തിരുവനന്തപുരം: യുവ എസ്.ഐമാർ സംസ്ഥാനത്തെ 419 പൊലീസ് സ്റ്റേഷനുകളുടെ ചുമതലയിലേക്ക് എത്തുന്നതോടെ സേനയുടെ പ്രവർത്തനം കൂടുതൽ ഊർജസ്വലമാക്കാനാണ് പൊലീസ് ലക്ഷ്യമിടുന്നത്. സ്വാതന്ത്ര്യദിനം മുതൽ സ്റ്റേഷൻഭരണം എസ്.ഐമാർക്ക് കൈമാറും. ക്രിമിനലുകളെയും ഗുണ്ടാസംഘങ്ങളെയും അമർച്ച ചെയ്യുന്നതിനൊപ്പം ജനങ്ങളോടുള്ള പൊലീസിന്റെ പെരുമാറ്റം മെച്ചപ്പെടുത്താനും പുതിയ സംവിധാനത്തിലൂടെ ലക്ഷ്യമിടുന്നു.
യുവ എസ്.ഐമാർ 419 സ്റ്റേഷനുകളുടെ ചുമതലയിലേക്ക്
എസ്.എച്ച്.ഒമാരായി ഇൻസ്പെക്ടർമാർ എത്തിയതോടെ സ്റ്റേഷൻഭരണത്തിൽ എസ്.ഐമാരുടെ ചുമതലകൾ പരിമിതമായിരുന്നു. എന്നാൽ, പുതിയ സംവിധാനത്തിൽ യുവ എസ്.ഐമാർക്ക് കൂടുതൽ ഉത്തരവാദിത്തങ്ങൾ നൽകും.
കേസുകളുടെ എണ്ണത്തിനനുസരിച്ച് രണ്ടോ അതിലധികമോ എസ്.ഐമാരും ആറോളം ഗ്രേഡ് എസ്.ഐമാരും ഓരോ സ്റ്റേഷനിലുമുണ്ടാകും. സീനിയറായ പ്രിൻസിപ്പൽ എസ്.ഐയായിരിക്കും എസ്.എച്ച്.ഒ.
കുറ്റാന്വേഷണത്തിനും ക്രമസമാധാനത്തിനും പ്രത്യേക ചുമതല
കുറ്റാന്വേഷണവും ക്രമസമാധാനപാലനവും വേർതിരിച്ച സാഹചര്യത്തിൽ ക്രൈം എസ്.ഐ, ലാ ആൻഡ് ഓർഡർ എസ്.ഐ എന്നീ ചുമതലകളും ഉണ്ടാകും. എന്നാൽ, സ്റ്റേഷന്റെ ആകെ നിയന്ത്രണം എസ്.എച്ച്.ഒയ്ക്കായിരിക്കും.
കേസന്വേഷണം, പ്രതികളെ പിടികൂടൽ, ലഹരിവേട്ട, ക്രിമിനലുകളെ നേരിടൽ, സൈബർ അന്വേഷണം എന്നിവയിൽ എസ്.ഐമാർക്ക് പ്രത്യേക പരിശീലനം നൽകിയിട്ടുണ്ട്.
കൂടാതെ, പ്രതിഷേധങ്ങളും സമരങ്ങളും കൈകാര്യം ചെയ്യൽ, സ്റ്റേഷൻഭരണം തുടങ്ങിയ മേഖലകളിലും പരിശീലനം നൽകി. ജനങ്ങളോട് മാന്യമായി പെരുമാറാനും സ്റ്റേഷനിലെത്തുന്നവർക്ക് നീതി ഉറപ്പാക്കാനും പരിശീലനം ലഭിക്കും.
ഇൻസ്പെക്ടർമാർക്ക് മൂന്ന് സ്റ്റേഷനുകൾ വരെ മേൽനോട്ടം
ഒരു ഇൻസ്പെക്ടർക്ക് പരമാവധി മൂന്ന് പൊലീസ് സ്റ്റേഷനുകളുടെ മേൽനോട്ട ചുമതലയായിരിക്കും നൽകുക. ഇവർക്കും ഒരാഴ്ചത്തെ പ്രത്യേക പരിശീലനം നൽകിയിട്ടുണ്ട്.
