തിരുവനന്തപുരം: ഉന്നതവിദ്യാഭ്യാസ സ്ഥാപനങ്ങളിൽ പഠിക്കുന്ന പെൺകുട്ടികൾക്ക് പ്രതിമാസം 1000 രൂപ നൽകുമെന്ന യു.ഡി.എഫിന്റെ ‘ഇന്ദിരാ ഗാരന്റി’ വാഗ്ദാനം നടപ്പാക്കുന്നതിനായുള്ള പ്രാഥമിക കണക്കെടുപ്പ് സർക്കാർ ആരംഭിച്ചു. സംസ്ഥാനത്തെ സർവകലാശാലകളിലും കോളേജുകളിലും പഠിക്കുന്ന വിദ്യാർത്ഥിനികളുടെ ഏകീകൃത വിവരങ്ങൾ സർക്കാരിന്റെ കൈവശമില്ലാത്ത സാഹചര്യത്തിലാണ് വിവരശേഖരണം പുരോഗമിക്കുന്നത്.
ഏറ്റവും പുതിയ അഖിലേന്ത്യാ ഉന്നതവിദ്യാഭ്യാസ സർവേ കണക്കുകൾ പ്രകാരം, കേരളത്തിലെ ഉന്നതവിദ്യാഭ്യാസ മേഖലയിലെ വിദ്യാർഥികളിൽ 59.47 ശതമാനവും പെൺകുട്ടികളാണ്. സംസ്ഥാനത്ത് ഏകദേശം 10.99 ലക്ഷം വിദ്യാർഥികൾ പഠിക്കുന്ന സാഹചര്യത്തിൽ, ഏഴ് ലക്ഷത്തോളം വിദ്യാർത്ഥിനികൾ പദ്ധതിയുടെ ഗുണഭോക്താക്കളാകുമെന്നാണ് പ്രാഥമിക വിലയിരുത്തൽ.
ഇതനുസരിച്ച് പദ്ധതിക്കായി പ്രതിമാസം ഏകദേശം 70 കോടി രൂപയും വർഷത്തിൽ 800 കോടിയിലേറെ രൂപയും ചെലവാകുമെന്നാണു കണക്കുകൾ സൂചിപ്പിക്കുന്നത്. അന്തിമ കണക്കെടുപ്പ് പൂർത്തിയായ ശേഷമേ കൃത്യമായ സാമ്പത്തിക ബാധ്യത വ്യക്തമാകൂ. സംസ്ഥാനത്തിന്റെ നിലവിലെ സാമ്പത്തിക സാഹചര്യത്തിൽ ഇത്രയും വലിയ തുക എങ്ങനെ കണ്ടെത്തുമെന്നതും ചർച്ചയാകുന്നുണ്ട്.
നിലവിൽ വിവിധ വിഭാഗങ്ങൾക്കായി ലഭിക്കുന്ന സ്കോളർഷിപ്പുകൾ, ഫെലോഷിപ്പുകൾ, വരുമാനാടിസ്ഥാനത്തിലുള്ള ധനസഹായങ്ങൾ എന്നിവയുടെ ഭാവിയെക്കുറിച്ചും ആശങ്ക ഉയരുന്നുണ്ട്. പട്ടികജാതി-പട്ടികവർഗ വിദ്യാർഥികൾക്കും സാമ്പത്തികമായി പിന്നാക്കം നിൽക്കുന്ന വിഭാഗങ്ങൾക്കും ലഭിക്കുന്ന നിലവിലെ ആനുകൂല്യങ്ങൾ തുടരുമോ, അതോ പുതിയ പദ്ധതിയുടെ ഭാഗമായി മാനദണ്ഡങ്ങളിൽ മാറ്റമുണ്ടാകുമോ എന്ന കാര്യത്തിൽ സർക്കാർ ഇതുവരെ വ്യക്തത നൽകിയിട്ടില്ല.
ഈ വർഷത്തെ ഹയർസെക്കൻഡറി പരീക്ഷാഫലങ്ങളിലും പെൺകുട്ടികളുടെ വിജയനിരക്ക് കൂടുതലായതിനാൽ, വരും വർഷങ്ങളിൽ പദ്ധതിയുടെ ഗുണഭോക്താക്കളുടെ എണ്ണം ഇനിയും ഉയരാനിടയുണ്ടെന്ന വിലയിരുത്തലും ശക്തമാണ്.
More Read
English Summary
The Kerala government has begun preliminary data collection to implement the UDF’s “Indira Guarantee” scheme promising ₹1,000 per month for girl students in higher education institutions. Initial estimates suggest around seven lakh beneficiaries, with an annual financial burden exceeding ₹800 crore. Questions are also being raised about how the state will fund the scheme and whether existing scholarships and welfare benefits will continue unchanged.
