിൽ ഹാജരാക്കാനുള്ള നടപടികൾ പൊലീസ് സ്വീകരിച്ചു. സംഭവവുമായി ബന്ധപ്പെട്ട ആരോപണങ്ങളും പൊലീസ് നടപടികളും രാഷ്ട്രീയ വിവാദങ്ങൾക്ക് വഴിവെച്ചിരിക്കുകയാണ്.
English Summary
The arrest of former municipal councillor R. Sugathan in Thiruvananthapuram has sparked controversy, with allegations that police used excessive force during the operation. Sugathan and his family claim that officers assaulted his wife and intimidated family members while carrying out the arrest. Police maintain that the action was linked to a criminal case and preventive detention proceedings.