തുടർച്ചയായി സ്റ്റേഷനുകളിൽ പരിശോധന നടത്തുന്നതും ഇൻസ്പെക്ടർമാരുടെ ചുമതലയായിരിക്കും. അതേസമയം, ഒൻപത് സ്റ്റേഷനുകളുടെ മേൽനോട്ടം ഡിവൈ.എസ്.പിമാർ നിർവഹിക്കും.
More Read
ഡിവൈ.എസ്.പിമാർ സ്റ്റേഷനുകളിൽ ഇടയ്ക്കിടെ മിന്നൽ പരിശോധനകളും നടത്തും. ഇതിലൂടെ സ്റ്റേഷനുകളുടെ പ്രവർത്തനം കൂടുതൽ കാര്യക്ഷമമാക്കാനാണ് ലക്ഷ്യം.
ജനങ്ങളോട് മൃദുഭാവം, ക്രിമിനലുകളോട് കടുപ്പം
ജനങ്ങളോടുള്ള പെരുമാറ്റം മെച്ചപ്പെടുത്തുന്നതിനൊപ്പം ക്രിമിനലുകൾക്കെതിരായ നടപടികൾ ശക്തമാക്കണമെന്നാണ് എസ്.ഐമാർക്ക് നൽകിയ നിർദേശം.
കസ്റ്റഡി മർദ്ദനവും മൂന്നാംമുറയും അനുവദിക്കില്ല. അന്വേഷണത്തിൽ പ്രാകൃത രീതികൾ ഒഴിവാക്കി ശാസ്ത്രീയവും വസ്തുതകളെ അടിസ്ഥാനമാക്കിയുള്ളതുമായ രീതിയാണ് പിന്തുടരേണ്ടത്.
ബാഹ്യസമ്മർദ്ദത്തിന് വഴങ്ങരുതെന്നും മൂല്യച്യുതി ഉണ്ടാകരുതെന്നും ഉദ്യോഗസ്ഥർക്ക് നിർദേശം നൽകിയിട്ടുണ്ട്.
ഗുണ്ടകളുടെ കേസ് ചരിത്രം കൃത്യമാക്കും
ഓരോ സ്റ്റേഷനിലും ഗുണ്ടകളുടെയും സ്ഥിരം കുറ്റവാളികളുടെയും വിവരങ്ങൾ കൃത്യമായി ശേഖരിക്കും. ഗുണ്ടാനിയമം ചുമത്തുന്നതിന് ആവശ്യമായ ഏഴ് വർഷത്തെ കേസ് ചരിത്രവും രേഖപ്പെടുത്തും.
നേരത്തെ രേഖകൾ കൃത്യമല്ലാത്തതിനാൽ ഗുണ്ടകൾ കരുതൽ തടങ്കൽ, നാടുകടത്തൽ തുടങ്ങിയ നടപടികളിൽ നിന്ന് രക്ഷപ്പെടുന്ന സാഹചര്യമുണ്ടായിരുന്നുവെന്നാണ് വിലയിരുത്തൽ.
More Read
നാടുകടത്തിയ ഗുണ്ടകളെ പിന്നീട് കൃത്യമായി നിരീക്ഷിക്കാനും കഴിഞ്ഞിരുന്നില്ല. പുതിയ സംവിധാനത്തിലൂടെ ഇത്തരം പോരായ്മകൾ പരിഹരിക്കാനാണ് ശ്രമം.
63 സ്റ്റേഷനുകളുടെ ചുമതല വനിതാ എസ്.ഐമാർക്ക്
സംസ്ഥാനത്ത് 63 പൊലീസ് സ്റ്റേഷനുകളുടെ ചുമതല വനിതാ എസ്.ഐമാർക്ക് നൽകും. അതേസമയം, 64 സ്റ്റേഷനുകളിൽ നിലവിലെ ഇൻസ്പെക്ടർമാർ തന്നെ എസ്.എച്ച്.ഒമാരായി തുടരും.
സ്റ്റേഷൻ മേൽനോട്ടത്തിനായി സംസ്ഥാനത്ത് 200 പൊലീസ് സർക്കിളുകളാണ് നിലവിലുള്ളത്. പുതിയ സംവിധാനത്തിലൂടെ പൊലീസ് കൂടുതൽ ഊർജസ്വലവും കാര്യക്ഷമവുമാകുമെന്നും ജനങ്ങളോടുള്ള പെരുമാറ്റം മെച്ചപ്പെടുമെന്നും ക്രമസമാധാന ചുമതലയുള്ള അഡീഷണൽ ഡി.ജി.പി പി. വിജയൻ പറഞ്ഞു.
